परेश रावल यांनी ‘नाट्य रतन’मध्ये रतन टाटा यांना वाहिली भावपूर्ण श्रद्धांजली
राजेंद्र साळसकर
मुंबई: – देशातील नामवंत उद्योगपती व समाजसेवक स्वर्गीय रतन टाटा यांच्या जयंतीनिमित्त २८ डिसेंबर २०२५ रोजी संस्थापक अभिषेक नारायण यांच्या संकल्पनेतून आयोजित करण्यात आलेल्या बहुभाषिक आंतरराष्ट्रीय रंगमंच महोत्सव ‘नाट्य रतन’ चा समारोप मोठ्या उत्साहात पार पडला. या समारोप सोहळ्यासाठी विशेष अतिथी म्हणून सुप्रसिद्ध अभिनेते परेश रावल उपस्थित होते. यावेळी त्यांनी रतन टाटा यांना मनापासून श्रद्धांजली अर्पण केली.
परेश रावल यांनी या प्रसंगी नाटक “पॉपकॉर्न” पाहिले. या नाटकातील कलाकार आनंद इंगळे, अंबर गालपुडे, गायत्री देशपांडे, दीप्ती लेले, श्रीकर पित्रे, सचिन जोशी, नितीन अग्निहोत्री आणि अर्णव वॉरियर यांच्या अभिनयाचे त्यांनी विशेष कौतुक केले.
यावेळी बोलताना परेश रावल म्हणाले, “अशा प्रकारचे रंगमंचीय महोत्सव यशस्वी होतात ही अत्यंत आनंदाची बाब आहे. रतन टाटा यांना समर्पित ‘नाट्य रतन’ उपक्रमाची, मी स्वतः एक थिएटर कलाकार म्हणून, मनापासून प्रशंसा करतो. अशा उपक्रमांमुळे कलाकारांचा आत्मविश्वास वाढतो आणि प्रेक्षकांना दर्जेदार व नावीन्यपूर्ण नाटके पाहण्याची संधी मिळते.”
कारवाँ थिएटर ग्रुप, मुंबई यांच्या वतीने सादर करण्यात आलेल्या आणि Curated Classics यांच्या सहकार्याने आयोजित करण्यात आलेल्या ‘नाट्य रतन सीझन 1’ या बहुभाषिक आंतरराष्ट्रीय रंगमंच महोत्सवाचे आयोजन २५ ते २८ डिसेंबर २०२५ या कालावधीत मुंबईतील प्रतिष्ठित यशवंत नाट्य मंदिर, माटुंगा (पश्चिम) येथे करण्यात आले होते. महोत्सवाची सुरुवात मकरंद देशपांडे यांच्या नाटकाने झाली, तर समारोप परेश रावल यांच्या उपस्थितीत झाला.
नाट्य रतन आणि कारवाँ थिएटर ग्रुपचे संस्थापक अभिषेक नारायण यांनी सांगितले, “स्वर्गीय रतन टाटा यांच्या जयंतीनिमित्त ‘नाट्य रतन’चे यशस्वी आयोजन करता आले, याचा आम्हाला विशेष अभिमान आहे. हा महोत्सव त्या महान व्यक्तिमत्त्वाच्या विचारांना समर्पित एक भावनिक रंगमंचीय श्रद्धांजली होती. या उपक्रमात सहभागी झालेल्या सर्व मान्यवर पाहुण्यांचे, कलाकारांचे आणि प्रेक्षकांचे मी मनःपूर्वक आभार मानतो. या यशामुळे आम्हाला भविष्यात अधिक मोठ्या स्वरूपात काम करण्याची प्रेरणा मिळाली आहे. ‘नाट्य रतन’ हा वार्षिक रंगमंच महोत्सव म्हणून विकसित करण्याचा आमचा मानस असून, भारतीय रंगमंचाच्या माध्यमातून श्री. रतन टाटा यांच्या स्मृती व वारसा यांना सातत्याने आदरांजली अर्पण करणे हेच आमचे उद्दिष्ट आहे.”
चार दिवस चाललेल्या या रंगमंच महोत्सवात हिंदी, मराठी आणि इंग्रजी भाषांतील एकूण 12 नाटकांचे सादरीकरण झाले. अभिषेक नारायण यांच्या संकल्पनेतून साकारलेल्या ‘नाट्य रतन’ला अस्तित्व आणि MumbaiTheatreGuide.com यांचे सहकार्य लाभले. रंगमंचप्रेमी, कलाकार, विचारवंत आणि सांस्कृतिक क्षेत्रातील मान्यवरांना एकत्र आणणारा हा महोत्सव सामाजिक जाणिवा जपणाऱ्या अर्थपूर्ण रंगमंचाचा उत्सव ठरला.