महाराष्ट्र खो-खो संघाच्या यशामागे तांत्रिक कौशल्य आणि  संघटित प्रयत्न – प्रा. डॉ. चंद्रजीत जाधव

मुंबई : ४३व्या कुमार-मुली (ज्युनिअर) राष्ट्रीय अजिंक्यपद खो-खो स्पर्धेत महाराष्ट्राने सलग दहाव्यांदा दुहेरी सुवर्ण मुकुट पटकावत ऐतिहासिक कामगिरी केली आहे. मुलांनी सलग १९वे आणि मुलींनी सलग १०वे विजेतेपद पटकावून खो-खोच्या इतिहासात सुवर्णाक्षरांनी नोंद घेतली आहे. मुलांसाठी हे ३५वे आणि मुलींसाठी २६वे राष्ट्रीय विजेतेपद ठरले आहे.
ग्रामीण भागातील धाराशिवच्या जितेंद्र वसावेला “वीर अभिमन्यू” पुरस्कार, तर सुहानी धोत्रेला “जानकी” पुरस्काराने सन्मानित करण्यात आले आहे. यामुळे ग्रामीण भागातील खेळाडूंनी खो-खोमध्ये उल्लेखनीय प्रगती केली असून, शहरी व ग्रामीण भागातील स्पर्धा अधिक तीव्र होत आहे.
ओडीसाच्या सुविधांचा आदर्श आणि महाराष्ट्राचा दृढ निर्धार:
महाराष्ट्र खो-खो असोसिएशनचे प्रा. डॉ. चंद्रजीत जाधव यांनी या यशाचे श्रेय संघाच्या मेहनतीला, प्रशिक्षकांच्या कल्पकतेला आणि तांत्रिक कौशल्याला दिले आहे. त्यांनी ओडीसाच्या प्रगत सुविधांचा उल्लेख करत सांगितले की, “ओडीसामध्ये उच्च गुणवत्ताकेंद्र सुरू करण्यात आली आहेत, आणि खो-खो नियमितपणे मॅटवर खेळला जातो. महाराष्ट्रात अशा सुविधा नसतानाही खेळाडूंनी अप्रतिम कामगिरी केली आहे.”
ते पुढे म्हणाले, “प्रशिक्षकांनी खेळाडूंना योग्य मार्गदर्शन दिले, नियोजनबद्ध सराव आणि तांत्रिक युक्त्यांमुळे संघाने हा विजय मिळवला आहे. प्रशिक्षक, खेळाडू आणि व्यवस्थापक यांचा संघटित प्रयत्न या यशामागे आहे.”
महाराष्ट्र सरकारचे प्रोत्साहन आणि उच्च गुणवत्ता केंद्राची गरज :
प्रा. जाधव यांनी शासनाच्या थेट नोकर भरती, ५% आरक्षण, राष्ट्रीय व खेलो इंडिया स्पर्धांतील पारितोषिक योजना यामुळे खेळाडूंना मिळणाऱ्या प्रोत्साहनाचे कौतुक केले. “हे उपक्रम खेळाडूंना मैदानाकडे वळायला प्रवृत्त करत आहेत. मात्र, महाराष्ट्रात उच्च गुणवत्ता केंद्र सुरू करणे अत्यंत आवश्यक आहे. त्यामुळे खेळाडूंना अधिक चांगल्या सुविधा मिळतील आणि ते राष्ट्रीय तसेच आंतरराष्ट्रीय स्तरावर सर्वोत्तम कामगिरी करू शकतील,” असे त्यांनी सांगितले.
महाराष्ट्राचा दृढ निश्चय आणि भविष्यातील आव्हाने :
महाराष्ट्राचा हा विजय निष्ठा, कौशल्य आणि मेहनतीचे प्रतीक आहे. प्रा. चंद्रजीत जाधव यांचे नेतृत्व आणि मार्गदर्शन या यशामागे महत्त्वपूर्ण ठरले आहे. महाराष्ट्र संघ भविष्यातही राष्ट्रीय व आंतरराष्ट्रीय पातळीवर आपली विजयी परंपरा कायम ठेवेल, असा विश्वास त्यांनी व्यक्त केला आहे.
महाराष्ट्र खो-खो संघाच्या सातत्यपूर्ण यशामागे संघटन आणि प्रशिक्षकांचा भक्कम पाठिंबा – सचिन गोडबोले
नुकत्याच अलीगड येथे पार पडलेल्या ४३व्या कुमार-मुली (ज्युनिअर) राष्ट्रीय खो-खो अजिंक्यपद स्पर्धेत महाराष्ट्राने इतिहास घडवला. कुमार आणि मुली दोन्ही गटांमध्ये विजेतेपद पटकावत महाराष्ट्राने सलग दहाव्यांदा दुहेरी सुवर्ण मुकुट जिंकला. यावर प्रतिक्रिया देताना महाराष्ट्र खो-खो असोसिएशनचे कार्याध्यक्ष सचिन गोडबोले यांनी महाराष्ट्राच्या संघाच्या सातत्यपूर्ण यशाचे महत्व अधोरेखित केले.
“सतत विजेतेपद मिळवणे हे यशाच्या सातत्याचे द्योतक आहे,” असे सांगताना त्यांनी महाराष्ट्राच्या संघटनेच्या भक्कम व्यवस्थापनाचे आणि प्रायव्हेट क्लब प्रणालीचे महत्त्व अधोरेखित केले. “महाराष्ट्रामध्ये शहरांमध्ये व जिल्ह्यांमध्ये कार्यरत असलेल्या स्वतंत्र संघ व शाळा या खो-खोचा पाया मजबूत करत आहेत. त्याचबरोबर महाराष्ट्र खो-खो असोसिएशनची ठोस पाठराखण आणि उत्कृष्ट निवड प्रक्रिया हे विजयाचे प्रमुख घटक आहेत,” असे त्यांनी सांगितले.
गोडबोले यांनी ओडीसाच्या खो-खो प्रगतीची स्तुती करत ओडीसाला भविष्यातील मोठे आव्हान म्हणून मानले. “ओडीसामध्ये ‘एक्सलन्सी सेंटर’ सुरू झाल्यामुळे त्यांच्या खेळाडूंच्या गुणवत्तेत मोठी सुधारणा होत आहे. महाराष्ट्राची अंतिम लढत ओडीसाशीच होती, आणि भविष्यात ते प्रमुख प्रतिस्पर्धी ठरतील,” असे त्यांनी नमूद केले.
महाराष्ट्राच्या यशासाठी प्रशिक्षकांचे महत्त्व अधोरेखित करताना ते म्हणाले, “महाराष्ट्रातील प्रशिक्षक उच्च दर्जाचे आहेत आणि त्यांना असोसिएशनकडून मिळणारा पाठिंबा यामुळे आपले खेळाडू उत्कृष्ट कामगिरी करू शकतात. महाराष्ट्रात खेळातील गुणवत्तेला प्राधान्य देणारी टीम आहे, त्यामुळे भविष्यातही महाराष्ट्र हे आव्हान समर्थपणे पेलू शकतो.” सचिन गोडबोले यांच्या या वक्तव्यामुळे महाराष्ट्र खो-खो संघाचा विजय आणि संघटनेच्या प्रभावी व्यवस्थापनाचे महत्व अधिक ठळक झाले आहे.
संघ भावना आणि जिद्दीने महाराष्ट्राचा सुवर्ण विजय – गोविंद शर्मा
महाराष्ट्र खो-खो संघाच्या अलीगड येथे झालेल्या ४३व्या कुमार-मुली (ज्युनिअर) राष्ट्रीय अजिंक्यपद स्पर्धेतील दिमाखदार विजयावर प्रतिक्रिया देताना महाराष्ट्र खो-खो असोसिएशनचे खजिनदार गोविंद शर्मा यांनी संघाच्या मानसिकतेचा आणि जिद्दीचा गौरव केला.
“आपला खेळाडू फक्त खेळण्यासाठीच नव्हे, तर सुवर्ण पदक जिंकण्यासाठी मैदानात उतरतो. त्याच्यातील जिद्द, चिकाटी आणि संघ भावना यामुळे आपण नेहमी विजयी होतो,” असे गोविंद शर्मा यांनी सांगितले.
संघटित खेळ आणि विजयासाठीची वृत्ती
महाराष्ट्राच्या खेळाडूंनी कठीण प्रसंगांमध्येही संघभावनेने खेळ करण्याची क्षमता सिद्ध केली आहे. “आपला संघ कोणत्याही प्रतिस्पर्ध्याला कधीच कमकुवत समजत नाही. प्रत्येक सामन्यात आपला संघ शेवटपर्यंत विजयासाठी झुंजतो,” असे त्यांनी नमूद केले.
सामन्यावरची पकड कायम ठेवण्याची कला
शर्मा यांनी सांगितले की, महाराष्ट्राचा संघ कोणत्याही सामन्यावरची पकड सोडत नाही आणि शेवटच्या क्षणापर्यंत विजयासाठी प्रयत्नशील राहतो. “याच वृत्तीमुळे महाराष्ट्राचा संघ सातत्याने सर्वोच्च कामगिरी करतो,” असे त्यांनी सांगितले.
यशामागील मूल्यं
संघाच्या संघटनाबद्दल आणि खेळाडूंच्या समर्पणाबद्दल बोलताना गोविंद शर्मा म्हणाले, “महाराष्ट्राच्या यशामागे प्रशिक्षकांचे मार्गदर्शन, व्यवस्थापनाचे भक्कम पाठबळ आणि खेळाडूंची मेहनत आहे. आपले खेळाडू सुवर्ण विजयाचे ध्येय ठेऊन खेळतात, आणि त्यांची जिद्दच महाराष्ट्राला सतत यशस्वी बनवते.” महाराष्ट्राच्या खेळाडूंच्या या जिद्दीने व समर्पणाने भविष्यातही राज्याला अनेक गौरव मिळवून देण्याची खात्री शर्मा यांनी व्यक्त केली.
००००