प्रतीती आणि मयांक विजेतेपदाच्या दिशेने

– एशियन ज्युनियर क्लासिकल बुद्धिबळ स्पर्धा
मुंबई, २५ ऑगस्ट:  मुंबईतील आयटीसी मराठा शेरेटन येथे सुरू असलेल्या एशियन ज्युनियर क्लासिकल बुद्धिबळ स्पर्धेत अव्वल मानांकित खेळाडू डब्ल्यूएफएम प्रतीती बोरदोलोई आणि जीएम-इलेक्ट (GM-elect) मयांक चक्रवर्ती यांनी आठव्या फेरीत विजय मिळवत विजेतेपदाच्या दिशेने आणखी एक पाऊल टाकले.
प्रतीतीने एफएम प्रिशिता गुप्तावर (७ गुण) महत्त्वपूर्ण विजय मिळवत आपली आघाडी एका पूर्ण गुणाने वाढवली. तिची सर्वात जवळची प्रतिस्पर्धी, तुर्कमेनिस्तानची  डब्ल्यूसीएम शोहरादोव्हा लेला हिला डब्ल्यूसीएम दक्षता कुमावतने बरोबरीवर रोखले, ज्यामुळे लेलाची गुणसंख्या ६ झाली. कझाकस्तानची डब्ल्यूएफएम मारिया खोल्याव्हको आणि डब्ल्यूसीएम श्राव्यश्री भीमारेसेट्टी यांनीही महत्त्वाचे विजय नोंदवत ६ गुणांची मजल मारली.
ओपन चॅम्पियनशिपमध्ये, मयांक चक्रवर्तीने (७ गुण) दक्ष गोयलचा पराभव करून विजेतेपदावरील आपली पकड मजबूत केली. त्याचा सर्वात जवळचा प्रतिस्पर्धी, रशियाचा आयएम आर्टेम पिंगिन याने आयएम विग्नेश अद्वैत वेमुलावर महत्त्वाचा विजय मिळवत गुणसंख्या ६.५ वर नेली.
एफएम शर्नार्थी वीरेशला आयएम अपूर्व कांबळेने बरोबरीवर रोखले आणि त्याची गुणसंख्या ६ झाली; तर एफएम माधवेंद्र प्रताप शर्माने तुर्कमेनिस्तानच्या सीएम अहमद गुबतायेव्हचा पराभव करून ६ गुण मिळवले.
आता स्पर्धेची केवळ एक फेरी बाकी असताना, मयांककडे पिंगिनपेक्षा अर्ध्या गुणाची आघाडी आहे, ज्यामुळे ओपन चॅम्पियनशिपचा शेवट रोमांचक होणार आहे. दुसरीकडे, दोन्ही गटांतील विजेतेपदाची शर्यत निर्णायक अंतिम फेरीकडे सरकत असताना, प्रतीतीकडे तिच्या सर्वात जवळच्या प्रतिस्पर्ध्यांच्या तुलनेत एका गुणाची आघाडी आहे.
फोटो कॅप्शन –
फोटो ०१: आशियाई ज्युनियर क्लासिकल बुद्धिबळ स्पर्धेत खेळताना रशियाचा आयएम आर्टेम पिंगिन.