डोबिंवलीतील कामगारांच्या मृत्यूस जबाबदार
फरार मालती मेहतांना नाशिकमध्ये अटक
ठाणे : डोंबिवली एमआयडीसीमध्ये झालेल्या स्फोटात ११ कामगारांच्या मृत्यूस जबाबदार असलेल्या या प्रकरणातील मुख्य आरोपी मालती मेहता यांना नाशिकमध्य पोलिसांनी अटक केली. मालती मेहता या अमुदान कंपनीच्या मालक असून स्फोट झाल्यापासून त्या फरार होत्या. नाशिकमधील मेहेरधाम परिसरातून पोलिसांनी त्यांना ताब्यात घेतलं आहे.
डोंबिवलीती ज्या रिअक्टरचा स्फोट झाला तो अनधिकृत होता असे आता समोर आले आहे. या स्फोटप्रकरणी कंपनीचे मालक मालती मेहता आणि मलय मेहतांवर सदोष मनुष्यवधाचा गुन्हा दाखल करण्यात आला आहे. डोंबिवलीतील रिअॅक्टर स्फोटात मृतांचा आकडा ११ वर पोहोचला आहे.
डोंबिवली येथील एमआयडीसीतील अमुदान स्फोटातील मुख्य आरोपी मालती मेहता या नाशिक असल्याची माहिती पोलिसांना मिळाली होती. त्यानुसार गुरूवारी रात्रीपासून नाशिक क्राईम ब्रांच युनिट एक आणि आणि ठाणे क्राईम ब्रांच पोलिसांनी संयुक्त पद्धतीने कारवाई करत त्यांना अटक केली आहे. डोंबिवलीमध्ये स्फोट झाल्यानंतर अमुदान कंपनीचे मालक हे फरार झाले होते. त्यामुळे पोलिसांनी तांत्रिक विश्षणाच्या आधारे त्यांच्या मोबाईलचे लोकेशन ट्रेस केलं आणि नाशिकमधून त्यांना शोधून काढलं. आरोपीवर सदोष मनुष्यवधाचा गुन्हा दाखल करण्यात आला आहे.
डोंबिवलीतील अमुदान कंपनीत रिअॅक्टरचा स्फोट झाल्यानं दुर्घटना झाल्याचं समोर आलं आहे. या कंपनीतील बॉयलरचा स्फोट झाल्याचं सुरूवातीला सांगण्यात येत होतं. पण नंतर अग्निशन दलाने या कंपनीत रिअॅक्टरचा स्फोट झाल्याचं स्पष्ट केलं आहे. डोंबिवली एमआयडीसीत 90 बॉयलर आहेत.
डोंबिवलीत केमिकल फॅक्ट्रीत झालेल्या स्फोटानंतर येथे रहिवाशांनी केमिकल कंपनी हटावची भूमिका घेतली आहे. केमिकलं कंपन्यांमुळे या भागात मोठ्या प्रमाणात नुकसान झाले आहे. आमच्याच जमिनी घेऊन त्यावर कंपन्या उभारल्या, मात्र त्याच कंपन्या आमचा गळा घोटत असल्याची प्रतिक्रिया स्थानिक रहिवाशांनी दिली.
डोंबिवलीत केमिकल फॅक्ट्रीत झालेल्या स्फोटानंतर स्थानिक रहिवाशांचे मोठं नुकसान झाले आहे. याचं सर्वेक्षण करण्यासाठी केडीएमसीचे कर्मचारी नुकसान झालेल्या रहिवाशी इमारतींची पाहणी करत आहेत.