मुंबई, ११ जून : प्रख्यात बासरीवादक आणि ग्रॅमी पुरस्कार विजेते राकेश चौरसिया यांना २०२४-२५ या वर्षासाठीचा प्रतिष्ठेचा संगीत नाटक अकादमी पुरस्कार जाहीर झाला आहे. भारतीय रंगकला आणि संगीत क्षेत्रातील हा देशातील सर्वोच्च राष्ट्रीय सन्मानांपैकी एक मानला जातो. भारतीय शास्त्रीय संगीत क्षेत्रातील उल्लेखनीय योगदान तसेच भारतीय बासरीवादनाची समृद्ध परंपरा जगभरातील रसिकांपर्यंत पोहोचविण्यासाठी केलेल्या असामान्य कार्याची दखल घेत हा पुरस्कार त्यांना प्रदान करण्यात आला आहे.
आपल्या अप्रतिम वादनकौशल्य, नावीन्यपूर्ण दृष्टिकोन आणि कलेप्रती असलेल्या निष्ठेमुळे राकेश चौरसिया यांनी जागतिक संगीतविश्वात स्वतंत्र आणि मानाचे स्थान निर्माण केले आहे. जागतिक कीर्तीचे बासरीवादक पंडित हरिप्रसाद चौरसिया यांचे पुतणे आणि शिष्य असलेल्या राकेश चौरसिया यांनी आपल्या मैफिली, विविध कलाकारांसोबतच्या सहयोगी उपक्रम आणि ध्वनिमुद्रणांमधून आंतरराष्ट्रीय स्तरावर विशेष ओळख निर्माण केली आहे. त्यांच्या ग्रॅमी पुरस्कार विजेत्या कामगिरीमुळे जागतिक संगीत क्षेत्रात भारताचा गौरव अधिक उंचावला असून भारतीय शास्त्रीय संगीताला व्यापक मान्यता मिळाली आहे.
हा सन्मान जाहीर झाल्यानंतर आनंद व्यक्त करताना राकेश चौरसिया म्हणाले, “२०२४-२५ या वर्षाचा प्रतिष्ठेचा संगीत नाटक अकादमी पुरस्कार मिळाल्यामुळे मी स्वतःला अत्यंत भाग्यवान समजतो. या सन्मानासाठी माझी निवड केल्याबद्दल मी परीक्षक मंडळातील सर्व सदस्यांचा मनःपूर्वक आभारी आहे. माझ्या कारकिर्दीतील हा पहिलाच शासकीय पुरस्कार असल्याने हा आनंद अधिक विशेष आहे. हा सन्मान स्वीकारताना मला अत्यंत अभिमान आणि कृतज्ञता वाटत आहे.’
भारताची राष्ट्रीय संगीत, नृत्य आणि नाट्य अकादमी असलेल्या संगीत नाटक अकादमीतर्फे देशाच्या सांस्कृतिक वारशासाठी अपवादात्मक योगदान देणाऱ्या कलाकारांना हा पुरस्कार प्रदान केला जातो. राकेश चौरसिया यांना मिळालेल्या या सन्मानाचे देशभरातील संगीतप्रेमी, कलाकार आणि सांस्कृतिक संस्थांकडून स्वागत करण्यात येत असून भारतीय शास्त्रीय संगीत आणि देशाच्या समृद्ध सांस्कृतिक परंपरेसाठी हा अभिमानाचा क्षण मानला जात आहे.
0000000
बासरीवादक राकेश चौरसिया यांना प्रतिष्ठेचा संगीत नाटक अकादमी पुरस्कार जाहीर
