अनिल ठाणेकर
ठाणे : मनुस्मृती आणि डॉ. बाबासाहेब आंबेडकर यांचे एकत्रित चित्र असणारे हे पोस्टर माझ्याकडून अनवधानाने फाडण्यात आले.मी याबद्दल जाहीर माफी मागतो अशी खंत ट्विट करत, राष्ट्रवादी काँग्रेस शरदचंद्र पवार पक्षाचे राष्ट्रीय सरचिटणीस, आमदार जितेंद्र आव्हाड यांनी व्यक्त केली आहे.
शालेय अभ्यासक्रमात मनुस्मृतीचां समावेश करण्याचा प्रयत्न हे सरकार करत आहे.याचा विरोध म्हणून आज महाड येथील क्रांती स्तंभ येथे मनुस्मृतीचे दहन करून याचा निषेध केला.हे करत असताना अनवधानाने माझ्याकडून एक मोठी चूक घडली. मनुस्मृतीचे निषेध करणारे पोस्टर्स काही कार्यकर्त्यांनी आणले होते.त्यावर बाबासाहेब आंबेडकर यांचे देखील चित्र होते. मनुस्मृती आणि डॉ. बाबासाहेब आंबेडकर यांचे एकत्रित चित्र असणारे हे पोस्टर माझ्याकडून, मनुविषयी असलेल्या रागाच्या भरात मनुस्मृती हे नाव वाचून अनवधानाने फाडण्यात आले.मी याबद्दल नतमस्तक होऊन जाहीरपणे माफी मागतो, गेली अनेक वर्ष डॉ.बाबासाहेब आंबेडकर यांच्या विचारांवर चालण्याचा मी प्रयत्न करत असतो ही बाब सगळ्यांना माहिती आहे. बाबासाहेबांना आयुष्यभर बाप मानलेला मी माणूस आहे. यामुळेच डॉ.बाबासाहेबांचा माझ्याकडून अनवधानाने झालेला हा अवमान माझ्यादेखील जिव्हारी लागलेला आहे. याबद्दल मला वाईट वाटत आहे. माझे भाषण जयभीम शिवाय संपत नाही. मी आजवर कोणत्याच बाबींवर माफी मागितलेली नाही. मी कायमच माझ्या भूमिकेवर ठाम राहून ती निभावलेली आहे. आज मी माफी मागतोय, कारण हा माझ्या बापाचा अवमान माझ्याकडून झालेला आहे. सर्व आंबेडकर प्रेमी मला माफ करतील, हा विश्वास आहे. या प्रकरणी राजकारण करणारे दुर्दैवाने मनुबद्दल बोलत नाहीत. यावरुन त्यांना बाबासाहेबांद्दल किती प्रेम आहे हे दिसून येते. पण मी मनुस्मृती जाळताना अनवधानाने ही चूक झाली. पुढच्या आठवड्यात मी पुन्हा एकदा मनुस्मृती जाळणार आहे, असे आमदार जितेंद्र आव्हाड यांनी म्हटले आहे.