बालसुधारगृहात रवानगी
अल्पवयीन आहे की नाही याचा तपास पोलिसांकडून झाल्यावर सज्ञान म्हणून खटला चालवायचा निर्णय बाल न्याय मंडळ घेणार
अग्रवाल बिल्डरला तीन दिवसांची पोलीस कोठडी
पुणे : दोन निष्पाप जीवांना कार खाली चिरडणाऱ्या पुण्यातील श्रीमंत बिल्डर विशाल अग्रवालच्या दारुड्या मुलाला मिळालेला जामीन अखेर जनरेट्यामुळे रद्द करण्यात आला. पुणे पोलिसांनी केलेल्या बनवाबनवी मुळे या मुलाला बाल न्याय मंडळाने दोन जणांना कारने चिरडून ठार मारूनही केवळ ३०० शब्दांचा निबंध लिहून अवघ्या १५ तासात जामीन दिला होता. त्यामुळे अवघ्या महाराष्ट्रात संतापाची लाट उसळली होती. अखेर पोलिसांनी नव्याने आरोपपत्र दाखल केल्यामुळे त्याचा जामिन रद्द करुन त्याला बालसुधारगृहात पाठविण्यात आले आहे. तर त्याच्या वडिलांना याच गुन्ह्यासाठी तीन दिवसांची पोलिस कोठडी ठोठावण्यात आली आहे.
पुणे पोलिसांनी प्रसिध्दी माध्यमांना बिल्डर विशाल अग्रवालच्या अल्पवयीन मुलाने दारू पिऊन अपघात केल्याची माहीत दिली होती पण प्रत्यक्षात मात्र न्यायालयापुढे ही माहीती सबळ पुरव्यानिशी पुढे आणली नव्हती. आज पोलिसांनी ज्या हॉटेलमध्ये दारू पार्टी झाली तेथील बिल न्यायालयापुढे ठेवून जामीन रद्द करण्याची मागणी केली ती न्यायालयाने मान्य केली. त्याचसोबत हा मुलगा अल्पवयीन आहे की नाही याचा तपास पोलिसांकडून झाल्यावर सज्ञान म्हणून खटला चालवायचा की नाही याचा निर्णयही बाल न्याय मंडळ घेणार आहे. तसे झाल्यास या आरोपात दोषी आढळणाऱ्या या श्रीमंत बापाच्या दारुड्या मुलाला सात वर्षांची शिक्षा होऊ शकते.
बुधवारी सकाळी पुणे पोलिसांनी अल्पवयीन आरोपीला कोर्टात हजर केलं. त्यावेळी युक्तीवाद करत असताना पोलिसांनी मुलगा दारु प्यायला होता हे न्यायालयाला पटवून देण्याचा प्रयत्न केला. त्यासाठी अल्पवयीन मुलाने कोझी किचन हॉटेलमध्ये भरलेलं 48 हजार रुपयांचे बीलही कोर्टासमोर सादर केलं. तर तिकडे बचावपक्षाच्या वकिलांनी मुलगा अल्पवयीन असल्याचा युक्तीवाद केला. दोन्ही बाजूचे युक्तीवाद झाल्यानंतर न्यायलायनं आदेश दिला.
हा मुलगा अल्पवयीन असल्याचं आरोपीच्या वतीने युक्तीवाद केला. तर या आरोपीने केलेलं कृत्य हे अत्यंत भीषण असं आहे, त्यामुळे त्यांच्यावर खटला चालवण्यासाठी परवानगी देण्यात यावी अशी मागणी पोलिसांच्या वतीनं करण्यात आली.
पुण्यातील कल्याणीनगरमधील अपघाताला कारणीभूत ठरलेल्या अल्पवयीन मुलावर दाखल गुन्ह्यात पोलिसांनी नव्या कलमाची वाढ केली आहे. मद्यधुंद अवस्थेत कार चालवल्याप्रकरणी अल्पवयीन मुलावर 185 कलमाच्या अंतर्गत नव्याने गुन्हा दाखल करण्यात आला. याआधी त्याच्यावर कलम 304 अंतर्गत सदोष मनुष्यवधाचा गुन्हा दाखल करण्यात आला होता. मात्र अल्पवयीन असल्याच्या कारणावरुन न्यायालयाने त्याला जामीन मंजूर केला होता. या मुलाला दुपारी 12 वाजता बाल हक्क कोर्टासमोर हजर करण्यात आले. तर आरोपी मुलाचे वडील विशाल अगरवाल यांना अटक करण्यात आली असून त्यांना तीन दिवसांची पोलिस कोठडी सुनावण्यात आली आहे.