ठाणे जिल्हा खुली बॅडमिंटन स्पर्धा
१६ पदकांसह ज्युनियर खेळाडूंचा पोडियमवर जल्लोष
डोंबिवली : येथे उत्साहपूर्ण वातावरणात पार पडलेल्या ठाणे जिल्हा खुल्या बॅडमिंटन स्पर्धा २०२५ मध्ये ठाणे बॅडमिंटन अकॅडमीच्या खेळाडूंनी सर्व वयोगटांत उत्कृष्ट सातत्य, आत्मविश्वास आणि तांत्रिक परिपक्वतेचे दर्शन घडवत एकूण १६ पदकांची भरीव कमाई केली. विशेष म्हणजे या स्पर्धेत अकॅडमीतील ज्युनियर खेळाडूंनी पोडियमवर ठळक छाप उमटवत ठाण्यातील बॅडमिंटन विकासाची ताकद पुन्हा एकदा अधोरेखित केली.
९ वर्षांखालील मुलांच्या एकेरी गटात पर्ण वाणीने अत्यंत परिपक्व आणि आक्रमक खेळ सादर करत सुवर्णपदक पटकावले, तर इधांत मुळेयने दमदार संघर्ष करत रौप्यपदक मिळवले. अंतिम सामन्यात दोन उदयोन्मुख खेळाडूंमधील लढत लक्षवेधी ठरली. पर्णने १५–८, १५–८ असा सरळ गेममध्ये विजय मिळवत आपली गुणवत्ता सिद्ध केली. ९ वर्षांखालील मुलींच्या एकेरी गटात आपल्या कारकिर्दीतील पहिल्याच स्पर्धेत उतरलेल्या निष्ठा मिस्त्री हिने विलक्षण संयम, जिद्द आणि आत्मविश्वास दाखवत निश्का शहा हिच्यावर १६–१४, १३–१५, १५–८ असा थरारक विजय मिळवून सुवर्णपदक पटकावले. निर्णायक क्षणांतील तिचे स्थैर्य उपस्थितांचे विशेष लक्ष वेधून घेणारे ठरले.
११ वर्षांखालील मुलांच्या एकेरी गटात योहान नायरने सातत्यपूर्ण खेळाच्या जोरावर रौप्यपदक मिळवले, तर ध्रुव सालगावकर आणि विहान गायकवाड यांनी कांस्यपदक पटकावून अकॅडमीच्या यशात मोलाची भर घातली. ११ वर्षांखालील मुलींच्या एकेरी गटात अद्विका मोरे हिने शिस्तबद्ध आणि संयमी खेळ करत रौप्यपदक जिंकले.
१३ वर्षांखालील मुलांच्या एकेरी गटात यज्ञेश वारघडेने जिद्दीची आणि चिकाटीची झलक दाखवत कांस्यपदक पटकावले. १३ वर्षांखालील मुलींच्या एकेरी गटात प्रांजल पाटील हिने ठाणे बॅडमिंटन अकॅडमीच्याच अभिलाषा शिरगावकर हिच्यावर १५–५, १५–६ असा ठसठशीत विजय मिळवत सुवर्णपदक जिंकले, तर याच गटात मेहा शहा हिने कांस्यपदकाची कमाई केली.
१५ वर्षांखालील मुलांच्या एकेरी गटात आर्यन चौधरीने आत्मविश्वासपूर्ण आणि संतुलित खेळ सादर करत रौप्यपदक मिळवले. मात्र या स्पर्धेचा सर्वात उजळ क्षण ठरला तो १५ वर्षांखालील मुलींच्या एकेरी गटातील ऐतिहासिक कामगिरी. ठाणे बॅडमिंटन अकॅडमीच्या खेळाडूंनी या गटातील सर्व पदकांवर निर्विवाद वर्चस्व मिळवत उपस्थित प्रेक्षकांसह क्रीडावर्तुळाचे लक्ष वेधून घेतले.
अंवी मोरे हिने अत्यंत परिपक्व खेळ करत सुवर्णपदक पटकावले, राधा रावरणे हिने सातत्यपूर्ण लढत देत रौप्यपदक जिंकले, तर अभिलाषा शिरगावकर आणि शुभ्रा कुलकर्णी यांनी कांस्यपदकांची कमाई करत अकॅडमीचा झेंडा उंचावला. या गटातील खेळाडूंनी दाखवलेली आत्मविश्वासपूर्ण वृत्ती, तांत्रिक धार आणि जिंकण्याची मानसिकता ही अकॅडमीच्या उत्कृष्ट प्रशिक्षण व्यवस्थेचे जिवंत उदाहरण ठरली.
या भरीव यशामागे ठाणे बॅडमिंटन अकॅडमीचे संचालक व मुख्य प्रशिक्षक श्रीकांत वाड, वरिष्ठ प्रशिक्षक मयूर घाटणेकर, अक्षय देवलकर, मितेश हाजिरनीस आणि राजीव गणपुले तसेच प्रशिक्षक टीममधील प्रसेनजीत शिरोडकर, एकेंद्र दर्जी, फुलचंद पासी, अमित गोडबोले, वेदांत जवंजाळ, नरेंद्र वर्मा, सुरेंद्र दिवेकर, संजय कांबळे, नरेश गुंडले, ऋषिकेश जोगळेकर, देवांग दलाल आणि देवांग दलाल यांच्या सातत्यपूर्ण तांत्रिक मार्गदर्शन, नियोजनबद्ध सराव आणि खेळाडू-केंद्रित प्रशिक्षणाचा मोठा वाटा आहे. त्यांच्या संयुक्त प्रयत्नांमुळेच लहान वयोगटातील खेळाडू इतक्या आत्मविश्वासाने आणि परिपक्वतेने कामगिरी करताना दिसून आले.
या १६ पदकांच्या उल्लेखनीय यशामुळे ठाणे बॅडमिंटन अकॅडमीची ज्युनियर विकासातील भक्कम ओळख अधिक दृढ झाली असून, आगामी काळात हेच खेळाडू राज्य व राष्ट्रीय पातळीवर ठाण्याचे नाव अधिक उज्ज्वल करतील, असा विश्वास क्रीडावर्तुळातून व्यक्त केला जात आहे.