सुमारे 30,000 मोफत बाल हृदय शस्त्रक्रिया
पनवेल – महाराष्ट्रातील मुंबई; छत्तीसगडमधील रायपूर आणि हरियाणातील पलवल येथील श्री सत्य साई संजीवनी हॉस्पिटल्सने “गिफ्ट ऑफ लाइफ” या कार्यक्रमांतर्गत 30,000 मुलांची मोफत हृदय शस्त्रक्रिया आणि उपचार यशस्वीपणे पूर्ण केल्याचा आनंद साजरा केला. यावेळी रुग्णालयाचे अध्यक्ष डॉ. सी. श्रीनिवास आणि भारतीय क्रिकेट संघाचे माजी कर्णधार तसेच रुग्णालयाचे विश्वस्त श्री. सुनील गावस्कर यांनी त्यांच्या उपस्थितीने कार्यक्रमाची शोभा वाढवली.
श्री सत्य साई संजीवनी हॉस्पिटलच्या वतीने आर्थिक अडचणींची पर्वा न करता बालकांच्या 30,000 मोफत हृदय शस्त्रक्रिया आणि तपासण्या पूर्ण करण्यात आल्या. हे कार्य देशभरातील मुलांना अत्यंत आवश्यक असलेली हृदयविकाराची देखभाल उपलब्ध करून देण्याचे रुग्णालयाचे दृढ समर्पण अधोरेखित करणारे आहे. भारतासारख्या देशात लहान मुलाचा हृदयविकार ही केवळ त्याच्या उपचारांशी संबंधित समस्या नसून तो त्याच्या कुटुंबासाठी आर्थिक भारही आहे आणि अशा परिस्थितीत रुग्णालयाच्या या प्रयत्नांमध्ये एक नवी आशा आणि माणुसकीची झलक दिसून येते.
श्री सत्य साई संजीवनी हॉस्पिटलने श्री सत्य साई संजीवनी हेल्थकेअर स्किल्स डेव्हलपमेंट इन्स्टिट्यूट येथे भारतातील पहिला मोफत आरोग्य सेवा कौशल्य प्रशिक्षण कार्यक्रम सुरू केला आहे, जिथे इयत्ता 10वी किंवा 12वीच्या विद्यार्थ्यांना एक वर्षाचा कार्यक्रम दिला जातो आणि त्याच्या निधीची व्यवस्था देखील संस्थेद्वारे केली जाते. हा कार्यक्रम आरोग्य सेवा क्षेत्रातील वैद्यकीय आणि सर्जिकल सहाय्यकांसह कुशल आरोग्य सेवा कर्मचाऱ्यांच्या मागणीवर लक्ष केंद्रित करतो, विद्यार्थ्यांना तांत्रिक प्रशिक्षणाव्यतिरिक्त कौशल्य विकास आणि व्यक्तिमत्व विकास प्रदान करतो. अशाप्रकारे, देशभरातील ग्रामीण तरुणांचा, विशेषत: सामाजिक-आर्थिकदृष्ट्या मागासलेल्या भागातील ग्रामीण तरुणांचा आत्मविश्वास वाढविणारा आणि त्यांना सक्षम करणारा हा एक कार्यक्रम आहे.
श्री सत्य साई हेल्थ अँड एज्युकेशन ट्रस्टचे अध्यक्ष डॉ. सी. श्रीनिवास यांनी 30,000 शस्त्रक्रिया पूर्ण झाल्याची घोषणा करताना सांगितले की, “आज जगभरातील जन्मजात हृदयविकार असलेल्या मुलांच्या आणि त्यांच्या कुटुंबियांच्या 30,000 कथा श्री सत्य साई संजीवनीशी जोडल्या गेल्या आहेत. 12 वर्षांपूर्वी हॉस्पिटल म्हणून सुरू झालेली आज एक सामाजिक परिवर्तनाची चळवळ बनली आहे जी सतत देशाची सेवा करत आहे. श्री सत्य साई संजीवनीच्या माध्यमातून मिळालेल्या निःस्वार्थ प्रेमाचा वारसा पुढे नेत ही मुले विकसित भारतासाठी योगदान देणारे नागरिक बनतील.”
“आमच्या कौशल्य विकास संस्थेत 10वी किंवा 12वी पूर्ण केलेल्या विद्यार्थ्यांसाठी पूर्णपणे मोफत एक वर्षाचा कार्यक्रम सुरू करण्याची घोषणा करताना मला आनंद होत आहे. हा कार्यक्रम वैद्यकीय आणि शस्त्रक्रिया सहाय्यक आणि संलग्न आरोग्य सेवा कौशल्यांची उच्च मागणी असलेल्या आरोग्य सेवा क्षेत्रात विद्यार्थ्यांना शिक्षित-सक्षम करेल आणि रोजगारक्षम बनवेल. आरोग्य सेवा क्षेत्रात ग्रामीण युवकांना कौशल्य प्रदान करून देणारा हा राष्ट्र उभारणीचा उपक्रम आहे,” अशी माहिती श्री सत्य साई हेल्थ अँड एज्युकेशन ट्रस्टचे अध्यक्ष डॉ. सी. श्रीनिवास यांनी दिली.
महान क्रिकेटपटू आणि श्री सत्य साई हेल्थ अँड एज्युकेशन ट्रस्टचे विश्वस्त, सुनील गावस्कर, यांनी श्री सत्य साई संजीवनी येथे शेकडो हृदय शस्त्रक्रिया प्रायोजित केल्या आहेत. ते या उद्देशाचे ब्रँड अॅम्बेसेडर आहेत. येथे येणाऱ्या गरजवंतांसाठी ते आशेचा किरण ठरले आहेत. समाजहिताच्या कार्याबद्दल बोलताना ते म्हणाले, श्री सत्य साई संजीवनी रुग्णालयात केलेल्या या पूर्णपणे मोफत शस्त्रक्रियांद्वारे या मुलांना नवीन निरोगी भविष्य मिळत असल्याने मी याला माझ्या आयुष्यातील तिसरा आणि सर्वात समाधानकारक टप्पा मानतो. ही मुले भविष्यातील यशस्वी खेळाडू/महिला खेळाडू, कलाकार किंवा जागतिक नेतृत्व बनू शकतात. या परिवर्तनात्मक प्रवासाचा भाग होण्यासाठी मी सर्वांना आवाहन करेन.
भारतात दरवर्षी 3,00,000 हून अधिक मुले हृदयविकाराने जन्माला येत असल्याने, हे बालमृत्यूचे एक प्रमुख कारण ठरते. अनेक बालकांमध्ये निश्चित वेळेत विकाराचे निदान न झाल्याने हृदयरोग दुर्लक्षित राहतो. विकारग्रस्त सुमारे 50,000 बाळांना वयाच्या पहिल्या वर्षाच्या आत तातडीच्या तपासण्या आणि वैद्यकीय सेवेची आवश्यकता असते. श्री सत्य साई संजीवनी हॉस्पिटलने पूर्णपणे विनामूल्य 30,000 शस्त्रक्रिया आणि वैद्यकीय हस्तक्षेप करणे केवळ एक विक्रम नसून हि कथा आहे सुमारे 30,000 मुलांची ज्यांचे बालपण परत आले आहे आणि ज्यांच्या कुटुंबाला दिलासा मिळाला आहे. आपल्या देणगीदारांच्या सदिच्छा आणि त्याच्या कर्मचाऱ्यांच्या समर्पणाने प्रेरित होऊन, या रुग्णालयाने देशभरातील 30 राज्ये आणि केंद्रशासित प्रदेश तसेच जगभरातील 18 देशांमधील मुलांच्या जीवनावर सकारात्मक परिणाम केला आहे. त्यांची ‘मोफत’ देखभाल, शस्त्रक्रियेपूर्वी पासून शस्त्रक्रियेनंतरपर्यंत सर्वसमावेशक पाठबळ सुनिश्चित करून, कुटुंबांवरील अपंगत्व आणणारे आर्थिक ओझे दूर करते. अत्यंत कार्यक्षम वैद्यकीय सुविधा उपलब्ध करून देण्याव्यतिरिक्त, हे रुग्णालय प्रत्येक कामातील प्रेमाच्या भावनेचे प्रतीक आहे, जे खरे नातेसंबंध वाढवते आणि हृदयविकार दूर करण्याबरोबरच संपूर्ण कुटुंबाला आनंदाची भेट देते.