५१वी कुमार/कुमारी गट राज्य अजिंक्यपद निवड चाचणी कबड्डी स्पर्धा, सांगलीवाडी, सांगली -२०२४-२५
गत विजेता पिंपरी-चिंचवड, अहमदनगर, पुणे ग्रामीण, ठाणे शहर यांनी कुमारी गटाची उपांत्य फेरी गाठली
सांगली:- गत विजेत्या पिंपरी-चिंचवड सह अहमदनगर, पुणे ग्रामीण यांनी ५१व्या कुमार/कुमारी गट राज्य अजिंक्यपद निवड चाचणी कबड्डी स्पर्धेच्या कुमारी गटाची उपांत्य फेरी गाठली. ठाणे शहरला मात्र उपांत्य फेरी गाठण्या करीता ५-५ चढायांचा डावापर्यंत झुंजाव लागले. पिंपरी-चिंचवड विरुध्द अहमदनगर, पुणे ग्रामीण विरुध्द ठाणे शहर अशा उपांत्य लढती दिनांक १जानेवारी रोजी सायंकाळी होतील. महाराष्ट्र राज्य कबड्डी असो. च्या मान्यतेने सांगली जिल्हा कबड्डी असो.ने युवक मराठा मंडळाच्या सहकार्याने या स्पर्धेचे आयोजन केले आहे. राज्य संघटनेचे उपाध्यक्ष व माजी आमदार दिनकर तात्या पाटील यांच्या वाढदिवसानिमित्त सांगली, सांगलीवाडी येथील चिंचबाग मैदानावर सुरू असलेल्या उपांत्यपूर्व सामन्यात पिंपरी-चिंचवडने नाशिक ग्रामीणचा ३७-१९ असा पराभव केला. आक्रमक सुरुवात करीत पहिला लोण देत २३-१० अशी पहिल्या डावात आघाडी घेणाऱ्या पिंपरी-चिंचवडने दुसऱ्या डावात देखील आणखी एक लोण देत सामना आपल्या नावे केला. रुपाली डोंगरे, पूजा तेलंग यांच्या दमदार चढाया त्याला संचिता यादव, भूमिका गोरे यांच्या भक्कम बचावाची मिळालेली साथ यामुळेच पिंपरी-चिंचवड संघाला १८ गुणांच्या फरकाने विजय मिळविता आला. नाशिक ग्रामीणच्या अनवी नागरे, सेजल काकडे यांची मात्रा या सामन्यात चालली नाही.
दुसऱ्या सामन्यात अहमदनगरने मुंबई शहर पूर्व वर ४५-१३ असा सहज विजय मिळविला. पूर्वार्धात २लोण देत २३-०६ अशी आघाडी घेणाऱ्या नगरने उत्तरार्धाच्या खेळात देखील आणखी दोन लोण देत ३२ गुणांच्या फरकाने सामना आपल्या खिशात टाकला. वैष्णवी काळे कार्तिकी फडतरे यांच्या झंझावाती खेळामुळे हा मोठा विजय शक्य झाला. मुंबई शहरची अदिती काविळकर बरी खेळली. पुणे ग्रामीणने जालनाचा दुबळा प्रतिकार ५१-१३ असा संपविला. मध्यांतरापर्यंत २लोण देत २५-०८ अशी आघाडी घेत पुणे ग्रामीणने विजयाचा भक्कम पाया रचला. मध्यांतरानंतर आणखी २लोण देत आपल्या विजयावर शिक्कामोर्तब केले. वैष्णवी जाधव, साक्षी रावडे यांच्या भन्नाट खेळाला याचे श्रेय जाते. जालनाची मोनिका पवार चमकली.
ठाणे ग्रामीणने ५-५ चढायांच्या डावात परभणीच्या कडवा प्रतिकार ३८-३४ असा मोडून काढत उपांत्य फेरी गाठली. पहिल्या डावात १०-१८ अशा गुणांनी पिछाडीवर पडलेल्या ठाण्याने पूर्ण डावात परभणीला २९-२९ असे रोखले. नंतर ५-५ चढायात ९ गुण घेत बाजी मारली. परभणीने दुसऱ्या डावात लोण देत व पूर्ण डावात ४ बोनस करीत शर्थीचे लढत दिली. परंतु ठाण्याने पूर्ण डावात ११ बोनस गुणाची कमाई करीत सामन्यात बरोबरी साधली. वेदिका वावेकर, ऐश्वर्या राऊत यांच्या जोशपूर्ण खेळाला या विजयाचे श्रेय जाते. परभणीच्या गौरी दाहे, नंदिता गोटे यांनी शेवटच्या क्षणापर्यंत शर्थीची लढत दिली.
या अगोदर झालेल्या उपउपांत्यपूर्व फेरीच्या सामन्यांचा निकाल :-१)पिंपरी-चिंचवड वि. वि. मुंबई शहर पश्र्चिम(३४-२४), २)नाशिक ग्रामीण वि. वि. नंदुरबार (३९-३७), ३)अहमदनगर वि. वि. पुणे शहर (३५-३४), ४)मुंबई शहर पूर्व वि. वि. मुंबई उपनगर पूर्व (२३-२१), ५)पुणे ग्रामीण वि. वि. रायगड (४९-१२), ६)जालना वि. वि. सांगली (३९-३७), ७)ठाणे शहर वि. वि. पारघर (४२-३९), ८)परभणी वि. वि. कोल्हापूर (३१-२४).