Category: ठाणे

भाजप, शिवसेना, काँग्रेस, राष्ट्रवादीचे नेते नरेंद्र पवार, महेश गायकवाड यांचे उमेदवारी अर्ज दाखल कल्याण : महायुती, महाविकास आघाडीचे नेते कल्याण पूर्व, पश्चिमेतील विधानसभेसाठी इच्छुक नाराज पदाधिकाऱ्यांची समजूत काढण्यास अपयशी ठरले आहेत. त्यामुळे भाजपचे नरेंद्र पवार, शिंदे शिवसेनेचे शहरप्रमुख महेश गायकवाड यांनी पक्षश्रेष्ठींकडून होणाऱ्या कारवाईची तमा न बाळगता सोमवारी आपले उमेदवारी अर्ज निवडणूक अधिकाऱ्यांना दाखल केले. सोमवार मुहुर्ताचा चांगला दिवस असल्याने भाजपचे नरेंद्र पवार यांनी अपक्ष म्हणून कल्याण पश्चिमेतून उमेदवारी अर्ज दाखल केला. मंगळवारी नरेंद्र पवार शक्तिप्रदर्शन करत आपल्या कार्यकर्त्यांसह दुसरा उमेदवारी अर्ज दाखल करणार आहेत. या उमेदवारी अर्जामुळे भाजपमध्ये बंडखोरी झाल्याचे स्पष्ट झाले आहे. भाजपचे प्रदेश नेते पवार यांची समजूत काढण्यात अपयशी ठरले आहेत. पाच वर्षापूर्वी नरेंद्र पवार यांनी कल्याण पश्चिमेतून भाजपमधून बंडखोरी करत अपक्ष म्हणून निवडणूक लढवली होती. भाजप, संघाचा मोठा मतदार या मतदारसंघात आहे. ही ताकद ओळखून पवार यांनी पक्ष कारवाईची तमा न बाळगता उमेदवारी अर्ज भरण्याची तयारी केली. तीन वर्षापासून पवार कल्याण पश्चिम मतदारसंघात विविध प्रकारचे उपक्रम राबवून जनसंघटन करत होते. या बळावर आपण ही निवडणूक लढवित असल्याचे नरेंद्र पवार यांनी सांगितले. पवार यांची उमेदवारी महायुतीचे कल्याण पश्चिमेतील उमेदवार विश्वनाथ भोईर यांची डोकेदुखी वाढविणारी आहे. या मतदारसंघात उध्दव बाळासाहेब ठाकरे पक्षातून अभ्यासू, माजी नगरसेवक सचिन बासरे निवडणूक लढवित आहेत. या मतदारसंघातून शहरप्रमुख रवी पाटील इच्छुक होते. मुख्यमंत्री एकनाथ शिंदे शिवसेनेतून बाहेर पडल्यावर भोईर यांनी त्यांच्या एकनिष्ठ राहण्याची भूमिका घेतली. त्याची पोचपावती म्हणून त्यांना पुन्हा उमेदवारीच्या माध्यमातून मिळाली आहे. कल्याण पूर्वेतून महायुतीच्या उमेदवार म्हणून सुलभा गायकवाड निवडणूक रिंगणात आहेत. या मतदारसंघातून शिंदे शिवसेनेच्या एकाही इच्छुकाने उमेदवारी अर्ज दाखल करू नये असे शिवसेना वरिष्ठांचे आदेश होते. या आदेशामुळे काही इच्छुक शांत झाले. आमदार गणपत गायकवाड यांनी केलेल्या गोळीबारामुळे दुखावलेले शिंदे शिवसेनेचे शहरप्रमुख महेश गायकवाड यांनी मात्र पक्षादेश बाजुला ठेवत सोमवारी शक्तिप्रदर्शन करत उमेदवारी अर्ज दाखल केला. काँग्रेसचे जिल्हाध्यक्ष सचिन पोटे, राष्ट्रवादी काँग्रेसचे सुधीर पाटील या महाविकास आघाडीच्या पदाधिकाऱ्यांनी कल्याण पूर्वेतून निवडणूक लढविण्याची तयारी केली आहे. दोघांनीही कल्याणमध्ये काँग्रेसला उमेदवारी न देण्यात आल्याने पदाचे राजीनामे दिले आहेत. कोट पंधरा वर्ष कल्याण पूर्वेचे शोषण झाले. सामान्य लोकांना आता विकास पाहिजे म्हणून त्यांच्या मागणीप्रमाणे आपण ही निवडणूक लढवित आहोत. ठाकरे गटाच्या यापूर्वीच्या उमेदवाराला आताच्या महायुतीच्या उमेदवाराने मदत केली होती. त्यामुळे बंडखोरीची भाषाला आम्हाली कोणी शिकवू नये. महेश गायकवाड– शहरप्रमुख, शिंदे शिवसेना. कोट महेश गायकवाड यांच्या उमेदवारी अर्ज दाखल करण्याच्या मिरवणुकीत शिवसेनेच्या कोणीही कार्यकर्ता, पदाधिकाऱ्यांनी सामील होऊ नये. महायुतीचा धर्म सर्वांनी पाळायचा आहे. जे या मिरवणुकीत सहभागी झाल्याचे दिसतील त्यांच्यावर कारवाई केली जाईल. गोपाळ लांडगे- जिल्हाप्रमुख, शिंदे शिवसेना.  

फेरीवाला, अतिक्रमण नियंत्रण पथकातील कामगार बदली प्रकरण कल्याण –कल्याण डोंबिवली पालिकेतील अनेक वर्ष एकाच प्रभागात ठाण मांडून बसलेल्या दहा प्रभागातील फेरीवाला हटाव, अतिक्रमण नियंत्रण पथकातील १३४ कामगारांच्या बदल्या अतिरिक्त आयुक्त हर्षल गायकवाड यांनी केल्या आहेत. हे…

ठाणे : निवडणुकीच्या काळात जिल्हाधिकारी कार्यालयाच्या परवानगीशिवाय लागलेले सर्व प्रकारचे दिवाळी शुभेच्छा किंवा त्याप्रकारचे अनधिकृत फलक, पोस्टर्स यावर सर्व सहाय्यक आयुक्तांनी तत्काळ कारवाई करावी. काही ठिकाणी त्या फलकांचे सांगाडे (तात्परुत्या फ्रेम) कायम असल्याचे निर्दशनास आले आहेत. फलकांचे सांगाडेही काढण्यात यावेत, असे निर्देश महापालिका आयुक्त सौरभ राव यांनी दिले आहेत. ठाणे महापालिकेच्या नागरी संशोधन केंद्र येथे सोमवारी झालेल्या विभागप्रमुखांच्या बैठकीत आयुक्त सौरभ राव यांनी अनधिकृत फलकांबाबत कठोर कारवाईचे आदेश दिले. आचारसंहिता लागू झाल्यानंतर महापालिका क्षेत्रात मोठ्या प्रमाणावर करावाई करून सगळे फलक, पोस्टर्स काढून घेण्यात आले होते. आता दिवाळीचे दिवस असल्याने पुन्हा एकवार शुभेच्छांसाठी फलक लावले जाण्याची शक्यता आहे. ज्या फलकांना जिल्हाधिकारी कार्यालयाची परवानगी असेल, त्यांनाच असे शुभेच्छा फलक लावता येतील, असेही आयुक्त राव यांनी स्पष्ट केले. या बैठकीस, अतिरिक्त आयुक्त (१) संदीप माळवी, अतिरिक्त आयुक्त (२) प्रशांत रोडे, नगर अभियंता प्रशांत सोनाग्रा यांच्यासह सर्व उपायुक्त, परिमंडळ उपायुक्त, सहाय्यक आयुक्त, विभागप्रमुख उपस्थित होते. उपायुक्त (मुख्यालय) जी. जी. गोदेपुरे यांनी बैठकीतील सादरीकरणाचे संचालन केले. मतदारांच्या सोयीच्या दृष्टीने सर्व निवडणूक निर्णय अधिकारी यांच्याशी समन्वय ठेवून मतदारांसाठी आवश्यक तेथे रॅम्प, शौचालय सफाई, पिण्याच्या पाण्याची व्यवस्था यांचे नियोजन करावे. मतदारांची गैरसोय होणार नाही, याची दक्षता घ्यावी, असे आयुक्त राव यांनी सांगितले. दिवाळीची सुटी लक्षात घेऊन दैनंदिन साफसफाई, सार्वजनिक शौचालयांची सफाई, पाणी पुरवठा या व्यवस्था सुरळीत राहतील याची काळजी संबंधित विभागाने घ्यावी. त्याचबरोबर, बांधकाम प्रकल्पांच्या परिसरातील रस्ते, चिखल आणि धूळीने भरत असल्याच्या नागरिकांच्या तक्रारी येत आहेत. शहर विकास विभागाने सर्व बांधकाम व्यावसायिकांना परिसरातील रस्ते खराब होणार नाहीत, त्यावर वेळोवेळी पाण्याची फवारणी होईल याविषयी पुन्हा सूचना द्याव्यात, असेही आयुक्त राव म्हणाले.

रॅलीला हजारो नागरिकांची गर्दी मुरबाड : मुरबाड विधानसभा मतदारसंघात राष्ट्रवादी काँग्रेससह महाविकास आघाडीचे उमेदवार सुभाष गोटीराम पवार यांनी मोठ्या शक्तीप्रदर्शनात खासदार सुरेश उर्फ बाळ्यामामा म्हात्रे यांच्यासह हजारो कार्यकर्त्यांच्या उपस्थितीत उमेदवारी अर्ज दाखल केला. त्यानिमित्ताने मुरबाड शहरातील वातावरण महाविकास आघाडीमय झाल्याचे पाहावयास मिळाले. मुरबाड विधानसभा मतदारसंघात राष्ट्रवादी काँग्रेस शरदचंद्र पवार गटाचे सुभाष पवार यांना उमेदवारी दिल्याने महायुतीपुढे आव्हान निर्माण झाले आहे. महाविकास आघाडीच्या हजारो कार्यकर्त्यांच्या उपस्थितीत मुरबाड मधील कुणबी भवन येथून रॅलीला सुरुवात झाली. बेंजो, ब्रास बॅण्ड, ढोलच्या गजरात शहराच्या विविध भागातून रॅली निघाली. छत्रपती शिवाजी महाराज व डॉ. बाबासाहेब आंबेडकर यांच्या पुतळ्याला पुष्पहार अर्पण करण्यात आला. त्यानंतर संतोषी माता मंदिराच्या मैदानात रॅली पोहोचल्यावर झालेल्या जाहीर सभेत मुरबाड मतदारसंघात परिवर्तन घडविण्याचे आवाहन करण्यात आले. या रॅलीच्या निमित्ताने मुरबाड तालुक्याने इतिहासातील सर्वात मोठी रॅली अनुभवली. राष्ट्रवादी काँग्रेसचे खासदार बाळ्यामामा म्हात्रे, लोकनेते आमदार गोटीरामभाऊ पवार, शिवसेनेचे उपनेते अल्ताफ शेख, उमेदवार सुभाष पवार,  राष्ट्रवादी काँग्रेस शरदचंद्र पवार पक्षाचे प्रवक्ते महेश तपासे,  जिल्हाध्यक्ष विद्याताई वेखंडे, कॉंग्रेसचे बदलापूर शहर अध्यक्ष संजय जाधव, मुरबाड तालुकाध्यक्ष चेतनसिंह पवार, आरपीआयचे जिल्हाध्यक्ष रवींद्र चंदने, शिवसेना उद्धव ठाकरे पक्षाचे ज्येष्ठ नेते मधुकर घुडे, संतोष विशे, राष्ट्रवादी कॉंग्रेस शरदचंद्र पवार पक्षाचे बदलापूरचे प्रभारी अध्यक्ष कालिदास देशमुख, विश्वनाथ जाधव, जयराम मेहेर, लियाकत शेख, सुधीर पष्टे, मार्क्सवादी कम्युनिस्ट पक्षाच्या कविता वरे आदी उपस्थित होते. मुरबाड हा सुसंस्कृत मतदारसंघ म्हणून ओळखला जात होता. मात्र, गेल्या १५ वर्षात मतदारसंघाचे नुकसान झाले. बदलापूर शहरात पाणी, वीज आदी प्रश्न तीव्र आहेत. गेल्या १५ वर्षांत फुटले नव्हते, तेवढे नारळ प्रथमच फोडले गेले, अशी टीका उमेदवार सुभाष पवार यांनी केली. मुरबाड शहरातील भव्य रॅलीने मतदारांमधील उत्साह अनुभवता आला, याबद्दल लोकनेते गोटीराम पवार यांनी कौतुक केले. लोकसभेप्रमाणेच विधानसभा निवडणुकीतही मतदारांनी ताकद दाखवावी. पक्षाध्यक्ष शरद पवार यांचा आदेश अंतिम असून, आता अशक्य काहीही नाही. सर्व कार्यकर्त्यांनी प्रामाणिकपणे मेहनत घेऊन सुभाष पवार यांना विजयी करावे, असे आवाहन खासदार सुरेश उर्फ बाळ्यामामा म्हात्रे यांनी केले आहे.

अनिल ठाणेकर ठाणे : नॅशनल रेल्वे मजदूर युनियनला पुन्हा मान्यता  मिळविण्यासाठी ४  ते ६  डिसेंबर २०२४  दरम्यान निवडणूक  होणार असून,  या निवडणुकीचे नामांकन अर्ज २५ ऑक्टोबर २०२४  रोजी छत्रपती शिवाजी महाराज टर्मिनल  येथील महाप्रबंधक कार्यालयात  कामगारांच्या उपस्थित भरण्यात आले, अशी माहिती कामगार नेते मारुती विश्वासराव यांनी दिली. भारतात रेल्वे कामगारांची संख्या जवळजवळ अकरा लाख असून, मध्य रेल्वेच्या कामगारांची संख्या जवळपास एक लाख आहे.  या उद्योगात कामगार कायद्यानुसार  युनियन मान्यतेसाठी गुप्त मतदान पद्धतीने निवडणूक केली जाते. या उद्योगात  नॅशनल रेल्वे मजदूर युनियनला पुन्हा मान्यता  मिळविण्यासाठी ४  ते ६  डिसेंबर २०२४  दरम्यान निवडणूक  होणार असून,  या निवडणुकीचे नामांकन अर्ज २५ ऑक्टोबर २०२४  रोजी छत्रपती शिवाजी महाराज टर्मिनल  येथील महाप्रबंधक कार्यालयात  कामगारांच्या उपस्थित भरण्यात आले. याप्रसंगी नॅशनल रेल्वे मजदूर युनियनचे पदाधिकारी व सक्रिय कार्यकर्त्यांनी सीएसटी येथे मोर्चा नेऊन आपले शक्तिप्रदर्शन केले. मिटिंग सुरू होण्यापूर्वी प्लॅटफॉर्म क्रमांक ७  आणि ८ पासून DRM कार्यालय मार्गे उपनगरीय लॉबीपर्यंत कामगार मोर्चाने गेले, त्या ठिकाणी छत्रपती शिवाजी महाराज आणि भारतरत्न डॉ.  बाबासाहेब आंबेडकर यांच्या पुतळ्यांना  ऑल इंडिया रेल्वे फेडरेशनचे (AIRF)  महामंत्री  कॉ.  शिवगोपाल मिश्राजी आणि नॅशनल रेल्वे मजदूर युनियन ( NRMU ) व  कोकण रेल्वेचे महामंत्री (CRKR) कॉ. वेणू पी. नायरजी यांनी पुष्पहार अर्पण केला, त्यानंतर जनरल मॅनेजर ऑफिस कंपाऊंड क्षेत्राकडे  मोर्चा पुढे जाऊन मिटिंग सुरू झाली. नॅशनल रेल्वे मजदूर युनियनचे  महामंत्री कॉ.  वेणू नायरजी यांनी आपल्या तेजस्वी भाषणातून  चांगला संदेश देऊन  रेल्वे कामगारांचा उत्साह वाढविला.  त्यानंतर ऑल इंडिया रेल्वे फेडरेशनचे महामंत्री कॉ.  शिवगोपाल मिश्राजी यांनी सरकारची सद्यस्थिती, युनियनची गरज आणि पेन्शन योजनेच्या  UPS  गोंधळाबद्दल बोलून इंटक प्रणित संघटना कामगारांच्या पाठीत   खंजीर खुपसते.  उदा.  १९६०,१९७४  चा संप फोडून सरकारची लॉयल्टी व आपल्या मुलांना रेल्वेत नोकरीत सामावून घेतले. AIRF/ NRMU ला 100 वर्षाचा इतिहास या युनियनला आहे. UPS मध्ये राहिलेले मुद्दे सुद्धा चर्चेद्वारे सोडविले जातील याची हमी यावेळी त्यांनी कामगारांना दिली व ज्या कर्मचाऱ्यांना आपल्या निवडीनुसार UPS किंवा NPS घेण्यासाठी ऑप्शन देण्यात आले आहे त्यांनी ऑप्शन देताना विचार पूर्वक निवड करावी हे सुद्धा सांगितले आहे.NRMU व AIRF सारख्या संघर्षशील युनियनची कर्मचार्‍यांना गरज का आहे.  हे स्पष्ट केले.नॅशनल रेल्वे मजदूर युनियनच्या अध्यक्षा कॉ.  कामाक्षी बागलवाडीकर यांनी सर्वांचे आभार  मानले. रेल्वे मुख्यालय व विभागातील सर्व पदाधिकारी, युवा, महिला कॉम्रेड,  सर्व DC चे पदाधिकारी आणि विभागातील सर्व सक्रिय सदस्यांनी या मिटिंगमध्ये  सहभाग घेतल्यामुळे मिटींगला हजारोच्या संख्येने उपस्थिती होती . याप्रसंगी ऑल इंडिया रेल्वेमेन्स फेडरेशनचे झोनल सचिव कॉ. जे. शिंदे,  नॅशनल  रेल्वे मजदूर युनियनचे सर्व सहाय्यक सचिव कॉ. विवेक नायर, कॉ. पी. टी. एस. राजा, कॉ. श्याम नायक, कॉ. बी.एल. यादव, कॉ. विनय सावंत कॉ. संतोष कुमार, कॉ. आर. के. मलबारी, WP, सर्व मंडळाचे अध्यक्ष, मंडळ सचिव, युवा महिला, शाखा पदाधिकारी आणि सक्रिय कार्यकर्ते यांच्या साक्षीने नॅशनल रेल्वे मजदूर युनियनने मान्यतेच्या निवडणुकीसाठी नामांकन मध्य रेल्वेचे प्रधान मुख्य कार्मिक अधिकारी सहर्ष बाजपेयी यांना दिले.

अनिल ठाणेकर  ठाणे : ठाणे शहर विधानसभा मतदार संघाचे भाजप, शिवसेना, राष्ट्रवादी (अजितदादा गट) आणि रिपाई (आ) महायुतीचे उमेदवार संजय केळकर यांच्या खोपट येथील मध्यवर्ती निवडणुक कार्यालयाचे उद्घाटन भाजपा नेते रविंद्र चव्हाण यांच्या हस्ते…

कल्याण : कल्याण (पश्चिम) विधानसभाअंतर्गत नियंत्रण कक्षाचा १८००-२३३-०११७ हा टोल फ्री क्रमांक नागरिकांसाठी २४ तास उपलब्ध केला आहे. हा टोल फ्री क्रमांक कार्यान्वित असून कल्याण (पश्चिम) विधानसभा मतदारसंघांतर्गत नागरिकांसाठी आदर्श आचारसंहिता भंगाच्या तक्रारी व निवडणुकीसंदर्भातील इतर तक्रारी टोल फ्री क्रमांकावर नोंदवाव्यात, असे आवाहन निवडणूक निर्णय अधिकारी रोहितकुमार राजपूत यांनी केले आहे. 00000

 सुवर्णमहोत्सवी कुमार व मुली राज्य अजिंक्यपद व निवड चाचणी खो-खो स्पर्धा  धाराशिव, जालना, सांगली, बीड, नाशिक यांचेही विजय धाराशिव : सोलापूर, रत्नागिरी व नाशिक या संघाच्या कुमार व मुली संघाने सुवर्ण महोत्सवी ५० वी कुमार व मुली राज्य अजिंक्यपद व निवड चाचणी खो खो स्पर्धेची विजयी सलामी दिली. महाराष्ट्र खो-खो असोसिएशन व उस्मानाबाद जिल्हा खो खो असोसिएशन यांच्या संयुक्त विद्यमाने ही स्पर्धा ३० ऑक्टोबरपर्यंत जिल्हा शिक्षण व प्रशिक्षण संस्थेच्या मैदानावर आयोजित केली आहे. रविवारी सुरू झालेल्या या स्पर्धेत सलामीच्या दिवशी सर्व सामने एकतर्फी झाले. सोलापूरच्या मुलांनी जालन्यावर २१-८ व मुलीनी बीडवर १७-५ असा एक डाव राखून दणदणीत विजय मिळविला. रत्नागिरीच्या मुलांनी लातूरचा १७-७ व मुलींनी नांदेडचा १९-६ असा एक डावाने धुव्वा उडवला. नाशिकच्या मुलांनी हिंगोलीला २६-४ तर मुलींनी नंदुरबारला २०-४ असे एका डावाने नमवले. मुलींच्या गटात धाराशिव, जालना व मुलांच्या गटात सांगली, बीड  यांनीही प्रतिस्पर्धी संघावर शानदार विजय मिळविले. चमकलेले खेळाडू :  कुमार : अहिल्यानगर (मच्छिंद्र वाघमारे, (३.१० मिनिटे संरक्षण व ६ गुण), रत्नागिरी (आशिष बालाडे ६ व ३ मिनिटे नाबाद),बीड (अभिषेक हिवाळे ३.५० मि. व २ गुण), सांगली (प्रेम दळवी१ मि.नाबाद व ८ गुण), सोलापूर (कृष्णा बनसोडे २.३५मि. व ३ गुण), (शुभम चव्हाण, ३ मि. नाबाद व २ गुण). मुली : सोलापूर (समृद्धी सुरवसे ४.२०मि.), (अनुष्का पवार, ५ गुण), रत्नागिरी (मृण्मयी नागवेकर ४.२० मि.), (युवा पालवे, ५ गुण) नाशिक (तेजल सहारे, ५.१० मि. व ५ गुण), धाराशिव (अश्विनी शिंदे, ३मि. व ४ गुण), प्रणाली काळे (१.३० नाबाद , ३.३० व २ गुण). अन्य निकाल : कुमार : अहिल्यानगर विजयी विरुद्ध नांदेड २२-८ एक डावाने, बीड विजयी विरुद्ध परभणी १२-११ (७.३० मिनिटे राखून), सांगली विजयी विरुद्ध जळगाव २२-८ एक डावाने. मुली : जालना विजयी विरुद्ध हिंगोली १२-२ एक डावाने, धाराशिव विजयी विरुद्ध परभणी १२-६ एक डावाने, पालघर विजयी विरुद्ध जळगाव १२-५ एक डावाने.…

माथेरान : कर्जत खालापूर विधानसभा क्षेत्रावर तब्बल पंचवीस वर्षे राज्य केलेल्या राष्ट्रवादीचे अस्तित्व संपल्याचे या निवडणुकीमध्ये दिसून आले असून अनेक वर्षे सत्ता भोगलेल्या राष्ट्रेवादीचा एकही उमेदवार यावेळी रिंगणात नसल्याने राष्ट्रवादी काँग्रेसचे अस्तित्व संपले की काय अशा चर्चा होताना दिसून येत आहेत. माजी आमदार सुरेश लाड यांच्या स्वरूपात राष्ट्रवादीला कर्जत मध्ये एक मोठा सक्षम चेहरा लाभला होता ज्याने येतील राष्ट्रवादी वाढविण्यास व आपले अस्तित्व राखण्यामध्ये मोलाची भूमिका बजावली होती परंतु पक्षांतर्गत घडामोडीनंतर त्यांना नाईलाजाने भाजपामध्ये जावे लागले व त्यानंतर राष्ट्रवादीमध्ये ही दोन गट पडल्याने कर्जत मधील राष्ट्रवादी खिळखिळी होत चालली होती परंतु  सुधाकर घारे यांनी मागील दोन अडीच वर्षांमध्ये राष्ट्रवादी अजित पवार गट यामार्फत राष्ट्रवादी जिवंत ठेवण्याचे काम केले होते व या काळात राष्ट्रवादीने चांगली घोडदोड ही केली होती त्यांच्या मागे राष्ट्रवादी रायगडचे खासदार श्री सुनील तटकरे असल्याने ते लवकरच या विधानसभा क्षेत्रात उमेदवार म्हणूनही उदयास आले. राष्ट्रीवादी मध्ये दोन गट पडल्यानंतर राष्ट्रवादी जरी कमजोर झाली असली तरी आपले अस्तित्व टिकवून होती व या विधानसभा जागेवर आपला हक्क राखून होती परंतु युती आघाडीच्या स्वरूपात या जागा दोन्ही शिवसेनेला गेल्याने राष्ट्रवादीमध्ये बंड पाहावयास मिळाले व खालापूर कर्जत मधील सर्व पदाधिकारी व कार्यकर्त्यांनी सामूहिक राजीनामा घेत राष्ट्रवादी ला सुरुंग लावला त्याचे पडसाद हळूहळू कर्जत मधील सर्वच विभागात दिसून येत असून अनेक ठिकाणी पक्ष प्रवेशाची मालिका सुरू झाली असून त्याचा सर्वात मोठा फटका राष्ट्रवादीलाच बसत आहे. या विधानसभा क्षेत्राचा केंद्रबिंदू कर्जत ठरत असल्याने सर्व घडामोडी येथेच घडत आहेत व त्याचे पडसाद पूर्ण तालुक्यामध्ये दिसून येत असतात सध्या शिवसेना उद्धव ठाकरे गटाचे नितीन सावंत तर शिंदे गटाचे विद्यमान आमदार  महेंद्र थोरवे यांच्यामध्ये सरळ सरळ लढत आहे परंतु राष्ट्रवादी सोडून अपक्ष म्हणून उमेदवारी जाहीर केलेल्या सुधाकर घारे यांनी मोठे आव्हान उभे केले असून या विधानसभा क्षेत्रामध्ये धक्का तंत्र देण्याचे काम ते करतात का हे पाहावे लागणार आहे. सध्या शरद पवार राष्ट्रवादी गट शांत असल्याचे दिसून येत आहे त्यामुळेच कर्जत मध्ये राष्ट्रवादीचे अस्तित्व संपले की काय अशा चर्चा रंगू लागल्या आहेत. अनेक वर्षे कर्जत खालापूर विधानसभा मतदारसंघावरती राज्य केलेल्या राष्ट्रवादीचे अशी वाताहत का झाली व यास कारणीभूत कोण याबाबत जनता अनेकांना दोषी ठरवत असून अति महत्वकांक्षाच्या हव्यासापोटी राष्ट्रवादीच्या बालेकिल्लाचा बुरुज आज ढासळला आहे. 00000

ठाणे : ठाण्यातील  सिंधुदुर्ग सामाजिक मंडळ व दिलीप बारटक्के यांच्या संयुक्त विद्यमाने यंदा ३ ते १० नोव्हेंबर २०२४ दरम्यान सावरकरनगर येथे भव्य स्वरूपाच्या कोकण महोत्सवाचे आयोजन करण्यात आले आहे. कोकण महोत्सवाचे यंदा १७ वे वर्ष असून विविध प्रकारच्या कार्यक्रमांचा त्यात समावेश आहे. स्वातंत्र्यवीर सावरकरनगर येथील ठा म पा शाळा क्रमांक १२० च्या मैदानात होणाऱ्या या महोत्सवात दररोज सायंकाळी सायं ६ ते रात्री ९:३० च्या दरम्यान  रोज ५ पारंपरिक दशावतार नाटके,  कोकणरत्न पुरस्कार, खेळ पैठणीचा, गुणवंत विद्यार्थी सत्कार, मुलांसाठी फनफेअर, कोकण खाद्यपदार्थांचे स्टॉल. अशांची मेजवानी असेल.खाद्यपदार्थ स्टॉलवर झणझणीत म्हावरा, अस्सल चवीचो मालवणी मसालो, खडखडे लाडू, मालवणी खाजा, कुळदाची पिठी, सुकी मच्छी, मासे, कोकम,  काजू, आंबा अशा विविध प्रकारच्या स्टॉलचा समावेश असणार आहे.या महोत्सव ठिकाणी विशेष आकर्षण म्हणजे मालवण तालुक्यातील  साळेल-नांगरभाट गावातील श्री गिरोबा  मंदिराची प्रतिकृती  साकारण्यात येणार आहे. या महोत्सवाला दरवर्षी  दीड ते दोन लाख नागरिक, कोकणप्रेमी, साहित्यिक, सांस्कृतिक क्षेत्रांत कार्यरत असणारे, कलाकार भेट देतात. या महोत्सवात सादर होणाऱ्या पारंपरिक मालवणी दशावतार प्रयोगाला दरवर्षी तुफान गर्दी होत असते. यंदा रविवारी ३ नोव्हेंबरला प्रेरणा कला संस्था निर्मित  “मला काही सांगायचंय!” मी अनाथांचा नाथ एकनाथ हा नाट्यप्रयोग होईल.लेखक- डॉ.प्रा.प्रदीप ढवळ,रंगावृत्ती -अशोक समेळ, डॉ.प्रा.प्रदीप ढवळ, दिग्दर्शक- अशोक समेळ निर्माता- प्रा. मंदार टिल्लू, प्रमुख कलाकार- संग्राम समेळ.सोमवार ४ नोव्हेंबरला   देवेंद्र नाईक प्रस्तुत चेंदवणकर दशावतार नाट्यमंडळ, चेंदवण आयोजित  ट्रिकसिनयुक्त महान पौराणिक “दशावतारी नाट्य प्रयोग क्षेत्रपाल श्री देव वेतोबा नाट्यप्रयोग होईल.५ नोव्हेंबरला लोकराजा, नटसम्राट कै. सुधीर कलिंगण प्रस्तुत, कलेश्वर दशावतार नाट्य मंडळ, नेरुर-कुडाळ आयोजित ट्रिकसिनयुक्त दशावतारी नाट्यप्रयोग ‘व्यंकटेश पद्मावती’ सादर होईल. बुधवार ६ नोव्हेंबर रोजी  सुधाकर दळवी प्रस्तुत चेंदवणकर-गोरे पारंपरिक दशावतार नाट्य मंडळ कवठी, ता. कुडाळ, जि. सिंधुदुर्ग आयोजित ‘मुंबईची मुंबादेवी’ हा दशावतारी नाट्यप्रयोग होईल. ७ नोव्हेंबरला शरद मोचेमाडकर प्रस्तुत जय हनुमान पारंपरिक दशावतार नाट्यमंडळ, दांडेली, आरोस, ता. सावंतवाडी आयोजित पौराणिक नाट्यप्रयोग ‘विंद्यवासिनी विंदेश्वरी’ सादर होईल. ८ नोव्हेंबर रोजी भाई कलिंगण प्रस्तुत बाबी कलिंगण कलेश्वर दशावतार नाट्य मंडळ, कुडाळ आयोजित दशावतारी नाट्यप्रयोग ‘मुक्त झाली भानुमति’ सादर होईल. शिवाय, ज्येष्ठ नागरिक आणि विद्यार्थी गुणगौरव सोहळा, खेळ पैठणीचा,  भजनाची डबलबारी, महाराष्ट्राची लोकधारा लोकगीते आणि नृत्ये असे भरगच्च कार्यक्रम आयोजित करण्यात आले आहेत. ‘या कोकण महोत्सवाक यवकच होया’, असे आवाहन सिंधुदुर्ग सामाजिक मंडळ व आयोजक दिलीप बारटक्के यांनी केले आहे. ०००००