अमर हिंदच्या विजयात सेजलची चमक
शिवनेरी कबड्डी स्पर्धा २०२६ अमर हिंदच्या विजयात सेजलची चमक जय भारत, यश, विश्वशांतीसह मुंबई पोस्टलचीही आगेकूच मुंबई : शिवनेरी सेवा मंडळाच्या कबड्डी महोत्सवात महिला गटात सेजल कांबळेच्या आक्रमक चढायांच्या चमकदार…
डॉ. गोरक्ष धोत्रे युगांडाचे ‘केअर ग्लोबल ॲम्बेसेडर’
डॉ. गोरक्ष धोत्रे युगांडाचे ‘केअर ग्लोबल ॲम्बेसेडर’ मुंबई : माध्यम व चित्रपट उद्योगातील प्रदीर्घ अनुभव तसेच सामाजिक आणि कामगार क्षेत्रातील उल्लेखनीय कार्याची दखल घेत डॉ. गोरक्ष सदाशिव धोत्रे यांची युगांडाचे भारतासाठी ग्लोबल…
कळंबोलीत दहशत माजविणाऱ्या ‘गोलूभाई’वर कारवाई
तरुणावरील हल्ल्यात दोघे अटकेत राज भंडारी पनवेल :मुंबई पुणे दृतगती महामार्गांवरील कळंबोली पोलीस ठाण्याच्या हादीत असणाऱ्या जाधववाडीतील परिसरात असलेल्या एका चायनीज सेंटरवर ३१ ऑगस्ट रोजी चायनीज खाण्यासाठी गेलेल्या तिघांनी फिर्यादी बसलेल्या टेबलवरच बसण्याचा हट्ट करून वाद घालत एका तरुणाला बेदम मारहाण करून गुन्हा दाखल होताच फरार झाले. कळंबोली पोलीसांच्या अथक प्रयत्नानंतर यापैकी दोघा आरोपींना कळंबोली पोलिसांनी अखेर महिन्याभरानंतर अटक केली. मात्र या घटनेतील एक फरार आरोपी निनाद पाटोळे हा अद्यापही पोलिसांच्या कचाट्यात सापडला नाही. यावेळी अटक केलेल्या दोन्ही आरोपींना न्यायालयात हजर केले असता त्या दोन्ही आरोपींना न्यायालयाने ११ ऑगस्टपर्यंत पोलीस कोठडी सुनावली आहे. यावेळी पिडीत कुटुंबाने मात्र या अशा दहशतवाद्यांना तडीपार करावे अथवा मोक्का लावण्याची विनंती प्रसारमध्यमांशी बोलताना केली आहे. याबाबत मिळालेल्या माहितीनुसार, फिर्यादी अक्षय डांगे हे कळंबोली (जाधववाडी) परिसरातील चायनीज सेंटरवर जेवण करण्यासाठी गेला असताना याठिकाणी आरोपी प्रसाद रंगिले उर्फ गोलू, धनंजय सेंगर आणि निनाद पाटोळे हे तिघे आले. यावेळी फिर्यादी अक्षय डांगे ज्या टेबलवर बसला होता त्याला तिथून उठण्यास सांगू लागले. यावेळी अक्षय डांगे हा उठण्यास तयार झाला नाही. याचाच राग प्रसाद रंगिले उर्फ गोलू आणि त्याच्या साथीदारांना आला. याच रागात या तिन्ही आरोपिंनी अक्षय याला मारण्यास सुरुवात केली. अक्षयला झालेली दुखापत इतकी भयानक होती की, या तिघांनी केलेल्या हल्ल्यात त्याच्या हातावर चॉपरने मोठा घाव बसला, तसेच त्याच्या इतर अवयव्यांना जबर मार बसला. त्यामुळे अक्षय डांगे या तरुणाला तब्बल ४ ते ५ दिवस रुग्णालयात भरती होऊन उपचार घ्यावे लागले. शुल्लक कारणावरून जीवे ठार मारण्यासाठी केलेला हा हल्ला माणुसकीला काळिमा फासणारा होता. हल्ल्याच्या दुसऱ्याच दिवशी कळंबोली पोलीस ठाण्यात प्रसाद रंगिले उर्फ गोलू, धनंजय सेंगर आणि निनाद पाटोळे या तिघांच्या विरोधात जीवे ठार मारण्याचा प्रयत्न केल्याप्रकरणी गुन्हा दाखल झाला. गुन्हा दाखल होताच प्रसाद रंगिले उर्फ गोलू, धनंजय सेंगर आणि निनाद पाटोळे हे तीनही आरोपी पोलिसांना चकवा देत फरार झाले. तब्बल १ महिना आणि ८ दिवसांच्या शोधमोहिमेनंतर अखेर कळंबोली पोलिसांनी यातील दोघांना अटक करून न्यायालयात हजर केले. यावेळी न्यायालयाने या दोघांनाही ११ ऑगस्टपर्यंत पोलीस कोठडी सुनावली आहे. मात्र निनाद पाटोळे हा तिसरा आरोपी अद्यापही फरार आहे. याबाबत फिर्यादी अक्षय डांगे यांच्यासह परिवाराशी संपर्क साधला असता त्यांनी प्रसाद रंगिले उर्फ गोलुभाई आणि त्याच्या साथीदारांबाबत मोठी गोष्ट समोर आणली. या परिवाराने घटना घडल्यानंतर माहितीच्या अधिकारात गोलुभाई आणि धनंजय सेंगर यांची गुन्हेगारी पार्श्वभूमीच मागवून घेतली. यामध्ये गोलुभाई याच्यावर कळंबोली पोलीस ठाण्यात तब्बल १२ गुन्हे दाखल असल्याची माहिती समोर आली आहे. तर धनंजय सेंगर याच्यावरही मारहाण केल्याचा एक गुन्हा दाखल आहे. 0000
मुंबईच्या सेंट झेवियर्स कॉलेजमध्ये ‘हस्तलिखित’ प्रदर्शन
शतकानुशतकांच्या लेखन-परंपरेचे दर्शन रमेश औताडे मुंबई : भारताच्या प्राचीन लिखित वारशाची सफर घडवणाऱ्या ‘हस्तलिखित’ प्रदर्शनाचे आयोजन मुंबईतील सेंट झेवियर्स कॉलेजमध्ये करण्यात आले होते. मुंबई महानगरपालिका मार्ग मेट्रो सिनेमा जवळ ९ ते ११ सप्टेंबर या तीन दिवस हे प्रदर्शन ठेवण्यात आले होते. या प्रदर्शनाची संकल्पना प्रसिद्ध इतिहास अभ्यासक सेंट झेवियर्स कॉलेजच्या मुख्य डॉ. अनिता राणे-कोठारे यांची होती. शिलालेख, कोरीव लेख आणि दुर्मिळ हस्तलिखिते या विषयाला वाहिलेले हे विशेष प्रदर्शन आहे. यात दगडावर कोरलेले शिलालेख, ताम्रपटांवरील कोरीव लेखांपासून ते ताडपत्री आणि जुन्या कागदावरील हस्तलिखितांपर्यंतचा मोठा संग्रह मांडण्यात आला आहे. शतकानुशतके भारताचा इतिहास, धर्म, प्रशासन आणि साहित्य कसे जतन केले गेले, याची प्रत्यक्ष अनुभूती या प्रदर्शनातून मिळणार आहे. भारतीय लिपी आणि लेखन माध्यमांचा विकासक्रम अत्यंत सोप्या आणि अभ्यासपूर्ण पद्धतीने येथे उलगडून दाखवण्यात आला आहे. प्रत्येक वस्तूचा ऐतिहासिक आणि सांस्कृतिक संदर्भही समजावून सांगण्यात आला आहे. या प्रदर्शनाचे आणखी एक वैशिष्ट्य म्हणजे सोबत दिली जाणारी विशेष माहिती-पुस्तिका आहे. डॉ. अनिता राणे-कोठारे व हृदय कुलकर्णी यांनी या पुस्तिकेचे लेखन आणि संपादन केले आहे. ही पुस्तिका केवळ प्रदर्शनाची माहिती देत नाही, तर प्राचीन भारतीय इतिहास आणि पुरातत्वशास्त्रातील शिलालेखांच्या अभ्यासाचे महत्त्व या पुस्तिकेत सांगितले आहे.
अखेर भारतरत्न डॉक्टर बाबासाहेब आंबेडकरांचे हनुमानाच्या रूपातील पेंटिंग उतरवले
आरपीआयच्या आंदोलनाला यश केतन खेडेकर मुंबई : भारतरत्न डॉक्टर बाबासाहेब आंबेडकर यांचे हनुमानाच्या अवतारातील असलेले चित्र जहांगीर आर्ट गॅलरी येथील प्रदर्शनामध्ये भरवण्यात आले होते. या ठिकाणी डॉक्टर बाबासाहेबांना हनुमानाच्या रूपात पुस्तक घेऊन आकाशात भ्रमंती करताना दाखवले दाखवले होते. याबाबत आरपीआयच्या कार्यकर्त्यांना माहिती मिळाली असता त्यांनी त्वरित त्या ठिकाणी जाऊन हे हनुमानाच्या स्वरूपातील असलेले बाबासाहेबांचे पेंटिंग त्वरित उतरवले. रिपब्लिकन पार्टी ऑफ इंडिया दक्षिण मुंबई जिल्हाध्यक्ष संजय पवार यांचे नेतृत्वाखाली हे आंदोलन करण्यात आले. हे आंदोलन अगदी शांततापूर्णपणे झाले असून यामध्ये कोणताही अनुचित प्रकार घडला नाही. तसेच डॉक्टर बाबासाहेब आंबेडकरांना हनुमानाचे रूपात दाखवणे म्हणजे फार मोठी गंभीर चूक आहे आणि ही चूक यापुढे घडणार नाही अशी ग्वाही जहांगीर आर्ट गॅलरीच्या व्यवस्थापक के जी मेनन मॅडम यांनी दिली. भारतरत्न डॉक्टर बाबासाहेब आंबेडकर म्हणजे महामानव असून सर्वांसाठी दैवत आहे. त्यांचा असे हनुमानाचा रूप दाखवून चित्र काढणे हे योग्य नाही. आम्ही बाबासाहेबांनी सांगितलेल्या दया आणि करुणेचा माध्यमातून शांततेने आंदोलन करून हे चित्र प्रदर्शनातून काढले असून चित्रकार राजेश केदारे यांनी देखील आपली चूक झाल्याचे कबूल केले असून माफी मागितली असल्याची माहिती रिपब्लिकन पार्टी ऑफ इंडियाची दक्षिण मुंबई जिल्हाध्यक्ष संजय पवार यांनी दिली. यावेळी त्यांच्यासोबत दक्षिण मुंबईचे तालुका अध्यक्ष विशाल भाई दिवार आणि इतर पदाधिकारी उपस्थित होते.जिल्हा उपाध्यक्ष विजय जाधव, कुलाबा तालुकाध्यक्ष मनोहर जाधव, जेष्ठ कार्यकर्ते डॅ.राजेंद्र जाधव, डॉ. रमेश ईपाकायला, तालुक्यातील कार्यकर्ते, वॉर्ड पदाधिकाऱ्यांसह, मुंबई प्रदेश चे सुनिल गरूड, इत्यादी पदाधिकारी उपस्थित होते.
‘महाभूमी’ पोर्टलचा मोठा दिलासा!
सातबारा, नकाशे अन् ई-मोजणीची सेवा मोबाईलवर अशोक गायकवाड कर्जत : भूमी अभिलेख विभागातील कागदपत्रे आणि विविध अभिलेख मिळविण्यासाठी नागरिकांना आता शासकीय कार्यालयांच्या वारंवार चकरा मारण्याची गरज राहणार नाही. ‘महाभूमी महाराष्ट्र’ या ऑनलाइन पोर्टलमुळे भूमी अभिलेख विभागाच्या अनेक महत्त्वाच्या सेवा घरबसल्या उपलब्ध झाल्या असून, नागरिकांचा वेळ, पैसा आणि श्रम वाचणार आहेत. या डिजिटल सुविधेचा नागरिकांनी जास्तीत जास्त लाभ घ्यावा, असे आवाहन कर्जत भूमी अभिलेख कार्यालयाचे शिरस्तेदार शैलेश जाधव यांनी केले आहे. जमाबंदी आयुक्त तथा संचालक, भूमी अभिलेख, महाराष्ट्र राज्य, पुणे शैलेश नवल आणि अपर जमाबंदी आयुक्त तथा अतिरिक्त संचालक ज्ञानेश्वर खिल्लारे यांच्या मार्गदर्शनाखाली ऑनलाइन सेवा अधिक सुलभ करण्यात आल्या आहेत. ‘महाभूमी’ पोर्टलवर डिजिटल ७/१२ उतारा, गाव नकाशे, एकत्रीकरणपूर्व टिपण, फाळणी नकाशा आणि पक्का बुक यांसारखे अभिलेख ऑनलाइन डाउनलोड करता येणार आहेत. तसेच एकत्रीकरण योजनेचा उतारा आणि पोटहिस्सा नकाशेही घरबसल्या मिळविता येणार आहेत. ई-मोजणीसाठीही नागरिकांना मोठा दिलासा मिळणार आहे. ई-मोजणी अर्जाची सद्यस्थिती आणि मोजणी नोटीस ऑनलाइन पाहता व डाउनलोड करता येणार असून ही सुविधा विनाशुल्क उपलब्ध आहे. अर्जानुसार मोजणीची क-प्रतदेखील ऑनलाइन डाउनलोड करता येणार आहे. एकाच डिजिटल व्यासपीठावर विविध सेवा उपलब्ध झाल्याने कार्यालयीन पाठपुरावा कमी होऊन शासकीय कामकाजात पारदर्शकता आणि गतिमानता वाढण्यास मदत होणार आहे. ‘सरकारी कार्यालयात जाण्याऐवजी सेवा आता नागरिकांच्या मोबाईलवर’ या संकल्पनेला ‘महाभूमी’ पोर्टलमुळे प्रत्यक्ष बळ मिळाले असून, भूमी अभिलेख विभागाच्या डिजिटल सेवेचा हा उपक्रम नागरिकांसाठी मोठा दिलासा ठरणार आहे. 0000000
कुलाबा,कफ , परेड, गिरगांवसह उपनगरात गोविंदा पथकांचा जल्लोष
डोंगरीत महिला गोविंदा पथकांच्या मुलींचा जल्लोष दिनेश मराठे मुंबई : शुक्रवारी मध्य रात्री बारा सव्वा बारा वाजता श्रीकृष्ण जन्म सोहळा मुंबईच्या कृष्ण मंदिरांसह अन्य मंदिरातही संपन्न झाला.गोविंदा गोपाळा चा गजर करीत दक्षिण मुंबईत गोविंदा पथकांची सकाळी १० वाजल्या पासूनच मानाच्या दहि हंड्या फोडण्यास चुरस वाढू लागली.शुक्रवारी दिवसभर मुंबईत आकाशातून श्रावणी सरीवरसरी बरसणाऱ्या पावसाचा शनिवारीही असाच मारा राहिल्यास गोविंदा पथकांना त्याच्या मोठया आव्हानाला सामोरे जावेच लागेल अशी परिस्थिती निर्माण झाली होती मात्र शनिवारी मुंबईच्या काही भागात अगदीच तुरळक झालेल्या वरुणराजाच्या श्रावणी जलधारांचा होणारा अभिषेक, उंचावर बांधलेल्या दहीहंडीच्या उंचीच्या थरांचा अंदाज घेत विविध गोविंदा पथकांनी मोठया रुबाबात सलामी फोडल्या. खास करून मुंबईच्या दक्षिण टोकाकडील कुलाबा, कफ परेड, वाळकेश्वर येथून पुढे फोर्ट, काळबादेवी, मलबार हिल,डोंगरी,उमरखाडी, गिरगावसह दक्षिण मुंबईतील मानाच्या दहीहंड्या गोविंदा पथकांनी विजयी सलामी देत फोडल्या. यावेळी गोविंदांच्या हंडी फोडण्याचा थरार आणि साहस पाहताना लोकांच्या काळजाचे ठोके चुकत होते. गोविंदांची शिस्तबद्धपणे एकावर एक मानवी मनोऱ्यांचे थर रचत दहीहंडी सर करण्यासाठी चाललेली लगबग माझगाव, डोंगरी, मशीद बंदर, कुलाबा, कफ परेड, मेट्रो, फोर्ट, वाळकेश्वर, मलबार हिल, उमरखाडी, कुंभारवाडा, खेतवाडी, भायखळा, नागपाडा, आग्रीपाडा, मुंबई सेंट्रल, बीडीडी चाळ, ग्रांट रोड, गिरगाव, ताडवाडी परिसरात पाहायला मिळत होती. ‘अरे बोल बोल बोल… बजरंग बली की जय’ आणि ‘गोविंदा रे गोपाळा यशोदेच्या तान्ह्या बाळा ‘ चा जयघोष करीत उमरखाडी नाक्यावर मनसेच्या राजन दळवी, आज्ञा भोसले आणि वीरेंद्र पाटील यांनी आयोजित केलेल्या दहीहंडी उत्सवाच्या हंडया विविध गोविंदा, महिला गोविंदा पथकांनी रचलेल्या चार, पाच आणि सहा थरांच्या पहिल्याच प्रयत्नात फुटल्याने त्यांनी मोठा जल्लोष केला. जे.जे. रुग्णालयाच्या नवयुग गोविंदा,यंग उमरखाडी गोविंदा,श्रीराम महिला गोविंदा पथक, श्रीकृष्ण गोविंदा पथक, यांनी ४,५,६,७ थरांची दहीहंडी मानवी मनोरे रचत तीन एक्के लावत सलामी देत पहिल्याच प्रयत्नात लीलया फोडल्या. तरुण गोविंदाच्या चेहऱ्यावरील आनंद आणि उत्साह हंडी फोडल्यानंतर बक्षीस स्वीकारताना ओसंडून वाहताना दिसत होता.मुंबईकर गोविंदा आणि दहीहंडीचा थरारक खेळ अगदी सकाळपासून अनुभवत होते; तर गोविंदा आला रे आला, गोविंदा रे गोपाळा, शोर मच गया शोर, मच गया शोर सारी नगरी रे, ‘हमाल दे धमाल’मधील’ ढाक्कुमाकुम’सारखी लोकप्रिय गाणी सर्वत्र वाजत होती.या गाण्याच्या चालीवर तरुणाई जमिनीवर पाय रोवत ठेका देताना दिसत होती.गोकुळाष्टमीला उमरखाडीतून निघालेल्या पौराणिक शोभायात्रेचे गोविंदा प्रेमीनी,आणि नागरिकांनी उत्स्फूर्त प्रतिसाद देत स्वागत केले.उमरखाडी येथील मनसेच्या दही हंडी सोहळ्यात शाखा अध्यक्ष राजन दळवी,महिला शाखा अध्यक्ष आज्ञा भोसले, उषा पाटील, आशा पाटील, रुषाली लांडगे, राजेंद्र म्हात्रे, ललित ठाकूर, जी के वाघेला, रणछोड राठोड, संजय लांडगे यांनी विशेष मेहनत घेत कार्यक्रम यशस्वी केला.
वृक्षारोपणातून पालिका अधिकाऱ्यांनी दिला निसर्ग संवर्धनाचा संदेश
दिनेश मराठे मुंबई : निसर्गाच्या संवर्धनासाठी संत शिरोमणी तुकाराम महाराजांनी “वृक्षवल्ली आम्हा सोयरे वनचरे” हा सुप्रसिद्ध अभंग रचला. जवळपास पावणेचारशे वर्षे होऊनही या अभंगाचे महत्त्व आजही अबाधित आहे. सजीवसृष्टीतील प्रत्येक जीवाला ऑक्सिजनची आवश्यकता आहे. त्यामुळे मुंबईतील, राज्यातील तसेच देशातील प्रत्येक नागरिकाने एक वृक्ष लागवड व संवर्धनाचा संकल्प पूर्ण केल्यास खऱ्या अर्थाने आपली वसुंधरा हरित होईल आणि भविष्यातील पिढीला ऑक्सिजनची कमतरता भासणार नाही, असा संदेश पालिकेच्या बी वार्डचे सहाय्यक आयुक्त जितेंद्र घोराडे यांनी दिला. मुंबई महानगरपालिकेच्या वर्धापन दिनानिमित्त डोंगरी येथील सिताराम शेनॉय उद्यानात आयोजित वृक्षारोपण कार्यक्रमात ते बोलत होते. यावेळी कार्यकारी अभियंता राकेश कुमार झा, सहाय्यक अभियंता रुपेश भडांगे, आरोग्य विभागाचे वैद्यकीय अधिकारी डॉ. अविनाश जोगदंड, सहाय्यक अभियंता अरुण वैद्य, डोंगरी पब्लिक स्कूलचे शिक्षक, विद्यार्थी आणि स्थानिक नागरिक मोठ्या संख्येने उपस्थित होते. वृक्षारोपणानंतर शालेय विद्यार्थी, पालिका अधिकारी आणि कर्मचाऱ्यांनी डोंगरी, उमरखाडी आणि सॅन्डहर्स्ट रोड रेल्वे स्टेशन मार्गावर वृक्ष दिंडी काढून झाडे लावा, झाडे जगवा पृथ्वी वाचवा असा संदेश दिला. ००००००
यमुना सामाजिक शैक्षणिक संस्थेची दहीहंडी दणक्यात साजरी
५,५५,५०० रुपयांची बक्षिसे, अभिनेत्री सायली संजीव आणि महेंद्रशेठ यांच्या उपस्थितीने गोविंदा पथक सुखावले उलवे, ता. ६ :शेलघर येथील यमुना सामाजिक शैक्षणिक संस्थेतर्फे दहीहंडी उत्सव दणक्यात साजरा करण्यात आला. संस्थेचे संस्थापक- अध्यक्ष आणि आंतरराष्ट्रीय कामगार नेते महेंद्रशेठ घरत, सचिव शुभांगीताई घरत यावेळी जातीने हजर होत्या. प्रमुख पाहुण्या म्हणून अभिनेत्री सायली संजीव यांची उपस्थिती लक्षणीय ठरली. गोविंदा पथकांच्या उत्साहाला रिमझिम पावसाच्या सरींनी साथ दिली, त्यामुळे त्यांचा आनंद द्विगुणित झाला. थरांथर रचताना गोविंदा पथकांची चिकाटी आणि एकी दृष्ट लागण्याजोगी होती. मुंबई, ठाणे, नवी मुंबई, उरण, पनवेल आदी ठिकाणांहून सुमारे ६० गोविंदा पथकांनी सलामी दिली. कुणी चार थर, कुणी पाच, सहा, सात, आठ थरांपर्यंत मजल मारली. भारतीय महिला क्रिकेट संघाने पाकिस्तानवर दणदणीत विजय मिळविला, तर दहीहंडी उत्सवात महिलांच्या गोविंदा पथकांची सलामी वाखाणण्याजोगी होती. सोबत शिवमुद्रा डान्स अकॅडमी पपण पाटील यांच्या नृत्याचा आविष्कार होता. अनेक नृत्यांगणांनी गोविंदा पथकांना आणि रसिकांना खिळवून ठेवले. पहिला क्रमांक राघोबा देव गोविंदा पथक कोटनाका, उरण; द्वितीय क्रमांक जरीमरी आई गोविंदा पथक, पिरकोन आणि आम्ही तुर्भेकर गोविंदा पथक, तुर्भे यांनी तिसऱ्या क्रमांकावर बाजी मारली. यावेळी सायली संजीव म्हणाल्या, “सर्व गोविंदा पथकांचे अभिनंदन आणि कौतुक करते, गोविंदा पथकांची सुरक्षितता महत्त्वाची आहे. महेंद्रशेठ घरत यांच्यासारखे दिलदार नेतृत्व या परिसराला लाभले आहे, ही अभिमानाची गोष्ट आहे. शुभांगीताई आणि महेंद्रशेठ घरत हे अनोखे दाम्पत्य आहे. त्यांची सामाजिक बांधिलकी वाखाणण्याजोगी आहे. आईच्या नावाने संस्था सुरू करून सर्वसामान्यांच्या आयुष्यात सुखाचे क्षण पेरण्याची त्यांची भूमिका कौतुकास्पद आहे.” यावेळी महेंद्रशेठ घरत म्हणाले, “यमुना सामाजिक संस्थेतर्फे विविध सामाजिक उपक्रम राबविण्यात येतात. दहिहंडी हा त्याचाच भाग आहे, आपण संस्कृती जपण्यासाठी आणि टिकविण्यासाठी प्रयत्न करतोय; परंतु उत्सव साजरा करीत असताना कुणालाही दुखापत होऊ नये, याची काळजी घ्या. मी सदैव कलेला प्रोत्साहन देणारा आणि सन्मान करणारा आहे. कायमच सर्वसामान्यांच्या पाठीशी आहे.” यावर्षी दहीहंडीसाठी ५ लाख ५५ हजार ५०० रुपये रोख बक्षीस आणि चषक ठेवण्यात आले होते. सायंकाळी ५ वाजता ढोल-ताशांच्या गजरात उत्सवाला सुरुवात झाली. मुंबई, नवी मुंबई, ठाणे, उरण येथील प्रसिद्ध गोविंदा पथकांनी अवघ्या काही मिनिटांत पाच-सहा-सात-आठ लावले. विजेत्यांना ५,५५,५०० रुपयांची बक्षिसे देण्यात आली. दहीहंडी यशस्वी करण्यासाठी यमुना सामाजिक संस्थेच्या पदाधिकाऱ्यांनी आणि एम. जी. ग्रुपच्या सहकाऱ्यांनी विशेष मेहनत घेतली. दरम्यान, शेलघर या गावात आंतरराष्ट्रीय कामगार नेते महेंद्रशेठ घरत यांनी स्वतः गावातील लहान-थोरांसोबत मिसळून दहिहंडीचा आनंद घेतला. शेलघरमधील विठ्ठल मंदिरापासून गोविंदा निघाला. परंपरागत गोविंदाचा महेंद्रशेठ घरत यांनी मनमुराद आनंद घेऊन गावातील दहिहंडी फोडली. त्यामुळे शेलघरचे ग्रामस्थही भारावून गेले. ०००००००
सिंधुदुर्गातील सर्व १,५३९ अंगणवाड्यांमध्ये पाणी-शौचालय सुविधा १०० टक्के!
आठही तालुक्यातील आंगणवाड्यांची स्थिती समाधानकारक राजन चव्हाण सिंधुदुर्ग : सिंधुदुर्ग जिल्ह्यातील आंगणवाडी केंद्रामध्ये मूलभूत सुविधांच्या बाबतीत समाधानकारक चित्र समोर आले आहे. महिला व बाल विकास विभागाने अलिकडेच केलेल्या सर्वेक्षणानुसार जिल्ह्यातील सर्व १,५३९ कार्यान्वित अंगणवाडी केंद्रांमध्ये शौचालय तसेच पिण्याच्या पाण्याची सुविधा उपलब्ध आहे. दोन्ही सुविधांचे प्रमाण तब्बल १०० टक्के आहे. जिल्ह्यात एकूण १,५३९ आंगणवाड्या मंजूर असून त्यापैकी सर्व १,५३९ अंगणवाड्या कार्यान्वित आहेत. या सर्व केंद्रांमध्ये शौचालयाची सुविधा उपलब्ध आहे. त्याचप्रमाणे सर्व अंगणवाड्यांमध्ये पिण्याचे पाणीही उपलब्ध असल्याचे या अहवालात नमूद करण्यात आले आहे. त्यामुळे शौचालय किंवा पाण्याची सुविधा नसलेली एकही आंगणवाडी जिल्ह्यात नाही ही जिल्ह्याच्या दृष्टीने आभिमानास्पद आणि कौतुकाची बाब आहे असे म्हणावे लागेल. तालुकानिहाय विचार करता सावंतवाडी २४७, कणकवली २४४, मालवण २२८, वैभववाडी १४७, कुडाळ २६८, वेंगुर्ला ९७, देवगड २०७ आणि दोडामार्ग १०१ आंगणवाडी केंद्रे आहेत. या आठही तालुक्यांतील प्रत्येक आंगणवाडीमध्ये शौचालय व पिण्याच्या पाण्याची सुविधा १०० टक्के उपलब्ध असल्याचे सर्व्हेक्षणात आढळून आले आहे. दरम्यान जिल्हा परिषदेच्या महिला व बाल कल्याण सभापती अनुराधा नारकर यांनी अलिकडेच दोडामार्ग आणि सावंतवाडी तालुक्यातील आंगणवाड्यांना भेटी दिल्या असून पोषण आहाराची तपासणी तसेच तेथील पिण्याच्या पाण्याची व्यवस्था, स्वच्छतागृह आदी व्यवस्थेची पाहणी करण्यात येत आहे. जि.प.चे मुख्य कार्यकारी अधिकारी रवींद्र खेबूडकर, महिला बालकल्याण अधिकारी प्रतीक उगारे हेही अंगणवाड्यांना भेटी देऊन एकूण व्यवस्थेची पाहणी करत आहेत. तालुकानिहाय आकडेवारीत कुडाळ तालुका २६८ अंगणवाड्यांसह प्रथम क्रमांकावर आहे. त्यानंतर सावंतवाडी (२४७), कणकवली (२४४), मालवण (२२८), देवगड (२०७), दोडामार्ग (१०१), वेंगुर्ला (९७) आणि वैभववाडी (१४७) अशी संख्या आहे. आंगणड्यांमध्ये येणाऱ्या बालकांसाठी आरोग्य, पोषण आणि पूर्वप्राथमिक शिक्षणाबरोबरच स्वच्छता व सुरक्षित पिण्याचे पाणी या मूलभूत सुविधा महत्त्वाच्या आहेत. या दोन्ही सुविधांबाबत जिल्ह्याची आकडेवारी शंभर टक्के असल्याने सिंधुदुर्गच्या अंगणवाडी व्यवस्थेतील ही सकारात्मक बाब ठरली आहे. सिंधुदुर्गातील १,५३९ अंगणवाड्यात १०,७७२ बालके असून ६३ अंगणवाड्यांची पटसंख्या शून्य आहे. ६८१ आंगणवाड्यांमध्ये पाचपेक्षा कमी मुले आहेत. जिल्ह्यातील आंगणवाड्यांच्या पटसंख्येची स्थिती पाहता अनेक आंगणवाड्यांमध्ये अत्यल्प मुले असल्याचे स्पष्ट झाले आहे. तब्बल ६३ आंगणवाड्यांमध्ये एकही मूल नाही, तर ६८१ आंगणवाड्यांमध्ये केवळ १ ते ५ मुले आहेत. जिल्ह्यात ४०१ आंगणवाड्यांची पटसंख्या ६ ते ९, तर ३३५ आंगणवाड्यांची पटसंख्या १० ते २० आहे. २० पेक्षा अधिक लाभार्थी असलेल्या ५१, तर ३० पेक्षा अधिक पटसंख्या असलेल्या आठ अंगणवाड्या आहेत. त्यामुळे काही ठिकाणी अत्यल्प पटसंख्या, तर काही आंगणवाड्यांमध्ये तुलनेने अधिक पटसंख्या असे चित्र दिसून येते. तालुकानिहाय विचार करता कुडाळमध्ये सर्वाधिक २६८ आंगणवाड्या असून तेथे २,१७८ मुले आहेत. सावंतवाडी तालुक्यात २४७ आंगणवाड्या व १,८१८ मुले, कणकवलीत २४४ आंगणवाड्या व १,९०९ मुले , तर देवगडमध्ये २०७ आंगणवाड्या व १,५२० मुले आहेत. मालवणमध्ये २२८ आंगणवाड्या असून ९९७ मुले आहेत. चौकट आंगणवाडीत ‘हिरकणी’ कक्ष सिंधुदुर्ग जिल्हा मुख्यालयाजवळ असलेल्या ओरोस देऊळवाडा इथल्या आंगणवाडीत तर गर्भवती मातांसाठी ‘हिरकणी ‘कक्ष आहे.या कक्षाला बरीच वर्ष झाली असून असा कक्ष असलेली ही जिह्यातील पहिलीच आंगणवाडी. ००००