नवी दिल्ली : लोकसभा निवडणूकीत इंडिया आघाडीम्हणून एकत्र लढलेले आप आणि काँग्रेसमध्ये दिल्ली विधानसभा निवडणूकीच्या निमित्ताने शा‍ब्दिक चकमक पहायला मिळत आहे. काँग्रेसनेही आप आणि अरविंद केजरीवाल यांच्यावर हल्लाबोल केला आहे. काँग्रेसचे ज्येष्ठ नेते अजय माकन यांनी आपचे प्रमुख आणि दिल्लीचे माजी मुख्यमंत्री अरविंद केजरीवाल यांना देशद्रोही म्हटले आहे.
यासोबतच अजय माकन यांनी असेही म्हटले आहे की, २०२४ च्या लोकसभा निवडणुकीत आपसोबत आघाडी करणे ही काँग्रेसची चूक होती, जी आता सुधारण्याची गरज आहे.
दिल्ली काँग्रेसने बुधवारी आप सरकारविरोधात श्वेतपत्रिका जारी केली आहे. यावेळी, दिल्लीतील काँग्रेस कमकुवत होण्याचे आणि दिल्लीच्या दुर्दशेचे प्रमुख कारण म्हणजे १० वर्षांपूर्वी केजरीवाल यांच्या नेतृत्वाखालील पहिल्या सरकारला काँग्रेसने दिलेला पाठिंबा होता, असे अजय माकन म्हणाले. दरम्यान, हे आपले वैयक्तिक मत असल्याचेही अजय माकन यांनी स्पष्ट केले.