पिंपरी चिंचवड : कालचे दोस्त आज दृष्मन झालेत… अशी स्थिती सध्या महानगर पालिकेच्या निवडणूकीत दिसून येतेय. राज्यात युतीत सत्तेत असतनाही अजित पवारांची राष्ट्रवादी पिंपरीत भाजपाविरोधात लढतेय. आणि तेही चक्क विरोधातील शरद पवारांच्या राष्ट्रवादीला सोबत घेऊन. हे इथवरच थांबले नाही तर भाजपाची राक्षसी भुक पाहवत नाही अशी जहरी टिका करतानाच भाजपच्या कार्यकाळात पिंपरी चिंचवड महापालिका कर्जबाजारी झाल्याचा आरोप केला. शहरात लुटारुंची टोळी दिवसाढवळ्या वावरतेय, असं अजित पवार म्हणाले. याच पत्रकार परिषदेत राष्ट्रवादीच्या माध्यमातून शरद पवार विकासकामं केल्याचं अजित पवारांनी सांगितलं.
अजित पवार म्हणाले २०१७ मध्ये मोदी लाट आली आणि अनेक जण बाजूला गेले. १९९२ ते २०१७ पर्यंत मी पिंपरी चिंचवड शहराचा कायापालट केला. हवा तो विकास केला. मात्र २०१७ पूर्वी पिंपरी पालिकेच्या ४८४४ कोटी होत्या. आज या ठेवी २००० कोटींवर आल्यात. मुळात या ठेवी वाढायला हव्या होत्या. इतकंच नव्हे तर कर्ज रोखे काढून कोट्यवधी कर्ज केलं. आता एवढा पैसा खर्च केला तर मग काम दाखवा ना?, असा सवाल अजित पवारांनी केला.
गेल्या नऊ वर्षात भाजपच्या सत्ता काळात भकास विकास झालाय. टेंडर मध्ये रिंग केली जाते, दादागिरी केली जाते. मी पुरावे देईन. पुराव्या शिवाय मी बोलणार नाही, कोणावर बिनबुडाचे आरोप करणार नाही, असं अजित पवार म्हणाले. अजित पवारांचा रोख भाजपा आमदार महेश लांडगेंवर होता. सत्तेची मस्ती, माज आणि नशा आलीये अशा शब्दात अजित पवारांनी टीकास्त्र सोडलं. कुत्र्याच्या नसबंदीत ही पैसे खाल्ले, अरे कशात पण पैसे खाल्लेत अशी टिका अजित पवारांनी केली.
स्थायी समितीचे अध्यक्ष असताना नितीन लांडगे यांना अटक केली. महापालिकेच्या इतिहासात असं कधी घडलं नव्हतं. पण, भाजपच्या सत्ताकाळात हे घडलं.पिंपरीत खोदाई माफिया झालेत. आजवर लँड माफिया, भंगार माफिया आता पिंपरी चिंचवड मध्ये खोदाई माफिया फोफावली आहे. जिओ, एअरटेल, व्होडाफोन अशा कंपन्या राजरोसपणे खड्डे खणतात. शहरात लुटारूंची टोळी दिवसाढवळ्या वावरत आहे, असा आरोप अजित पवारांनी केला.