स्फोटात २४ ठार, १०० हून अधिक जखमी
इस्लामाबाद : पाकिस्तानातील तरलाई भागातील इमाम बारगाह परिसरात शुक्रवारी जुम्मा नमाजाच्या वेळी झालेल्या भीषण स्फोटात किमान २४ जणांचा मृत्यू झाला असून १०० हून अधिक लोक जखमी झाले आहेत. स्फोटानंतर परिसरात मोठ्या प्रमाणात गदारोळ उडाला असून सुरक्षा यंत्रणा आणि बचाव पथके तत्काळ घटनास्थळी दाखल झाली आहेत.
प्राप्त माहितीनुसार, हा स्फोट दुपारी नमाज सुरू असतानाच झाला. प्राथमिक तपासात आत्मघाती हल्लेखोराने स्वतःला उडवल्याची शक्यता वर्तवण्यात येत आहे. स्फोट इतका तीव्र होता की आसपासच्या इमारतींच्या काचा फुटल्या आणि अनेक वाहने नुकसानग्रस्त झाली.
घटनेनंतर इस्लामाबादमध्ये तातडीने इमर्जन्सी लागू करण्यात आली असून इमाम बारगाह आणि आजूबाजूच्या भागात बंदोबस्त वाढवण्यात आला आहे. जखमींना नजीकच्या रुग्णालयात दाखल करण्यात आले असून अनेकांची प्रकृती गंभीर असल्याने मृतांचा आकडा वाढण्याची भीती व्यक्त करण्यात येत आहे.
या स्फोटाचे नेमके कारण अद्याप स्पष्ट झालेले नाही. तपास यंत्रणा सर्व शक्यता लक्षात घेऊन चौकशी करत आहेत. स्थानिक प्रशासनाने नागरिकांना अफवांवर विश्वास न ठेवण्याचे आवाहन केले आहे.
दरम्यान, पाकिस्तानातील स्थानिक वृत्तसंस्थांनी दिलेल्या माहितीनुसार, हा हल्ला धार्मिक स्थळी करण्यात आल्याने देशभरात तीव्र संताप व्यक्त होत आहे. मदत व बचावकार्य युद्धपातळीवर सुरू असून परिस्थितीवर बारकाईने लक्ष ठेवण्यात येत आहे.