दोन आपटे, दोघेही फरार

हायकोर्टाचे पोलिसांवर ताशेरे

‘बेटा पढाओ, बेटी बचाओ‘

शालेय विद्यार्थ्यांच्या सुरक्षेच्या अहवालासाठी राज्यस्तीरीय समिती

स्वाती घोसाळकर

मुंबई : बदलापूर लैंगिक अत्याचाराच्या घटना लपवल्याप्रकरणी आरोप ठेवण्यात आलेले शाळेचे सचिव तुषार आपटे आणि मालवणमधिल राजकोट किल्यावरील शिवछत्रपतींचा कोसळलेल्या पुतळ्याचे शिल्पकार कल्याणचे जयदीप आपटे हे दोघेही घटना घडल्यापासून फरार आहेत. त्यापैकी बदलापूर प्रकरणातील आपटेंसहीत इतर आरोपी फरार असल्याबाबत मुंबई उच्च न्यायालयाने राज्य सरकारला फटकारलं आहे. बदलापूर प्रकरणावरून हायकोर्टानं दाखल केलेल्या सुमोटो याचिकेवर आज उच्च न्यायालयात सुनावणी झाली. राज्यात सध्या ‘बेटा पढाओ, बेटी बचाओ’ अशी स्थिती असल्याची गंभीर टिप्पणी करतानाच बदलापूर पोलिसांच्या तपासावर ताशेरे ओढले. दरम्यान शिल्पकार जयदीप आपटेविरोधात पोलिसांनी लुकआऊट नोटीस बजावली आहे.

केस डायरीतून बदलापूर पोलीसांचा निष्काळजीपण हायकोर्टात उघड झाल्याचं पाहायला मिळालं. केवळ याच प्रकरणात नाही तर पोलीस ठाण्यात येणाऱ्या प्रत्येक तपासाकडे गंभीरतेनं पाहण्याची गरज असल्याचं सांगत हायकोर्टाने बदलापूर पोलिसांना फैलावर घेतल्याचं आजच्या सुनावणीत दिसून आलं. बदलापूर प्रकरणात आरोपपत्र घाईघाईनं दाखल करण्याची चूक करू नका. या घटनेची सखोल चौकशी करा, आणखीन माहिती समोर येण्याची शक्यता आहे, अशा सूचनाही न्यायालयाने दिल्या आहेत. तसेच, फरार आरोपींच्या शोधात अद्याप यश न येणं ही खेदाची बाब असून तपासयंत्रणेच्या कारभारावर देखील हायकोर्टाने नाराजी व्यक्त केली आहे. याप्रकरणी गुन्हा दाखल झाल्यानंतर आदर्श विद्यालयचे अध्यक्ष उदय कोतवाल, सचिव तुषार आपटे अद्यापही फरार आहेत. त्यामुळे, पोलिसांनी आरोपींना अद्यापही अटक न केल्याबद्दलही न्यायालयाने तपास यंत्रणांना विचारणा केली आहे.

दरम्यान, राज्यस्तरीय समिती स्थापन करून राज्यातील शालेय विद्यार्थ्यांच्या एकंदरीत सुरक्षेबाबतचा अहवाल सादर करण्याचे निर्देशही उच्च न्यायालयाने राज्य सरकारला दिले आहेत. तसेच, या समितीत निवृत्त न्यायमूर्ती साधना जाधव अथवा डॉ. शालिनी फणसाळकर-जोशी यांच्यासह निवृत्त आयपीएस अधिकारी डॉ. मीरा बोरवणकर यांच्या नावांचा विचार करण्याची प्रशासनाला सूचना न्यायालयाकडून देण्यात आली आहे.

 बदलापूर प्रकरणावरून हायकोर्टात दाखल सुमोटो याचिकेवर न्यायमूर्ती रेवती मोहिते-डेरे आणि न्यायमूर्ती पृथ्वीराज चव्हाण यांच्या खंडपीठापुढे सुनावणी झाली. याप्रकरणी आता पुढील सुनावणी 1 ऑक्टोबरपर्यंत तहकूब करण्यात आली आहे.

दरम्यान, छत्रपती शिवाजी महाराजांचा पुतळा कोसळल्या प्रकरणी शिल्पकार जयदीप आपटे विरोधात लुकआऊट नोटीस जारी करण्यात आली आहे. मालवण राजकोट किल्ल्यावर छत्रपती शिवाजी महाराज यांचा पुतळा उभारणारा शिल्पकार जयदीप आपटे यांच्या विरोधात मालवण पोलिस ठाण्यात गुन्हा दाखल करण्यात आल्यानंतर तो पोलिसांना गुंगारा देत असल्याने लुकआऊट नोटीस काढण्यात आली आहे. सिंधुदुर्ग पोलीस अधीक्षक सौरभकुमार अग्रवाल यांनी लुकआऊट नोटीस काढली आहे.

सध्या त्याच्या शोधार्थ ७ पथके कार्यरत आहेत. मात्र तो सापडला नसल्याने लुकआऊट नोटीस काढली आहे असे पोलिसांनी सांगितले. मालवण पोलिस निरीक्षक प्रवीण कोल्हे या प्रकरणी तपास करत आहेत. सध्या बांधकाम सल्लागार चेतन पाटील पोलिस कोठडी मध्ये आहे. त्याला पोलीस चौकशीसाठी ५ सप्टेंबर पर्यंत पोलिस कोठडी सुनावण्यात आली आहे.