शिंदेंच्या ठाण्यात बेदिली माजली
माजी महापौर मीनाक्षी शिंदेंचा तडकाफडकी राजीनामा
सिद्धेश शिगवण
ठाणे : एकनाथ शिंदेंचे ठाणे आणि ठाण्याचे एकनाथ शिंदे असे समिकरण जणू बनून गेले होते पण आता शिंदेंच्या याच ठाण्यात पक्षांतर्गत माजलेल्या बेदीलीतून माजी महापौर मीनाक्षी शिंदे यांनी तडकाफडकी राजीनामा दिला आहे. ठाणे महापालिका निवडणूक तोंडावर असतानाच शिवसेना शिंदे गटात मोठा अंतर्गत वाद उफाळून आला आहे.
सध्याच्या राजकीय परिस्थितीमुळे या पदावर काम करणे शक्य नसल्याचं कारण त्यांनी जाहीर केलं असलं, तरी शिवसेना शिंदे गटात अंतर्गत मोठं राजकारण शिजत असल्याची जोरदार चर्चा आहे.
ठाणे महापालिकेच्या प्रभाग क्रमांक ३ मध्ये बाहेरील उमेदवार नको, फक्त स्थानिक पदाधिकाऱ्यांना संधी द्या, अशी मागणी येथील शाखाप्रमुख विक्रांत वायचळ यांनी वरिष्ठाकडे केली होती. या ठिकाणी बाळकुमच्या भूषण भोईर यांचा दावा आहे. दरम्यान, पक्षविरोधी कार्य केल्याचा ठपका ठेवत विक्रांत वायचळ यांची पक्षातून हकालपट्टी करण्यात आली. मात्र विश्वासात न घेता वायचळ याची हकालपट्टी करण्यात आल्याने संतापलेल्या मीनाक्षी शिंदे यांनी तडकाफडकी आपल्या पदांचा राजीनामा दिला.
शाखाप्रमुख विक्रांत वायचळ हे मीनाक्षी शिंदे यांचे निकटवर्तीय कार्यकर्ते समजले जातात. वायचळ यांची थेट पक्षातुन हकालपट्टी करण्यात आली. त्यामुळेच मीनाक्षी शिंदे नाराज असल्याचे बोलले जात आहे. ऐन पालिका निवडणुकीत पक्षातील वाद चव्हाट्यावर आणल्याने वरिष्ठांची डोकेदुखी वाढली आहे.
कार्यकर्त्यांची नाराजी दूर करण्यासाठी शिंदे राज्यभर दौरा करत असताना ठाण्यात शिंदे गटाची धुरा सांभाळणाऱ्या तथाकथित नेत्यांची हुकूमशाही सुरू असल्याचा आरोप शिवसैनिक करीत आहेत. त्याचीच परिणीती नाराजीनाट्यात झाल्याची चर्चा राजकीय वर्तुळात सुरु झाली आहे.