शिवनेरी कबड्डी स्पर्धा २०२६
शिवनेरी कबड्डी महोत्सवात रिजनल स्पोर्ट्स बोर्डची दमदार कामगिरी
विवेक महिला संघाचाही मोठा विजय
अमर क्रीडा क्लब, विजय क्लब, वेस्टर्न रेल्वे, सेंट्रल रेल्वे आणि बीपीटीची प्रतिस्पर्ध्यांवर मात
मुंबई : शिवनेरी सेवा मंडळ, दादर यांच्या वतीने आयोजित शिवनेरी कबड्डी महोत्सवात कुमार, महिला आणि व्यावसायिक गटांतील सामन्यांमध्ये खेळाडूंनी दमदार चढाया आणि भक्कम पकडींच्या जोरावर प्रेक्षकांची मने जिंकली. व्यावसायिक गटात रिजनल स्पोर्ट्स बोर्डने माटुंगा वर्कशॉपवर ४२-१० असा ३२ गुणांनी विजय मिळवला. या सामन्यात रिजनल स्पोर्ट्स बोर्डच्या खेळाडूंनी माटुंगा वर्कशॉपच्या खेळाडूची केलेली पकड विशेष लक्षवेधी ठरली. या गटात वेस्टर्न रेल्वे आणि बीपीटी यांनीही प्रतिस्पर्ध्यांवर मात केली.
व्यावसायिक गटातील अन्य सामन्यांत वेस्टर्न रेल्वेने नेस्टजेन ॲकॅडमीचा ५३-३३ असा २० गुणांनी पराभव केला. वेस्टर्न रेल्वेकडून प्रणय राणे याने चढाईत, तर आकाश शर्मा याने पकडीत प्रभावी कामगिरी केली. नेस्टजेन ॲकॅडमीकडून निखिल पुजारी याने चढाईत आणि सुशांत वाघमोरे याने पकडीत योगदान दिले. सेंट्रल रेल्वेने रिझर्व्ह बँक ऑफ इंडियावर ३४-२० असा १४ गुणांनी विजय मिळवला. सेंट्रल रेल्वेकडून समीर भोगले याने चढाईत, तर राहुल परब याने पकडीत चमक दाखवली. रिझर्व्ह बँकेकडून सुमित मिसाळ आणि शंकर साळुखे यांनी अनुक्रमे चढाई आणि पकडीत प्रयत्न केले.
बीपीटीने मुंबई पोलिसांचा ४५-२० असा २५ गुणांनी पराभव केला. बीपीटीकडून अनुराग सिंग याने चढाईत, तर रूपेश साळुंखे याने पकडीत चांगली कामगिरी केली. मुंबई पोलिसांकडून विजय घाडगे याने चढाईत झुंज दिली.
कुमार गटात अमर क्रीडा मंडळाने श्रीराम क्रीडा मंडळावर ५३-३३ असा २० गुणांनी विजय मिळवला. अमरकडून साहिल बंगर याने चढाईत, तर सागर राजपूत याने पकडीत प्रभावी कामगिरी केली. श्रीरामकडून अमित सिंग याने चढाईत आणि हर्ष काळे याने पकडीत प्रतिस्पर्ध्यांना रोखण्याचा प्रयत्न केला. दुसऱ्या सामन्यात विजय क्लबने नवोदित क्रीडा मंडळाचा ३७-२८ असा नऊ गुणांनी पराभव केला. विजय क्लबकडून श्रेयान पुजारी आणि विजेंद्र यादव यांनी अनुक्रमे चढाई व पकडीत योगदान दिले. नवोदितकडून तनीक्ष चव्हाण याने चढाईत, तर विघ्नेश गुरव याने पकडीत कामगिरी केली.
महिला गटात विवेक महिला संघाने जिजामाता महिला संघावर ४२-७ असा ३५ गुणांनी मोठा विजय मिळवला. विवेककडून हरजीत संधू हिने चढाईत, तर स्विटी हिने पकडीत चांगली कामगिरी केली. जिजामाता संघाकडून वेदिका सावंत हिने चढाईत आणि कृतिका चव्हाण हिने पकडीत प्रयत्न केले. अन्य सामन्यात डॉ. शिरोडकर संघाने स्वामी समर्थ महिला संघावर ४५-२५ असा २० गुणांनी विजय मिळवला. डॉ. शिरोडकर संघाकडून साक्षी सावंत हिने चढाईत, तर श्रावणी घाडीगावकर हिने पकडीत प्रभावी कामगिरी केली. स्वामी समर्थ संघाकडून साक्षी जंगम हिने चढाईत आणि सई शिंदे हिने पकडीत योगदान दिले.
शिवनेरी कबड्डी महोत्सवातील या सामन्यांमध्ये चढाईतील चपळाई, प्रतिस्पर्ध्यांना रोखण्यासाठी केलेल्या अचूक पकडी आणि संघांच्या एकजुटीमुळे कबड्डीप्रेमींना रंगतदार खेळाचा अनुभव मिळाला.
संक्षिप्त धावफलक
अमर क्रीडा मंडळ (५३) विजयी विरुद्ध श्रीराम क्रीडा विश्वस्त (३३)
विजय क्लब (३७) विजयी विरुद्ध नवोदित संघ (२८)
विवेक महिला संघ (४२) विजयी विरुद्ध जिजामाता संघ (०७)
शिरोडकर स्पोर्ट्स क्लब (४५) विजयी विरुद्ध स्वामी समर्थ (२५)
वेस्टर्न रेल्वे (५३) विजयी विरुद्ध नेक्जीन अकादमी (३३)
सेन्ट्रल रेल्वे (३४) विजयी विरुद्ध रिजर्व बँक ऑफ इंडिया (२०)
रिजनल स्पोर्ट्स बोर्ड (४२) विजयी विरुद्ध माटुंगा वर्क शॉप (१०)
बीपीटी (४५) विजयी विरुद्ध मुंबई पोलीस (२०)
