नारायणगाव : पुणे-नाशिक महामार्गावरील नारायणगावजवळ भीषण अपघातात ९ जणांचा मृत्यू झाला आहे. यात चार महिला, चार पुरुष आणि एका बाळाचा जागीच मृत्यू झाला आहे. अपघाताची माहिती मिळताच स्थानिक नागरिक आणि पोलिसांनी घटनास्थळी धाव घेत जखमींना तात्काळ खासगी आणि शासकीय रुग्णालयात दाखल केले आहे. जखमींवर सध्या रुग्णालयात उपचार सुरु आहेत.
याबाबत मिळालेल्या माहितीनुसार, पुणे-नाशिक महामार्गावरील नारायणगावजवळ आज सकाळी दहा वाजेच्या सुमारास भीषण अपघात झाला. प्रवासी वाहतूक करणाऱ्या मॅक्स ऑटो गाडीला पाठीमागून आयशर टेम्पोने जोरदार धडक दिली. यामुळे मॅक्स ऑटो ही चेंडूप्रमाणे हवेत फेकली गेली आणि पुढे एक ब्रेक फेल झालेली एसटी रस्त्याच्या बाजूला उभी होती. त्या एसटीवर जाऊन मॅक्स ऑटो आदळली. या अपघातात आयशर आणि मॅक्स ऑटोचा अक्षरशः चुराडा झाला आहे.
मृतांच्या वारसांना पाच लाखांची मदत
या अपघातात मृत्यू झालेल्या नागरिकांनाप्रती मुख्यमंत्र्यांनी शोक व्यक्त केला आहे. तर त्यांनी मृतांच्या वारसांना ५ लाख रुपये आर्थिक सहाय्य देणार असल्याची माहिती दिली आहे. याबाबतची पोस्ट त्यांनी सोशल मिडियावर शेअर केली आहे. “पुणे-नाशिक महामार्गावर नारायणगाव जवळ झालेल्या भीषण अपघातात 9 कामगारांचा मृत्यू झाल्याची घटना अतिशय दुर्दैवी आहे. मी त्यांना भावपूर्ण श्रद्धांजली अर्पण करतो. त्यांच्या कुटुंबियांच्या दुःखात आम्ही सहभागी आहोत. जखमींच्या प्रकृतीत लवकर सुधारणा व्हावी, अशी प्रार्थना करतो. मृतांच्या वारसांना 5 लाख रुपये आर्थिक सहाय्य मुख्यमंत्री सहायता निधीतून करण्यात येईल. जखमींच्या उपचाराची योग्य काळजी घ्या, असे मी पुणे पोलिस अधीक्षक यांना सांगितले आहे”, असं फडणवीस यांनी म्हटलं आहे.