ठाणे : नवी_मुंबई, पालघर, मुरबाड, धुळे_शहर, धुळे_ग्रामीण, साक्री, परभणी येथील उबाठा गटातील विविध पदाधिकाऱ्यांनी आज ठाण्यातील आनंदआश्रमात येऊन शिवसेना पक्षात जाहीर प्रवेश केला. यावेळी शिवसेनेत इनकमिंग करणाऱ्यांचे स्वागत करून त्यांना भावी सामाजिक आणि राजकीय वाटचालीसाठी उपमुख्यमंत्री एकनाथ शिंदे यांनी शुभेच्छा दिल्या.
प्रवेशकर्त्यांमध्ये नवी मुंबई शहरातील उबाठा गटाचे जिल्हाप्रमुख आणि नवी मुंबई महानगरपालिकेचे माजी नगरसेवक द्वारकानाथ भोईर, माजी नगरसेवक विजयानंद माने, माजी नगरसेविका मेघाली राऊत, शिवसेना उबाठा गटाचे कोपरखैरणेचे विभागप्रमुख मधुकर राऊत आणि अन्य पदाधिकाऱ्यांचा समावेश होता.
पालघरच्या माजी नगराध्यक्षा प्रियांका पाटील, माजी नगरसेविका दीपा पामळे, उबाठा शहरप्रमुख प्रवीण पाटील, माजी नगरसेवक तुषार भानुशाली, माजी उपनगराध्यक्ष रवींद्र पाटील, युवासेना शहर संघटक निमिष पाटील तसेच डहाणूतील आदिवासींच्या प्रश्नांसाठी झटणारे युवा एल्गार संघटनेचे अध्यक्ष विराज गडग यांनीही आज प्रवेश केला.
याशिवाय धुळे जिल्ह्याचे माजी जिल्हाप्रमुख हिलाल माळी, संदीप चव्हाण, चंद्रकांत मस्के, मनीषा शिरोळे, आधार हाके आदी पदाधिकारी, तर धुळे शहरातील माजी नगरसेवक नंदलाल फुलपगारे, चुडामण मोरे, पुरुषोत्तम जाधव, शेखर दुधाने, धुळे ग्रामीण विभागातील संजय माळी, सुधाकर पाटील, किशोर माळी, किशोर देवरे साक्री शहरातील महावीर जैन, नितीन गायकवाड, महेश खैरनार, हर्षल माळी तसेच धुळे शहरातील युवासेनेच्या असंख्य पदाधिकाऱ्यांनी देखील शिवसेनेमध्ये प्रवेश केला.
उबाठा गटाचे प्रमुख निवडणुकीपूर्वी आता आम्ही जनतेच्या न्यायालयात दाद मागणार असून जनताच ठरवेल शिवसेना कुणाची ते असे म्हणाले होते. मात्र विधानसभा निवडणुकीत जनतेने दाखवून दिले की खरी शिवसेना कुणाची आहे ते. आपल्या पक्षाचे ५७ उमेदवार आणि ३ सहयोगी पक्षाचे असे ६० आमदार निवडून आले. त्यानंतर आता मोठ्या प्रमाणावर राज्यभरातून पक्षात येण्यासाठी कार्यकर्त्यांचा ओघ सुरू झाला असून त्यामुळेच हे पक्षप्रवेश होत असल्याचे मत याप्रसंगी शिंदे यांनी व्यक्त केले.
यावेळी खासदार नरेश म्हस्के, आमदार राजेंद्र गावित, माजी आमदार रवींद्र फाटक, शिवसेना सचिव आणि उत्तर महाराष्ट्र संपर्कप्रमुख भाऊ चौधरी, माजी नगरसेवक राम रेपाळे, नवी मुंबई महानगरपालिकेचे माजी विरोधी पक्षनेते विजय चौगुले, पालघरचे जिल्हाप्रमुख कुंदन संख्ये, उपनेत्या ज्योती मेहेर, जिल्हा संघटिका वैदेही वाढाण, उपनगराध्यक्ष उत्तम घरत आणि शिवसेनेचे सर्व प्रमुख पदाधिकारी आणि कार्यकर्ते मोठ्या संख्येने उपस्थित होते.