एआयएमआयएमचे पदाधिकारी आले ॲक्टीव्ह मोडवर
राज भंडारी
नवी मुंबई : उलवे नोड हा नवी मुंबई, उरण आणि पनवेलला जोडला गेलेला परिसर आहे. याठिकाणी स्मार्ट मेगा सिटीचे आयोजन सिडकोमार्फत करण्यात आले असले तरी येथील सोयी सुविधांचा अभाव मोठ्या प्रमाणावर पाहायला मिळत आहे. याच अडचणींचा सामना सर्वधर्मीय बांधवांना करावा लागत आहे. यासाठीच एआयएमआयएमचे विद्यार्थी संघटनेचे प्रदेश अध्यक्ष कुणाल खरात आणि विद्यार्थी आघाडीचे महाराष्ट्र महासचिव तथा कोकण विभाग प्रभारी हाजी शाहनवाज खान यांनी मुंबई येथील मंत्रालयात झालेल्या मीटिंगमध्ये हे मुद्दे समोर आणून तत्काळ सिडकोला निर्देश देण्याची मागणी केली आहे.
उलवेमधील हिंदू, मुस्लिम, बौध्द आणि ख्रिश्चन रहीवाशांना घरात अथवा नातलगांचे मयत झाल्यास नेरूळ सेक्टर चार या ठिकाणी अंत्यिवधीसाठी मृतदेह घेवून जावे लागते. हिंदू लोकांना उलवेमध्ये स्मशानभूमी उपलब्ध असली तरी ती ब्रिटीशकालीन स्मशानभूमी आहे. तिथे कोणत्याही प्रकारच्या सुविधा नाहीत. त्यामुळे या ठिकाणी हिंदू, मुस्लिम आणि ख्रिश्चन बांधवांसाठी अंत्यविधीचे क्रियाकर्म करण्यासाठी सुविधायुक्त स्मशानभूमी ही नेरूळ येथेच आहे. त्यामुळे अशा धर्तीवर सिडकोमर्फत उलवेमध्ये हिंदू, मुस्लिम आणि ख्रिश्चन बांधवांसाठी स्मशानभूमी तसेच कब्रस्तान लवकरात लवकर उपलब्ध करून देण्याची मागणी यावेळी करण्यात आली.
उलवे परिसरात असंख्य नागरिक हे बाहेरून राहायला आले आहेत. या ठिकाणी रहिवास करणाऱ्या सर्वधर्मियांना प्रार्थनास्थळेही उपलब्ध नाहीत. मुस्लिम बांधवांना उलव्यात मशिद नसल्याने नमाज पढण्यासाठी नेरूळमध्ये जावे लागते. तिच परिस्थिती ख्रिश्चन बांधवांचीही आहे. त्यांना चर्चमध्ये प्रार्थना करण्यासाठी नेरूळ-सिवूडस या ठिकाणी जावे लागते. त्यामुळे सिडकोने हिंदूंच्या मंदिरासाठी, मुस्लिमांच्या मशिदीसाठी आणि ख्रिश्चन बांधवांच्या चर्चसाठी तसेच बुद्ध धर्मियांच्या बुध्द विहारासाठी स्वतंत्ररित्या भुखंड उपलब्ध करून द्यावेत अशीही मागणी यावेळी करण्यात आली.
यावेळी सदर मागणीमध्ये प्रामुख्याने केलेल्या मागणीमध्ये सिडकोने उलवे तसेच भोवतालच्या परिसरात भुखंड विक्री करण्यास बंदी आणून नागरिकांच्या नागरी सुविधांना प्राधान्य देण्याचे ठणकावून सांगितले पाहिजे, तसेच उलवे परिसरात वास्तव्यास येणाऱ्या आणि आलेल्या नागरिकांसाठी अंत्यविधीकरता स्मशानभूमी तसेच दफनभूमी आणि मशिद, मंदिर, चर्चसह बुध्दविहारासाठी भुखंड उपलब्ध करून देण्याचे सिडकोला तातडीने निर्देश द्यावे, अशी मागणीही यावेळी करण्यात आली.