नवी मुंबई : जलसंपन्न शहर म्हणून किर्ती असलेल्या नवी मुंबई महापालिकेत मोरबे धरणात कमी पाणीसाठा शिल्लक असल्याने पालिकेला ऐन उन्हाळ्यात विभागवार पाणीकपात करावी लागली होती. परंतु मागील काही दिवसात झालेल्या दमदार पावसामुळे आठवड्यापूर्वीच शहरातील पाणीकपात रद्द करण्यात आली आहे. तर मोरबे धरणक्षेत्रात चांगला पाऊस पडत असल्याने मोरबे धरण ९० टक्क्याहून अधिक भरले आहे. गेल्यावर्षी धरण भरण्यासाठी सप्टेंबर उजाडला होता.परंतु यावर्षी पुढील काही दिवसात चांगला पाऊस झाला तर सुमारे ७०० मिमी पाऊस पडल्यास धरण याच महिन्यात भरण्याची शक्यता वर्तवण्यात येत आहे.
नवी मुंबई महापालिका क्षेत्राला पाणीपुरवठा करणाऱ्या मोरबे धरणाची पाणीपातळी मार्च एप्रिलमध्येच झपाट्याने खाली गेली होती. तसेच दुसरीकडे पावसाने ओढ दिल्याने पाणीचिंताही वाढली होती. यंदाच्या पावसाळ्यात ९ जूनपासून पावसाला सुरुवात झाली. परंतु पावसाळा सुरू होऊनही १५ जूनपर्यंत मोरबे धरण परिसरात फक्त ७८. ६० मिमी एवढ्याच पावसाची नोंद झाली होती. त्यामुळे मोरबे धरणात केवळ २६ इतकाच पाणी साठा शिल्लक होता. त्यामुळे नवी मुंबई महानगरपालिका क्षेत्रामध्ये पाणीपुरवठा करताना संध्याकाळच्या पाणी पुरवठयात पालिकेने वाढीव कपात केली होती.
नवी मुंबई महापालिकेला पाणीपुरवठा करणाऱ्या मोरबे धरणात मागील काही दिवसापासून चांगला पाऊस झाल्याने धरणात चांगला पाणीसाठा उपलब्ध झाला आहे. असाच सलग पाऊस पडत राहिल्यास व जवळजवळ ७०० मिमी अजून पाऊस पडल्यास यंदा धरण लवकर भरेल. सध्या मोरबे धरण ९० टक्क्यांपेक्षा अधिक भरले आहे. – अरविंद शिंदे, अतिरिक्त शहर अभियंता
00000