Category: क्रीडा

स्क्वॅशमध्ये डबल धमाका, महिलांना सुवर्ण, पुरूष संघाला रौप्य सेमवाल बहिणभावाच्या जोडीचा पदकाचा करिश्मा डेहराडून ः  महाराष्ट्राच्या महिला संघाने स्क्वॅशमध्ये प्रथमच सुवर्ण पदक जिंकून 38 व्या राष्ट्रीय क्रीडा स्पर्धेचा सहावा दिवस गाजविला. अंतिम लढतीत अनिका दुबे हीनेे जखमी असतानाही झुंज देत सुवर्णपदक खेचून आणले. पुरूष संघाने रूपेरी यश संपादन करून स्क्वॅशमध्ये डबल धमाका घडविला. या स्पर्धेत अंजली व ओम सेमवाल या बहिणभावाच्या जोडीने पदकाचा करिश्मा घडविला आहे. राजीव गांधी स्टेडियममध्ये सुरू असलेल्या स्क्वॅशमधील अंतिम लढतीत महाराष्ट्राच्या महिलांनी पहिली लढत गमावल्यानंतर तामिळनाडूवर 2-1 अशी…

वॉटरपोलोत महाराष्ट्राचे दोन्ही संघ उपांत्य फेरीत हल्दवानी : महाराष्ट्राच्या महिला व पुरुष या दोन्ही वॉटरपोलो संघांनी ३८व्या राष्ट्रीय क्रीडा स्पर्धेच्या उपांत्य फेरीत धडक दिली. महिलांना विजयासाठी चांगलेच झगडावे लागले, पण पुरुषांनी सहज विजय मिळवित आगेकूच केली. इंदिरा गांधी स्टेडियमची जलतरण तलावावर ही स्पर्धा सुरू आहे. महिला गटात महाराष्ट्र व पश्चिम बंगाल यांच्यात अतियश रंगतदार लढत झाली. कधी महाराष्ट्राकडे, तर कधी बंगालकडे  आघाडी असायची मात्र, ७-७ अशा बरोबरीनंतर महाराष्ट्राने लागोपाठ २ गोल करत आघाडी घेतली. मग ही आघाडी टिकवत महाराष्ट्राच्या महिलांनी ९-७ गोल फरकाने बाजी मारली. सर्वाधिक ५ गोल करणारी मुंबईची तन्वी मुळे या विजयाची शिल्पकार ठरली. राजश्री गुगळे (२गोल), याना अग्रवाल (१), पुजा कुमरे (१) यांनीही विजयात आपला वाटा उचलला. पुरुष गटात महाराष्ट्राने केरळचा १०-३ गोल फरकाने धुव्वा उडविला. महाराष्ट्राकडून अश्विनकुमार कुंडे व सारंग वैद्य यांनी २-२ गोल केले, तर भूषण पाटील, श्रेयस वैद्य, ऋतुराज बिडकर, अक्षयकुमार कुंडे, पीयूष सुर्यवंशी, पार्थ अंबुलकर यांनी प्रत्येकी एक गोल केला. महिला संघाला विलास देशमुख व योगेश निर्मल यांचे, तर पुरुष संघाला रणजित श्रोत्रीय व उमेश उत्तेकर यांचे मार्गदर्शन लाभले.

राही सरनोबतचे सोनेरी पुनरागमन पिस्तुलात बिघाड होऊनही 25 मीटरमध्ये मारली बाजी डेहराडून ः  आजारपणामुळे जवळजवळ दोन वर्षे स्पर्धात्मक नेमबाजीपासून दूर असलेली कोल्हापूरची सुवर्णकन्या राही सरनोबतने 38 व्या राष्ट्रीय क्रीडा स्पर्धेतील सोनेरी…

धिर्ती अहिरवालला जलतरणात सुवर्णपदक हलदवानी : पालघरच्या धीर्ती अहिरवाल हिने ३८व्या राष्ट्रीय क्रीडा स्पर्धेतील जलतरणच्या २०० मिटर बटरफ्लाय प्रकारात महाराष्ट्राला सुवर्णपदक जिंकून देण्याचा पराक्रम केला. धिर्तिने २ मिनिटे २३.८० सेकंद वेळेसह सुवर्ण पदकावर मोहोर उमटवली. कर्नाटकची सुहासिनी घोष व आसामची अस्था चौधरी यांना अनुक्रमे रौप्य व कांस्यपदक मिळाले. रीलेमध्ये रौप्य व कांस्य! जलतरणातील महिलांच्या ४ बाय २०० मिटर फ्री स्टाईल प्रकारात महाराष्ट्राला रौप्य पदक मिळाले, तर पुरुषांच्या ४ बाय २०० मिटर फ्री स्टाईल प्रकारात महाराष्ट्राला कांस्यपदक मिळाले. महिला गटात अन्वी देशवाल, सान्वी देशवाल, धिर्ति अहिरवाल व अदिती हेगडे या चौकडीने ९ मिनिटे ९.३७ सेकंद वेळेसह रूपेरी यशाला मिठी मारली. कर्नाटक संघाने सुवर्णपदक पटकाविले, तमिळनाडूला कांस्यपदक मिळाले. पुरुष गटात शुभम धायगुडे, ओम साटम, ऋषी भगत व ऋषभ दास या चौघांनी ७ मिनिटे ५५.६२ सेकंद वेळेसह कांस्यपदकाची कमाई केली.  कर्नाटक व गुजरात संघाने अनुक्रमे सुवर्ण व रौप्यपदक पटकाविले.

राष्ट्रीय विक्रमासह वैष्णव ठाकूरची रूपेरी कामगिरी डेहराडून :  महाराष्ट्राच्या वैष्णव ठाकूर या २३ वर्षीय खेळाडूने 38 व्या राष्ट्रीय क्रीडा स्पर्धेच्या वेटलिफ्टिंगमध्ये राष्ट्रीय विक्रम नोंदवित रुपेरी कामगिरी केली राजगुरुनगर तालुक्यातील ठाकूर पिंपरी या गावचा खेळाडू वैष्णव याने पुरुषांच्या १०२ किलो वजनी गटातील स्नॅचमध्ये १६० किलो वजन उचलले आणि गत वेळी जगदीश विश्वकर्मा याने नोंदविलेला १५७ किलोचा विक्रम मोडला. स्नॅचमध्ये वैष्णवने आघाडी घेतली होती. मात्र, क्लीन व जर्कमध्ये त्याला १७५ किलो उचलता आले. एकूण त्याने ३३५ किलो वजन उचलून रौप्यपदक जिंकले. विश्वकर्मा याने येथे स्नॅचमध्ये १५२ किलो तर क्लीन व जर्कमध्ये १९३ किलो असे एकूण ३४५ किलो वजन उचलून सुवर्णपदक पटकाविले. वैष्णव हा वडगाव मावळ येथे ज्येष्ठ प्रशिक्षक अनिकेत नवघणे यांच्या मार्गदर्शनाखाली गेली पाच वर्षे प्रशिक्षण घेत आहे‌. गतवर्षी राष्ट्रीय क्रीडा स्पर्धेच्या अगोदर गुडघ्याची शीर तुटल्यामुळे त्याला स्पर्धेत भाग घेता आला नव्हता. त्यानंतर गेले तीन महिने त्याने या स्पर्धेसाठी खूप मेहनत घेतली होती. आजपर्यंत त्याने वरिष्ठ व कनिष्ठ या दोन्ही गटात मिळून चार सुवर्णपदकांसह सात पदके जिंकली आहेत. नुकत्याच झालेल्या अखिल भारतीय आंतरविद्यापीठ स्पर्धेतही त्याने सोनेरी कामगिरी केली होती. त्याचे वडील शेतकरी असून, वैष्णव हा राजगुरुनगर येथील हुतात्मा राजगुरू महाविद्यालयात कला शाखेत शिकत आहे.

कबड्डीत महाराष्ट्राला कांस्यपदक हरिव्दार ः राष्ट्रीय क्रीडा स्पर्धेत महिलांच्या कबड्डीमध्ये महाराष्ट्राला कांस्य पदकावर समाधान मानावे लागले. उपांत्य फेरीत महाराष्ट्राला हरियाणाकडून 24-39 गुणांनी पराभव पत्करावा लागला. हरिव्दारमधील योगस्थळी क्रीडा परिसरात संपलेल्या कबड्डी स्पर्धेतील उपांत्य फेरीत हरियाणाने महाराष्ट्रावर मात केली. उपांत्यपूर्व फेरीत पश्चिम बंगाल हरवून महाराष्ट्राने उपांत्य फेरी गाठली होती. उपांत्य फेरीत महाराष्ट्राची बलाढ्य  हरियाणा संघाशी झुंज रंगली. पूर्वार्धात 21-13 गुणांनी आघाडी घेत उत्तरार्धातही हरियाणाने आपली हुकुमत कायम राखून महाराष्ट्राला पराभूत केले. बचावात्मक खेळ केल्याने महाराष्ट्राला पराभूत व्हावे लागले. उपांत्य लढतीमधील पराभूत संघांना कांस्यपदक बहाल करण्यात येते. महाराष्ट्रासह राजस्थान संघ कांस्य पदकाचा मानकरी ठरला.

श्री मावळी मंडळ संस्थेच्या शतक महोत्सवी वर्षानिमित्त प्रथम विभागीय पुरुष व महिला गटाच्या खो-खो स्पर्धेत पुरुषांच्या उपांत्य गटात विहंग क्रीडा केंद्र (ठाणे), शिर्सेकर्ल महात्मा गांधी स्पोर्ट्स अकॅडेमी  (मुंबई उपनगर), सरस्वती…

महाराष्ट्राच्या नेमबाजांचा अचूक निशाणा!  पार्थ मानेला पदार्पणातच सुवर्ण, रुद्रांक्ष पाटीलला रौप्य तर किरण जाधवला कांस्य डेहराडून ः मराठमोळ्या नेमबाजांनी सुवर्णासह रौप्य व कांस्य पदकाच्या कमाई करीत 38व्या राष्ट्रीय क्रीडा स्पर्धेतील त्रिशूल शूटिंग रेजवर महाराष्ट्राची पताका अभिमानाने फडकवली. शेवटपर्यंत रंगतदार झालेल्या १० मीटर एअर रायफल्स स्पर्धेत महाराष्ट्राच्या पार्थ माने या युवा खेळाडूने सोनेरी वेध घेतला, तर जागतिक सुवर्णपदक विजेता रुद्रांक्ष पाटील याने रुपेरी यश संपादन केले. सेनादलाचे प्रतिनिधित्व करणारा सातारा जिल्ह्यातील खेळाडू किरण जाधव याला कांस्यपदक मिळाले. एअर रायफल्स स्पर्धेत अखेरच्या क्षणापर्यंत चुरस पहावयास मिळाली. 17 वर्षीय खेळाडू पाथने 252.6 गुण, रुद्रांक्ष याने 252.1 गुण, तर किरणने 230.7 गुणांची नोंद करीत महाराष्ट्राला तिन्ही पदके जिंकून देण्याचा भीमपराक्रम केला. एका फेरीचा अपवाद वगळता पार्थने सुरुवातीपासून शेवटपर्यंत आघाडी टिकवत सुवर्ण यश संपादन केले. रुद्राक्ष हा मधल्या टप्प्यात सहाव्या स्थानावर होता. मात्र शेवटच्या चार टप्प्यांमध्ये त्याने एकाग्रता दाखवीत अतिशय अचूक नेम साधले आणि जोरदार मुसंडी मारत दुसर्‍या क्रमांकावर झेप घेतली. अर्थात त्याला पार्थ याची आघाडी तोडता आली नाही. पार्थ हा मूळचा सोलापूरचा खेळाडू असून गेले चार वर्षे तो सुमा शिरूर यांच्या पनवेल येथील अकादमीमध्ये प्रशिक्षण घेत आहे. त्याने कनिष्ठ गटाच्या जागतिक स्पर्धेत सोनेरी वेध घेतला होता तसेच 2023 मध्ये त्याने सांघिक विभागात भारतात सुवर्णपदक मिळवून दिले होते. तो पनवेल येथील महात्मा फुले शिक्षण संस्थेत बारावी शास्त्र शाखेत शिकत आहे. सोनेरी यशाची खात्री होती : पार्थ अंतिम फेरीत स्थान मिळवल्यानंतर मी फक्त सुवर्णपदक जिंकण्याचाच विचार केला होता त्या दृष्टीनेच सुरुवातीपासूनच मी अचूक नेम कसा साधला जाईल याचे नियोजन केले होते सुदैवाने माझ्या नियोजनानुसारच घडत गेले. या स्पर्धेत प्रथमच भाग घेताना सुवर्णपदक मिळवता आले याचा आनंद मला खूप झाला आहे असे पार्थ याने सांगितले. जागतिक स्पर्धांसाठी होणार्‍या राष्ट्रीय चाचणी स्पर्धांमध्ये भाग घेत भारतीय संघात स्थान मिळवण्याचे माझे ध्येय आहे आणि अर्थातच ऑलिंपिक मध्ये प्रतिनिधित्व करणे हे माझे स्वप्न आहे ते मी साकार करू शकेन अशी मला आशा आहे असेही पार्थ याने सांगितले ेमुंबई येथे स्नेहल कदम यांच्या मार्गदर्शनाखाली प्रशिक्षण घेणार्‍या रुद्राक्ष याने जागतिक स्पर्धेत विजेतेपद मिळवीत गतवेळी ऑलिंपिक कोटा मिळविला होता. त्याने आजपर्यंत आंतरराष्ट्रीय व राष्ट्रीय स्तरावर भरघोस पदके जिंकली आहेत. राज्य शासनातर्फे गतवर्षी त्याला शिवछत्रपती पुरस्काराने ही सन्मानित करण्यात आले आहे. मधल्या टप्प्यात सहाव्या क्रमांकावर माझ्यावर थोडेसे दडपण होते तरीही मला पदकाची खात्री होती त्यामुळेच मी शेवटपर्यंत संयम व चिकाटी ठेवीत नेम साधले त्यामुळेच मला रुपेरी कामगिरी करता आली, महाराष्ट्राच्याच पार्थ याला सुवर्णपदक मिळाल्यामुळे मला खूपच आनंद झाला आहे असे रुद्रांक्ष याने सांगितले. किरण जाधव हा सातारा जिल्ह्यातील भाटणवाडी या गावचा खेळाडू असून त्याने सन 2015 मध्ये सुमा शिरूर यांच्या मार्गदर्शनाखाली नेमबाजीचा सराव सुरू केला. या खेळातील त्याची कामगिरी बघून सेनादलात त्याची निवड झाली. त्याने आतापर्यंत जागतिक स्तरावरील स्पर्धांमध्ये तीन सुवर्णपदके जिंकली आहेत तर राष्ट्रीय स्पर्धांमध्ये त्याला दोन सुवर्णपदके मिळाली होती.

पूजा दानोळेच्या रूपेरी यशाने महाराष्ट्राला महिलांना विजेतेपद! साठ किलोमीटरच्या शर्यतीत रौप्यपदकाची कमाई रुद्रपूर ः  38व्या राष्ट्रीय क्रीडा स्पर्धेतील कोल्हापूरच्या पूजा दानोळेने  आणखी एक पदकांची कमाई करीत रोड सायकलिंगमध्ये महाराष्ट्राला महिला गटाचे विजेतेपद जिंकून दिले. पूजाने शुक्रवारी साठ किलोमीटरच्या शर्यतीत रौप्य पदक पटकावले. आपली पदकांची मालिका कायम राखत सायकलिंग मधील वैयक्तिक टाईम ट्रायलमध्ये सुवर्णपदक जिंकणार्‍या पूजा हिने आज 60 किलोमीटर अंतराच्या शर्यतीत रुपेरी कामगिरी केली. तिची या कामगिरीने महाराष्ट्राने रोड सायकलिंगचे विजेतेपदावर नाव कोरले. डोंगरदर्‍यातील रुद्रपूरमधील शेवटपर्यंत चुरशीने झालेल्या शर्यतीत पूजा हिने हे अंतर एक तास 45 मिनिटे 10.590 सेकंदात पार केले. सुवर्णपदक जिंकणार्‍या गुजरातच्या मुस्कान गुप्ता हिला हे अंतर पार करण्यास एक तास 45 मिनिटे 10.512 सेकंद वेळ लागला. स्पर्धेत 1 सुवर्ण, 1 रौप्य पदके जिंकून महाराष्ट्राने रोड सायकलिंगमधील महिला गटाचे विजेतेपदावर नाव कोरले. ही दोन्ही पदके पूजा दानोळेने जिंकून महाराष्ट्राची शान राष्ट्रीय क्रीडा स्पर्धेत उंचविली आहे. पूजा हिचे वडील बबन व भाऊ हर्षद हे दोघेही नामवंत कुस्तीगीर आहेत. पूजा हिला सुरुवातीला दिपाली पाटील यांचे मार्गदर्शन लाभले असून सध्या ती नवी दिल्ली येथील राष्ट्रीय सायकलींग अकादमीत अनिल कुमार यांच्या मार्गदर्शनाखाली प्रशिक्षण घेत आहे.

वुशूच्या ताईचीक्वॉन प्रकारात श्रावणी कटके हिला कांस्यपदक डेहराडून :  पुण्याच्या श्रावणी कटके हिने येथे सुरू असलेल्या राष्ट्रीय क्रीडा स्पर्धांमधील वुशूच्या ताईचीक्वॉन प्रकारात कांस्यपदक जिंकले. ताईचीक्वॉन हा वुशूचा एक महत्त्वपूर्ण प्रकार असून, त्यात शारीरिक संतुलन, लवचिकता आणि मानसिक एकाग्रतेची आवश्यकता असते. श्रावणीने यापूर्वीही विविध राष्ट्रीय आणि आंतरराष्ट्रीय स्पर्धांमध्ये उल्लेखनीय कामगिरी केली आहे. तिच्या या यशामुळे महाराष्ट्रातील युवा खेळाडूंना प्रेरणा मिळेल आणि वुशू खेळात अधिक सहभाग वाढेल, अशी आशा श्रावणीने व्यक्त केली आहे. श्रावणी कटके हिच्या या यशामुळे महाराष्ट्राच्या क्रीडा क्षेत्रात अभिमानाची भर पडली आहे. तिच्या कठोर परिश्रम, समर्पण आणि सातत्यपूर्ण सरावामुळे तिने हे यश संपादन केले आहे. तिच्या या कामगिरीबद्दल महाराष्ट्र ऑलम्पिक असोसिएशनचे महासचिव नामदेव शिरगावकर व पथक प्रमुख  संजय शेटे, खजिनदार धनंजय भोसले, ऑल महाराष्ट्र वुशू संघटनेचे अध्यक्ष एस एस झेंडे, सचिव सोपान कटके आणि प्रशिक्षक स्वयम् कटके, प्रतीक्षा शिंदे, गणेश यादव, दीपक माळी यांनी तिचे अभिनंदन केले आहे.