मालवण- भाजपा हा पदाधिकारी व कार्यकर्त्यांना न्याय देणारा पक्ष असून, हिंदुत्वाचा विचार देशभर प्रभावीपणे पोहोचविण्याचे कार्य भाजपाने केले आहे. देशाला महासत्ता बनवायचे असेल, तर हिंदुत्वाचा विचार अधिक व्यापकपणे रुजविण्यासाठी भाजपाशिवाय पर्याय नाही, असे प्रतिपादन पालकमंत्री नितेश राणे यांनी चौके वाघवणे येथे बोलताना केले.
भारतीय जनता पार्टी, सिंधुदुर्ग यांच्यावतीने मालवण तालुक्यातील चौके वाघवणे येथील ‘नॅनी ग्रँड रिसॉर्ट’ येथे आयोजित ‘पंडित दीनदयाल उपाध्याय प्रशिक्षण महाअभियान २०२६’ अंतर्गत आयोजित प्रशिक्षण अभियान कार्यशाळेस भेट दिल्यानंतर उपस्थित कार्यकर्त्यांना मार्गदर्शन करताना ते बोलत होते. पालकमंत्री राणे यांनी यावेळी सर्वांना शुभेच्छा दिल्या.
व्यासपीठावर जिल्हाध्यक्ष प्रभाकर सावंत, जिल्हा बँक अध्यक्ष मनिष दळवी, जिल्हा परिषद अध्यक्ष प्रमोद कामत, प्रमुख वक्ते अभिजित सामंत उपस्थित होते. यावेळी बोलताना राणे म्हणाले की, आज एक कार्यकर्ता म्हणून मी आपल्या समोर उभा आहे. भाजपा कार्यकर्ता हा अभिमान आहे. कार्यकर्त्यांना न्याय देणारा पक्ष म्हणजे भाजप. कार्यकर्त्यांना दिलेला शब्द पाळला जातो तो पक्ष भाजप. एकजुटीने काम करा, आपला पक्ष मजबूत करा. कार्यकर्त्यांनी पक्षासाठी आपला वेळ द्यावा असे आवाहन त्यांनी केले.