मोरबे धरणात १७ टक्के पाणीसाठा; जुलैअखेरपर्यंत पाणीपुरवठा सुरळीत राहणार – महापौर सुजाता पाटील

पाणी बचतीचे आवाहन; मोरबे धरण व जलशुद्धीकरण व्यवस्थेची प्रत्यक्ष पाहणी
नवी मुंबई : मोरबे धरणात सध्या १७ टक्के पाणीसाठा उपलब्ध असून जुलैअखेरपर्यंत नवी मुंबईकरांना पुरेल इतके पाणी उपलब्ध असल्याने नागरिकांनी पाणीटंचाईबाबत चिंता करण्याचे कारण नाही, असे आश्वासन महापौर सुजाता पाटील यांनी दिले. मात्र यंदा कमी व उशिरा पाऊस पडण्याचा हवामान खात्याचा अंदाज लक्षात घेऊन खबरदारीचा उपाय म्हणून १० टक्के पाणीकपात लागू करण्यात आल्याचे त्यांनी स्पष्ट केले.
महापौर सुजाता पाटील यांनी पत्रकारांसह मोरबे धरण प्रकल्प, जलशुद्धीकरण केंद्र, पंपिंग स्टेशन आणि जलवितरण व्यवस्थेची प्रत्यक्ष पाहणी करून सविस्तर आढावा घेतला. यावेळी उपमहापौर दशरथ भगत, पाणीपुरवठा समिती सभापती रविकांत पाटील, आरोग्य समिती सभापती डॉ. जयाजी नाथ तसेच महापालिकेचे वरिष्ठ अधिकारी उपस्थित होते.
वनमंत्री गणेश नाईक यांच्या दूरदृष्टीतून मोरबे धरण प्रकल्प नवी मुंबई महानगरपालिकेकडे आला असून त्यामुळे शहराला स्वतंत्र जलस्रोत उपलब्ध झाला आहे. धरणाची कमाल पातळी ८८ मीटर असून सध्या पाणीपातळी ७२ मीटर आहे. योग्य नियोजन आणि पाण्याचा काटकसरीने वापर केल्यास कोणतीही अडचण भासणार नसल्याचा विश्वास महापौरांनी व्यक्त केला.
पाहणीदरम्यान महापौरांनी धरणातील पाणी प्रत्यक्ष पिऊन त्याच्या शुद्धतेची खात्री केली. मोरबे धरणातील पाणी भोकरपाडा जलशुद्धीकरण केंद्रात प्रक्रिया करून शहराला पुरविले जाते. या प्रक्रियेदरम्यान विविध स्तरांवर नियमित पाणी चाचण्या घेतल्या जात असल्याची माहिती अधिकाऱ्यांनी दिली. तसेच जलवितरण यंत्रणेवर नियंत्रण ठेवणाऱ्या ‘स्काडा’ प्रणालीचीही पाहणी करण्यात आली.
अलीकडे काही भागांत गढूळ पाणी येत असल्याच्या तक्रारी प्राप्त झाल्यानंतर महापालिकेने दररोज ६५० हून अधिक पाणी नमुन्यांची तपासणी केली असून सर्व नमुने पिण्यायोग्य आढळल्याचे स्पष्ट करण्यात आले. मुख्य जलवाहिनीवरील दोन दिवसांच्या शटडाऊननंतर पाइपलाइनमधील गाळ ढवळल्यामुळे काही ठिकाणी पाणी गढूळ झाल्याचे प्रशासनाने सांगितले. भविष्यात अशा तक्रारी आल्यास तातडीने निवारण करण्याचे निर्देश महापौरांनी पाणीपुरवठा विभागाला दिले.
उन्हाळ्यात उष्णतेचे प्रमाण वाढल्याने नागरिकांनी पुरेसे पाणी पिणे, दुपारी १२ ते ४ या वेळेत अनावश्यक बाहेर पडणे टाळणे आणि पिण्याच्या पाण्याचा अपव्यय होणार नाही याची दक्षता घेणे आवश्यक असल्याचे आवाहनही महापौर सुजाता पाटील यांनी यावेळी केले.