Month: January 2026

ठाणे : भाजपने  सर्वाधिक जागा बिनविरोध केलेल्या कल्याण डोंबिवली  महापालिकेतील एका उमेदवाराच्या प्रचारार्थ चक्क पैशांचे वाटप केल्याचं एकनाथ शिंदेंच्या शिवसेनेन उघडकीस आणल आहे. निवडणूक प्रचारादरम्यान पांढऱ्या पाकिटात ३००० रुपये म्हणजे ५०० रुपयांच्या ६ नोटा टाकून हे पैसे वाटप केले जात होते. डोंबिवलीच्या तुकाराम नगर परिसरातील दशरथ भुवन परिसरात भाजपकडून तीन हजार रुपयांची पाकीटे नागरिकांच्या घरी पोहोचवण्यात येत होते अशी माहीती मिळताच येथील एकनाथ शिंदेंच्या शिवसेनेचे उमेदवार नितीन पाटील आणि त्यांच्या कार्यकर्त्यांनी पैसे वाटणाऱ्याना रंगेहाथ हात पकडल्याने हे उघडकीस आलं आहे. या घटनेनंतर निवडणूक आयोगाचे पथक व पोलीसही घटनास्थळी दाखल झाले आहेत. दरम्यान, येथील प्रभागात भाजप आणि शिवसेना यांच्यात मैत्रिपूर्ण लढत होत आहे. भाजपाचे विशू पेडणेकर यांचे कार्यकर्ते पैसे वाटत असल्याचं समोर आलं आहे, विशेष म्हणजे मित्रपक्ष शिवसेना शिंदे गटाचे कार्यकर्तेचे हा व्हिडिओ बनवून हा पैसे वाटपाचा डाव उधळत आहेत.

   महायुतीचा ‘वचननामा‘ जाहीर ० ५ वर्षांसाठी पाणीपट्टी स्थगीत ० २४ तास पाणी ०   लाडक्या बहिणींना लघु उद्योगासाठी ५ लाखांपर्यंत बिनव्याजी कर्ज मुंबई : मुंबई महानगरपालिका निवडणुकीसाठी आज भाजपा, एकनाथ शिंदें यांची शिवसेना आणि रामदास आठवलेंची आरपीआय यांच्या महायुतीने आपला वचननामा प्रसिद्ध केला.  मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि केंद्रीय मंत्री रामदास आठवले यांनी हा वचननामा प्रसिद्ध केला. महायुतीच्या या वचननाम्यात पाच वर्षांसाठी पाणीपट्टी वाढ स्थगित करणे, बेस्टमध्ये महिलांना ५० टक्के सवलत देणे, लाडक्या बहिणींना लघु उद्योगासाठी ५ लाखांपर्यंत बिनव्याजी कर्ज, झोपडपट्टीमुक्त मुंबई, ३० ते ३५ लाख घरांची निर्मिती करणे, रोहिंग्या आणि बांगलादेशी मुक्त मुंबई करणे, तसेच, धारावीचा विकास आदी अनेक घोषणा करण्यात आल्या आहेत. मुख्यमंत्री देवेंद्र फडणवीस म्हणाले की, इतर कुणीही वचननामा दिला तरीही त्यांचा ट्रॅक रेकॉर्ड आणि आमचा ट्रॅक रेकॉर्ड मोठा असेल. पुढील पाच वर्षानंतर आम्ही कायकाय केलं याचा एक रिपोर्ट जनतेसमोर आम्ही मांडू. आम्ही मुंबईकरांना मुंबईबाहेर जाऊ देणार नाही. काही लोक बोलत राहिले आम्ही मात्र करून दाखवलं. बीडीडी, अभ्युदय नगर, विशाल सह्याद्री नगर याचे उदाहरण आहे.हा वचननामा मुंबईकरांच्या दररोजच्या जीवनात बदल घडवणारा ठरेल, असा विश्वास उपमुख्यमंत्री एकनाथ शिंदे यांनी व्यक्त केला. अडीच वर्ष मी मुख्यमंत्री होतो. त्यानंतर देवेंद्र फडणवीसांचे एक वर्ष, आम्ही मुंबईत जे काम केले, ते आपल्यासमोर आहेच. मुंबईच्या विकासाचा वेग आणखी वाढवायचा आहे. मुंबईत आलेल्या मराठी माणसाचे रक्षण करणे, संस्कृती जतन करणे आमची जबाबदारी आहे. वचन आहे. महत्वाचे म्हणजे, मुंबईबाहेर गेलेला मुंबईकर आम्हला पुन्हा एकदा मुंबईत आणायचा आहे असा…

भाजपाने अख्खी मुंबई विकायला काढली आहे, अशा शबदात राज ठाकरे यांनी भाजपाच्या अदानी प्रेमाचा बुरका टराटरा फाडला. २०२४ लोकसभा निवडणुकीनंतर एका व्यक्तीने माहिती दिली, माझी रिसर्च टिम कामाला लागली. आत्ता हे सगळं मी तुम्हाला…

स्वाती घोसाळकर मुंबई : मराठी मनाचा हुंकार म्हणून ओळख असणाऱ्या शिवाजीपार्कवर म्हणजेच शिवतिर्थावरून आज तब्बल २० वर्षांनी उद्धव ठाकरें आणि राज ठाकरे यां ठाकरें बंधूनी अवघ्या महाराष्ट्राला साद घातलीय. आता चुकलात तर…

  सोमनाथ : गझनीपासून औरंगजेबापर्यंत सोमनाथ मंदिरावर आक्रमक करणारे अनेक आक्रमक इतिहासाच्या पानांमध्ये गडप झाले, पण सोमनाथ मंदिर तिथेच गर्वाने उभं आहे, असे प्रतिपादन पंतप्रधान नरेंद्र मोदी यांनी केले. सोमनाथ मंदिराच्या स्वाभिमान पर्वामध्ये रविवारी  नरेंद्र मोदी यांनी सहभाग घेतला यावेळी ते बोलत होते. सोमनाथ मंदिर येथे १०८ अश्वांसह काढण्यात आलेल्या शौर्य यात्रेमध्ये ते सहभाही झाले होते. ही शौर्य यात्रा सोमनाथ मंदिराच्या रक्षणासाठी आपल्या प्राणांची आहुती देणाऱ्या अगणित वीर योद्ध्यांना श्रद्धांजली अर्पण करण्याच्या उद्देशाने काढण्यात आली होती. शौर्यसभेला संबोधित करताना नरेंद्र मोदी म्हणाले की,  एक हजार वर्षांपूर्वी १०२६  साली महमूद गझनी याने केलेल्या हल्ल्यावेळी इथे काय वातावरण असेल,  आज इथे उपस्थित आहेत, त्यांच्या पूर्वजांनी, आमच्या पूर्वजांनी आपल्या आस्थेला वाचवण्यासाठी आपल्या महादेवांसाठी प्राणांची बाजी लावली होती. एक हजार वर्षांपूर्वी हे आक्रमक विचार करत होते की, त्यांनी आम्हाला जिंकलंय. मात्र आज एक हजार वर्षांनंतरही सोमनाथ महादेव मंदिरावर फडकत असलेला ध्वज हिंदुस्तानची शक्ती काय आहे, त्याचं सामर्थ्य काय आहे हे संपूर्ण सृष्टीला दाखवून देत आहे. पंतप्रधान नरेंद्र मोदींनी सांगितले की, जेव्हा गझनीपासून औरंगजेबापर्यंत सर्व आक्रमक सोमनाथ मंदिरावर हल्ले करत होते. तेव्हा त्यांना वाटत होते की, त्यांची तलवार सनातन सोमनाथवर विजय मिळवत आहे. मात्र ज्या सोमनाथला ते नष्ट करू इच्छित होते, त्याच्या नावामध्येच सोम अर्थात अमृत आहे, हे धर्मांध कट्टरपंथी समजू शकले नाहीत.  त्याच्यामध्ये हलाहल प्राशन करून अमर राहण्याचा विचार जोडलेला आहे. तसेच त्यामध्ये सदाशि महादेवांच्या रूपात चैतन्यशक्ती प्रतिष्ठित आहे.  ती कल्याणकारक आहे आणि प्रचंड तांडव: शिव: हा शक्तीचा स्रोहती आहे. त्यामुळेच गझनीपासून औरंगजेबापर्यंत सोमनाथवर हल्ला करणारे सर्व आक्रमक इतिहासाच्या पानांमध्ये गडप झाले. मात्र चिरंतन सोमनाथ मंदिर सागर किनाऱ्यावर अभिमानानं उभं आहे. असेही नरेंद्र मोदी यावेळी म्हणाले.

महाप्रचार रॅलीला नागरिकांचा उत्स्फूर्त प्रतिसाद आशीर्वाद देण्यासाठी नागरिक रस्त्यावर दिवा, दि. ११ डिसेंबर : ठाणे महानगरपालिका सार्वत्रिक निवडणूक २०२६ अंतर्गत शिवसेना–भाजपा– आर.पी.आय. महायुतीच्या वतीने आयोजित करण्यात आलेल्या प्रभाग क्रमांक २७ च्या शैलेश पाटील, स्नेहा पाटील, दिपाली भगत आणि ऍड. आदेश भगत या चारही उमेदवारांच्या महाप्रचार रॅलीला दिवा परिसरात नागरिकांचा उत्स्फूर्त प्रतिसाद लाभला. रविवारी सायंकाळी आयोजित या रॅलीदरम्यान उमेदवारांना आशीर्वाद देण्यासाठी नागरिक मोठ्या संख्येने रस्त्यावर उतरले होते. रॅली मार्गावर ठिकठिकाणी नागरिकांनी फुलांची उधळण करत, घोषणा देत उमेदवारांचे स्वागत केले. महिला, युवक, ज्येष्ठ नागरिकांसह मोठ्या प्रमाणावर लोकसहभाग दिसून आला. नागरिकांची गर्दी एवढी वाढली की काही काळासाठी मुख्य रस्ता वाहतुकीसाठी बंद करावा लागला, त्यामुळे परिसरात उत्साहाचे आणि चैतन्याचे वातावरण निर्माण झाले होते. “काम करत आलो… काम करत राहू…” या घोषणांनी संपूर्ण परिसर दुमदुमून गेला. महायुतीच्या उमेदवारांच्या समर्थनार्थ निघालेल्या या रॅलीमुळे दिवा शहरात निवडणुकीचे वातावरण तापले असून, नागरिकांचा वाढता पाठिंबा स्पष्टपणे दिसून आला. रॅली शांततेत व शिस्तबद्ध पद्धतीने पार पडली. कोणताही अनुचित प्रकार घडू नये यासाठी कार्यकर्ते व स्वयंसेवकांनी चोख नियोजन केले होते. या महाप्रचार रॅलीने महायुतीच्या उमेदवारांना मोठे बळ दिल्याची चर्चा नागरिकांमध्ये सुरू होती.

अपक्ष उमेदवाराकडून आचारसंहितेचा भंग निवडणूक आयोगाकडे कारवाईची मागणी दिवा: ठाणे महानगरपालिका निवडणुकीत दिवा प्रभाग क्रमांक २७ (क) मधून अपक्ष उमेदवार म्हणून निवडणूक लढवणाऱ्या सीमा गणेश भगत यांच्यावर निवडणूक आचारसंहितेचे उल्लंघन केल्याचा आरोप करण्यात आला असून, याबाबत निवडणूक आयोगाकडे लेखी तक्रार सादर करण्यात आली आहे. सीमा गणेश भगत यांनी अपक्ष उमेदवार म्हणून उमेदवारी अर्ज दाखल केलेला असतानाही, त्यांच्या प्रचारासाठी वापरण्यात येणाऱ्या प्रचार पत्रिकेवर देशाचे पंतप्रधान नरेंद्र मोदी तसेच उत्तर प्रदेशचे मुख्यमंत्री आदित्यनाथ योगीराज यांचे छायाचित्र वापरण्यात आले आहे. विशेष म्हणजे, त्या भारतीय जनता पार्टीच्या अधिकृत उमेदवार नसताना भाजपच्या वरिष्ठ नेत्यांचे फोटो वापरून मतदारांची दिशाभूल करण्याचा प्रयत्न केला जात असल्याचा आरोप करण्यात आला आहे. तसेच, निवडणूक आयोगाकडून सीमा भगत यांना “हेलिकॉप्टर” हे निवडणूक चिन्ह देण्यात आले असून, ही भाजपच्या वरिष्ठ नेत्यांचे फोटो वापरण्यात येत आहे. सदर प्रकार हा निवडणूक आचारसंहिता व निवडणूक नियमांचे स्पष्ट उल्लंघन असल्याचे तक्रारदारांचे म्हणणे आहे. या प्रकरणाची तातडीने चौकशी करून संबंधित प्रचार साहित्य जप्त करावे, आचारसंहितेचा भंग सिद्ध झाल्यास सीमा गणेश भगत यांच्यावर योग्य ती कठोर कारवाई करावी, तसेच भविष्यात अशा प्रकारचा प्रचार त्वरित थांबवण्याचे आदेश द्यावेत, अशी मागणी निवडणूक आयोगाकडे करण्यात आली आहे. निवडणूक प्रक्रियेतील पारदर्शकता आणि लोकशाही मूल्ये जपण्यासाठी निवडणूक आयोगाने याची गंभीर दखल घ्यावी, अशी अपेक्षा व्यक्त करण्यात येत आहे.

निवडणूक कर्तव्यावर नियुक्त ४३० कर्मचा-यांनी पहिल्या दिवशी केले पोस्टल मतदान नवी मुंबई : (अशोक गायकवाड ) नवी मुंबई महानगरपालिका सार्वत्रिक निवडणूकीत प्रत्येक मतदाराने आपला मतदानाचा हक्क बजावावा याकरिता पॅम्पेलेट्स, पोस्टर्स, बॅनर्स, ऑडिओ, व्हिडीओ, डिजीटल तसेच सोशल मिडीया अशा विविध माध्यमांतून व्यापक स्वरूपात जनजागृती करण्यात येत आहे. मतदानाची टक्केवारी वाढावी यासाठी विविध स्वरुपात प्रचार प्रसार करतांनाच निवडणूक प्रक्रिया पार पाडण्यासाठी मोठया संख्येने निवडणूक कर्तव्यावर कार्यरत असणा-या शासकीय – निमशासकीय कर्मचारी यांचा मतदानाचा हक्क डावलला जाऊ नये याकरिता महापालिका आयुक्त डॉ. कैलास शिंदे यांच्या मार्गदर्शनाखाली आठही निवडणूक निर्णय अधिकारी यांच्या कार्यालयात टपाली मतदान सुविधा केंद्रे कार्यरत करण्यात आलेली आहेत. १५ जानेवारी रोजी होणा-या नमुंमपा निवडणूकीमध्ये कर्तव्यासाठी नेमणूक झालेल्या १३९ महिला व २९१ पुरुष अशा ४३० कर्मचा-यांनी शनिवार १० जानेवारी रोजी पहिल्या दिवशी टपाली मतदान करुन आपला मतदानाचा हक्क बजावला अशी माहिती उपआयुक्त तथा पोस्टल मतदान नोडल अधिकारी स्मिता काळे यांनी दिली. मतदान केल्यानंतर या कर्मचा-यांनी “आम्ही मतदान केले, तुम्हीही मतदान करा” असे आवाहन सेल्फी काढत सर्व मतदार नागरिकांना केले. निवडणूकीसाठी मतदान केंद्रावर नियुक्त अधिकारी, कर्मचारी यांना मतदानाच्या दिवशी कर्तव्यावर कार्यरत असल्याने मतदान करण्याची संधी उपलब्ध होणार नसल्याने महानगरपालिकेने पोस्टल मतदानाची प्रक्रिया प्रभावीपणे राबवली आहे. त्यासाठी आठही विभागातील निवडणूक निर्णय अधिकारी कार्यालयांमध्ये टपाली मतदान सुविधा केंद्रे स्थापन करण्यात आलेली आहेत. नवी मुंबई महानगरपालिका सार्वत्रिक निवडणूकीकरिता प्राधान्याने रायगड जिल्हयातील स्थानिक स्वराज्य संस्थांच्या कर्मचाऱ्यांप्रमाणेच नवी मुंबईतील सिडको व इतर शासकीय – निमशासकीय कार्यालये, खाजगी शाळा तसेच पोलीस विभाग येथील कर्मचाऱ्यांची निवडणूक कामाकरिता नेमणूक करण्यात आली आहे. अशा कर्मचाऱ्यांकरिता तसेच जे कर्मचारी नवी मुंबई महानगरपालिका क्षेत्रातील मतदार आहेत मात्र त्यांची नेमणूक इतर शहरांमध्ये निवडणूक कर्तव्यावर झालेली आहे अशा कर्मचा-यांना मतदान करता यावे यासाठी राज्य निवडणूक आयोगाच्या निर्देशानुसार व नियमानुसार स्थापन करण्यात आलेल्या या विशेष टपाली मतदान सुविधा केंद्राचा लाभ घेऊन निवडणूक कर्तव्यावर कार्यरत असणाऱ्या कर्मचाऱ्यांनी मतदान करावे असे आवाहन नवी मुंबई महानगरपालिका निवडणूक विभागाच्या वतीने करण्यात येत आहे.

कल्याण डोंबिवली महापालिकेच्या मतदारांना मतदान केंद्राची माहिती आता एका क्लिकवर कल्याण :  कल्याण डोंबिवली महानगरपालिका सार्वत्रिक निवडणूक २०२५-२६ च्या अनुषंगाने मतदारांना मतदान करणे सुलभ व्हावे, त्यांना आपल्या मतदान केंद्राची माहिती त्वरित उपलब्ध व्हावी, यासाठी महापालिकेमार्फत विशेष ऑनलाईन सुविधा उपलब्ध करुन देण्यात आली आहे. या ऑनलाईन सुविधेमार्फत मतदारांना त्यांचे नाव सर्च केल्यावर, मतदान केंद्राचे जीपीएस लोकेशनसह माहिती उपलब्ध होणार आहे. या माध्यमाद्वारे मतदारांना मतदान कोणत्या केंद्रात करावयाचे आहे, मतदार यादीचा भाग क्रमांक, अनुक्रमांक ही वैयक्तिक माहिती एका क्लिकवर उपलब्ध होणार आहे. मतदान क्रमांक व मतदान केंद्र शोधण्यासाठी मतदारांनी https:kdmc.localbody.org/Home/Voter_Search या लिंकचा किंवा  QR Code चा वापर करावा. या सुविधेमुळे मतदारांना वोटर स्लिपवर अवलंबून राहण्याची गरज भासणार नाही आणि घर बसल्या आपापल्या मतदान केंद्राची माहिती जीपीएस लोकेशनसह सहजरित्या उपलब्ध होईल. यामुळे मतदान प्रक्रिया अधिकाधिक सुलभ व पारदर्शक होण्यास मदत होणार आहे.

ठाण्यात आज उद्धव ठाकरे, राज ठाकरे यांची तोफ धडाडणार अनिल ठाणेकर ठाणे: शिवसेना पक्षप्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे यांची सोमवारी, १२ जानेवारीला ठाण्यात तोफ धडाडणार आहे. दोन्ही ठाकरे बंधूं एकत्र आल्यानंतर त्यांची ठाण्यात पहिलीच संयुक्त सभा होणार असल्याने दोन्ही पक्षातील कार्यकर्ते आणि ठाणेकरांमध्ये उत्सुकता वाढली आहे. मराठी भाषा, मराठी अस्मिता, मराठी माणूस या महत्वाचा मुद्यावर आणि तत्वावर उद्धव ठाकरे आणि राज ठाकरे एकत्र आले आहेत. दोन्ही ठाकरे बंधूं एकत्र आल्याने महाराष्टात उत्साहाचे वातावरण आहे. सध्याच्या पालिका निवडणुकीत दोघे ही  ताकदीने उतरले असून महाराष्ट्राचे प्रश्न आणि सध्याची राजकीय परिस्थिती या मुद्द्यांवर दोन्ही नेते मार्गदर्शन करणार आहेत. शिवसेना (उद्धव बाळासाहेब ठाकरे) आणि मनसे यांच्यातील राजकीय समन्वयाच्या पार्श्वभूमीवर ही सभा अत्यंत महत्त्वाची मानली जात आहे. या सभेला शिवसेना, मनसे आणि राष्ट्रवादी काँग्रेसचे सर्व उमेदवार हजेरी लावणार आहेत. सभेसाठी ठाणे जिल्ह्यातून मोठ्या संख्येने पदाधिकारी, कार्यकर्ते आणि नागरिक उपस्थित राहणार आहेत. ही सभा आगामी राजकीय घडामोडींच्या दृष्टीने निर्णायक ठरण्याची शक्यता व्यक्त केली जात आहे. सोमवारी  १२ जानेवारी संध्याकाळी ठीक ६ वाजता ठाणे गडकरी रंगायतन समोर सभा पार पडणार आहे. ठाण्याच्या या सभेमुळे राज्याच्या राजकारणात मोठी उत्सुकता निर्माण झाली आहे.