भारतम्’ सांस्कृतिक कार्यक्रमातून भारतीय संस्कृतीच्या विविधतेचे दर्शन

गाझियाबाद : राजधानी दिल्लीला लागून असलेल्या गाझियाबाद येथील हिंदी भवनमध्ये एमपी फाउंडेशनच्या वतीने भव्य सांस्कृतिक कार्यक्रम ‘भारतम्’ आयोजित करण्यात आला. भारतीय कला, संगीत, नृत्य आणि संस्कृतीच्या समृद्ध परंपरेचे एकाच व्यासपीठावर सादरीकरण करणे, तसेच जनतेला आपल्या सांस्कृतिक वारशाची ओळख करून देणे हा या कार्यक्रमाचा उद्देश होता. या कार्यक्रमाचे उद्घाटन भारतीय लष्कराचे माजी लेफ्टनंट जनरल आणि अति विशिष्ट सेवा पदकाने (AVSM) सन्मानित  विष्णू कांत चतुर्वेदी तसेच ITBP चे डीआयजी  अविनेंद्र कुमार यांच्या हस्ते झाले.
कार्यक्रमात देशातील प्रसिद्ध कलाकारांनी विविध कलाविष्कार सादर केले. उस्ताद बिस्मिल्ला खान युवा पुरस्काराने सन्मानित डॉ. रिंदाना रहस्या आणि डॉ. अविनाश कुमार यांनी शास्त्रीय गायन सादर केले. ध्रुव बेदी यांनी सितारवादनाने रसिकांना मंत्रमुग्ध केले. तसेच राकेश साई बाबू यांच्या मार्गदर्शनाखाली भारतातील विविध नृत्यशैलींचे मनमोहक सादरीकरण करण्यात आले.
या कार्यक्रमाच्या माध्यमातून भारतीय कला आणि सांस्कृतिक वारशाचे जतन करण्याबरोबरच नव्या पिढीला आपल्या गौरवशाली परंपरांशी जोडण्याचा संदेश देण्यात आला. कला व संस्कृतीप्रेमी, मान्यवर नागरिक तसेच गाझियाबाद शहरातील नागरिकांसाठी एमपी फाउंडेशनने या कार्यक्रमाचे आयोजन केले होते.
कार्यक्रमाला उपस्थित रसिकांनी विविध कलाविष्कारांचा मनमुराद आनंद घेत भारतीय कला आणि संस्कृतीची समृद्ध परंपरा जाणून घेतली. एमपी फाउंडेशनच्या अध्यक्षा नूपुर श्रीवास्तव यांनी सांगितले की, “यापुढेही देशभरात अशाच प्रकारच्या सांस्कृतिक कार्यक्रमांचे आयोजन करण्यात येईल.”