रिलायन्स आणि स्टार इंडिया प्रायव्हेट लिमिटेड यांच्यामध्ये सुमारे 71 हजार कोटी रुपयांचा करार झाला. केंद्र सरकारच्या महिती आणि प्रसारण मंत्रालयाने या कराराला मंजुरी दिली आहे. या करारांर्गत रिलायन्स इंडस्ट्रिज लिमिटेड या कंपनीच्या वायकॉम 18 या उपकंपनीच्या मालकीच्या नॉन न्यूज आणि करंट अफेअर्सशी संबंधित असलेल्या चॅनेल्सचा परवाना स्टार इंडिया या कंपनीत हस्तांतरीत केला जाईल. म्हणजेच वायकॉम 18 प्रायव्हेट लिमिटेड या कंपनीकडे असलेली चॅनेल्स स्टार इंडिया प्रायव्हेट लिमिटेडकडे हस्तांतरीत केली जातील.
भारतीय प्रतिस्पर्धा आयोगाच्या (सीसीआय) अटी शर्तींच्या अधीन राहून ही संपूर्ण प्रक्रिया पार पडणार आहे. विलीनीकरणाच्या या प्रक्रियेवर भारतीय प्रतिस्पर्धी आयोगाची करडी नजर असणार आहे. ही प्रक्रिया पार पडल्यानंतर या क्षेत्रात असलेल्या अन्य प्रतिस्पर्ध्यांवर कोणताही प्रतिकूल परिणाम होणार नाही तसेच अन्य स्पर्धकांचे अधिकार सुरक्षित राहतील याची काळजी ‘सीसीआय’ घेणार आहे. या विलीनीकरणामुळे माध्यमक्षेत्रात एकाधिकाराची स्थिती निर्माण होणार नाही. तसेच सर्व चॅनेल्सच्या प्रेक्षकांना उच्च गुणवत्तेची सेवा मिळत राहील, याचीही काळजी ‘सीसीआय’कडून घेतली जाईल. ‘वायकॉम 18 प्रायव्हेट लिमिटेड’ आणि ‘स्टार इंडिया प्रायव्हेट लिमिटेड’ यांच्यात होत असलेल्या करारामुळे माध्यमक्षेत्रात मोठा बदल होणार आहे. या कराराचा परिणाम दोन्ही ब्रँडशी संबंधित असलेल्या चॅनेल्सच्या लोकप्रियतेवर होणार आहे.
या करारामुळे प्रतिस्पर्धा आणि नाविन्यालाही चालना मिळण्याची आशा आहे. ‘जिओ’ आणि ‘वायकॉम 18’ या ब्रँड्सच्या माध्यमातून ‘रिलायन्स इंडस्ट्री’चा माध्यमक्षेत्रात दबदबा राहिलेला आहे. आता रिलायन्सचा स्टार इंडियासोबत करार पूर्णत्त्वास गेल्यामुळे या दोन्ही ब्रँड्सचा प्रभाव आणखी वाढणार आहे. याआधी ‘सीसीआय’ने या कराराबाबत चिंता व्यक्त केली होती. याच कारणामुळे या कराराच्या मंजुरीला आणखी वेळ लागू शकतो, अशी शक्यता व्यक्त केली जात होती. दोन्ही ग्रुप्सकडे ‘आयपीएल’ आणि ‘आयसीसी’ क्रिकेट स्पर्धांच्या प्रसारणाचे अधिकार आहेत. सध्या वॉयकॉम 18 या ब्रँडची मालकी रिलायन्सकडे आहे. जिओ हे ओटीटी माध्यमदेखील रिलायन्सकडून चालवले जाते, तर डिस्नी हॉटस्टार हे ओटीटी माध्यम ‘स्टार इंडिया’च्या मालकीचे आहे. या करारानंतर सोनी, झी एंटरटेन्मेंट, नेटफ्लिक्स, ॲमेझॉन आदी ब्रँड्सवर नकारात्मक परिणाम पडेल, अशी चिंता ‘सीसीआय’ने व्यक्त केली होती. ‘वायकॉम 18’ आणि ‘स्टार इंडिया प्रायव्हेट लिमिटेड’ यांच्यातील करारानंतर नव्या कंपनीकडे एकूण 120 टीव्ही चॅनेल्स तसेच दोन महत्वाचे ओटीटी प्लॅटफॉर्म्स असतील.
