किन्हवलीत पोलीसांची यशस्वी कारवाई
दोन हातभट्टी दारूचे अड्डे उद्ध्वस्त, ४४ हजाराचा मुद्देमाल हस्तगत
अविनाश उबाळे
ठाणे : शहापूर तालुक्यातील किन्हवली पोलीस ठाणे अंतर्गत असणाऱ्या खरपत गाव हद्दीतील शाही नदी किनारी व नामपाडा गाव हद्दीतील शाही नदी किनारी असणाऱ्या झाडा झुडपात शनिवारी १० जानेवारीला सकाळी सहा वाजेच्या सुमारास किन्हवली पोलिसांनी छापा टाकून दोन गावठी हातभट्टी दारूचे अड्डे उद्ध्वस्त केले.
किन्हवली परिसरातील खरपत गाव हद्दीतील शाही नदीकिनारी व नामपाडा गाव हद्दीत जंगलातील झाडा झुडपात मोठ्या प्रमाणात गावठी हातभट्टीची दारू तयार करणे व विक्री करण्याचा चोरटा व गौरख धंदा सुरू असल्याची गुप्त माहिती किन्हवली पोलीसांना मिळताच उपविभागीय पोलिस अधिकारी मिलिंद शिंदे यांच्या मार्गदर्शनाखाली सहाय्यक पोलीस निरीक्षक नितीन खैरनार यांनी पोलीस हवालदार अरुण यशवंतराव,पोलिस नाईक एस बी शिंगे ,पोलीस शिपाई एन एम कंठे, सतीश शेलवले ,डी जी बेलवले यांचे पथक तयार करून शनिवारी सकाळी ६ वाजता येथे छापा टाकून सुरू असलेले दोन गावठी हातभट्टी दारूचे अड्डे उद्ध्वस्त केले.यावेळी पोलिसांनी १७ प्लास्टिकचे ड्रम व त्यात असलेले दारू बनविण्यासाठी लागणारे ७०० लिटर द्रावण (वॉश), तयार गावठी दारू असे एकूण ४४ हजार रुपये किमतीचा मुद्देमाल हस्तगत केला परंतु वाहतुकीस अवजड असल्याने ते जागीच नष्ट केले असून गावठी हातभट्टीची दारू बनविणाऱ्या दोन आरोपींवर महाराष्ट्र दारूबंदी अधिनियम ६५ (एफ)(ई) प्रमाणे गुन्हा नोंद केला असून हातभट्टी चालविणारे हे आरोपी खरपत,व नामपाडा येथील रहिवासी असल्याचे सांगण्यात येत आहे.
