एक रौप्य व एक कास्यपदकाची कमाई
रूद्रपूर : महाराष्ट्राने ३८व्या राष्ट्रीय क्रीडा स्पर्धेत सायकलिंगमधील पदकांची मालिका कायम राखताना आज महिला गटात एक रौप्य आणि एक कांस्यपदक जिंकले.
महिलांच्या चार किलोमीटर अंतराच्या सांघिक कौशल्य स्पर्धेत महाराष्ट्राला कांस्यपदक मिळाले. या संघात वैष्णवी गाभणे संस्कृती खेसे, सिया ललवाणी व पूजा दानोळी यांचा समावेश होता. महाराष्ट्राने ही शर्यत पाच मिनिटे ३२.६४३ सेकंदात पार केली. हरियाणा (पाच मिनिटे २६.९२० सेकंद) व ओडिशा (पाच मिनिटे ३०.४२३ सेकंद) यांनी अनुक्रमे सुवर्ण व रौप्य पदक जिंकले. महाराष्ट्राच्या श्वेता गुंजाळ हिने पाच फेऱ्यांचा समावेश असलेल्या ‘केरीन’ सायकलिंग या क्रीडा प्रकारात रौप्यपदक पटकाविले.
टेनिसमध्ये महाराष्ट्र उपांत्य फेरीत
डेहराडून : महाराष्ट्राने दिल्लीचा २-१ असा पराभव केला आणि ३८व्या राष्ट्रीय क्रीडा स्पर्धेत पुरुषांच्या सांघिक टेनिसमध्ये उपांत्य फेरी गाठली. त्यावेळी महाराष्ट्राच्या अर्णव पापरकर याने एकेरीच्या पहिल्या लढतीत शिवांग भटनागर याचा ६-१, ३-६, ६-२ असा पराभव केला. मात्र, पुढच्या लढतीत महाराष्ट्राच्या प्रसाद इंगळे याला सुदिन सार्थक याच्याकडून ५-७, ७-५ १-६ असा पराभव पत्करावा लागला. त्यामुळे या लढतीत १-१ अशी बरोबरी झाली. दुहेरीच्या लढतीत प्रसाद इंगळे याने संदेश कुरळे याच्या साथीत रोहन मेहरा व सार्थक सुदिन यांच्यावर ७-६(७/५), ७-६(८/६) अशी मात केली. आणि महाराष्ट्राच्या विजयावर शिक्कामोर्तब केले.