पराभूत झाला तरी, संपूर्ण ताकदीने नडला !
पनवेल : राज भंडारी उरण 190 विधानसभेत शेकाप आघाडीची 2019 मध्ये 60,000 पेक्षा अधिक मते असताना, चार महिन्यातच उरणमध्ये जोरदार मुसंडी मारून एकट्या शेतकरी कामगार पक्षाचा मतांचा आकडा ८८००० हा प्रितमदादांनी पार केला.
प्रितमदादांच्या विरोधात भाजपने पंतप्रधान नरेंद्र मोदी, केंद्रीय मंत्री नितीन गडकरी, देवेंद्र फडणवीस यांच्या सभा घेतल्या. शिवसेनेने मा. मुख्यमंत्री उद्धव ठाकरे, युवासेना प्रमुख आदित्य ठाकरे यांची सभा घेतली. स्टार प्रचारक प्रचारात उतरवले याविरुद्ध दुसऱ्या बाजूला शेतकरी कामगार पक्षाचा कार्यकर्ता कोणताही मोठा नेता किंवा स्टार प्रचारक नसताना शेकाप नेते जे एम म्हात्रे यांच्या नियोजनबद्ध मार्गदर्शनाखाली प्रितमदादांच्या सोबतीने एकटाच लढला.
शेकाप मधील काही नेते सुद्धा दादांच्या विरोधात जाऊन महाविकास आघाडीच्या छत्रछायेखाली दादांच्या विरोधात काम करत होते. शिवसेना, काँग्रेस, राष्ट्रवादी काँग्रेस हे सर्व मोठे पक्ष एकत्र होते. प्रितमदादांना भाजपनेच उभे केले आहे मते खाण्यासाठी अशा प्रकारचा प्रचार केला गेला.परंतु आता निकाल नंतर तिसऱ्या क्रमांकावर गेलेल्या शिवसेनेच्या मतांमुळे नक्की कोणी कोणाला उभे केले हे आता जग जाहीर झाले आहे.
दादांच्या सोबत दुसऱ्या फळीतील तरुणांची फौज रस्त्यावर उतरून दादांची प्रचार यंत्रणा हातात घेऊन गावोगावी शिट्टी ही निशाणी पोहोचण्यात मग्न होती. वातावरण विरोधी असताना सुद्धा दादांनी लढण्याचे ठरवले आणि निसटता पराभव त्यांना पत्करावा लागला. हार न मानता पुन्हा दुसऱ्याच दिवशी आपल्यावर ज्या ८८,००० हजार मतदारांनी विश्वास टाकला आहे तो सार्थ ठरवण्यासाठी त्याच सर्व तरुण कार्यकर्त्यांची फौज घेऊन दादांनी पुन्हा जोमाने काम करण्याचे ठरवून कार्यकर्ते आणि पदाधिकाऱ्यांची बैठक बोलावली आहे.
यावरून भविष्यात प्रितम जनार्दन म्हात्रे हे उरण विधानसभा क्षेत्रात भविष्यात येणाऱ्या इतर निवडणुकीत इतर पक्षांना त्यांची जागा दाखवणार असे सांगण्यात येते.
महाविकास आघाडीतील सर्व पक्ष शेतकरी कामगार पक्षाच्या विरुद्ध असताना सुद्धा युवा कार्यकर्त्यांच्या जोरावर आम्ही पक्षाची मते ८८,००० पर्यंत नेली. यापुढे उरण मध्ये तरुणांच्या रोजगाराच्या बाबतीत खूप काम करायचे आहे. बेरोजगारी, महिला सक्षमीकरण यांवर मला मुखत्वेपणे मोठे काम करायचे आहे. माझ्यासोबत असलेल्या सर्व युवा कार्यकर्त्यांना मी यापुढेही संपूर्णपणे ताकद देण्यासाठी मी योग्य वेळी योग्य तो निर्णय घेईनच.
– प्रितम जनार्दन म्हात्रे