मुदतबाह्य दूध, पाव सोसायटीत फेकणाऱ्या नामांकित ऑनलाईन कंपनीचे गोदाम सील!

अनिल ठाणेकर
ठाणे-ऑनलाईन वस्तू विक्री करणाऱ्या नामांकित कंपनीच्या कर्मचाऱ्यांनी मुदतबाह्य दूध, पावाच्या पुड्यांसह विविध नाशवंत माल सोसायटीच्या आवारात फेकून दिल्यानंतर सोसायटीतील रहिवाशी व महापालिकेच्या स्वच्छता कर्मचाऱ्यांवर दादागिरी करण्याचा प्रकार घडला आहे. या कंपनीकडून गांजा ओढण्यासाठी लागणाऱ्या कागदाचीही विक्री केली जात होती. दरम्यान, या घटनेची माहिती मिळाल्यानंतर भाजपचे नगरसेवक संजय वाघुले यांनी अन्न व औषध प्रशासनाकडे तक्रार केल्यानंतर नामांकित ऑनलाईन कंपनीचे गोदाम सील करण्यात आले आहे.
नौपाड्यातील शिवानंद सोसायटीत बेसमेंटमध्ये मे. राजडी रिटेल प्रा. लि. कंपनीचे गोदाम आहे. या कंपनीकडून नामांकित बड्या कंपनीच्या नावाने ग्राहकांना दूध, पावसह जीवनावश्यक वस्तू व नाशवंत मालाची विक्री केली जाते. मात्र, गेल्या काही दिवसांपासून विक्री न झालेले साहित्य शिवानंद सोसायटीच्या आवारात फेकून दिले जात होते. त्यामुळे परिसरात दुर्गंधी पसरली होती. याबाबत आक्षेप घेणाऱ्या सोसायटीच्या रहिवाशांवर दादागिरी केली जात होती. महापालिकेच्या स्वच्छता निरीक्षकांवरही आज सकाळी कंपनीच्या कर्मचाऱ्यांनी दादागिरी करण्याचा प्रकार घडला. याबाबत भाजपचे नगरसेवक संजय वाघुले यांना माहिती मिळाल्यानंतर, त्यांनी तातडीने धाव घेतली. तसेच गोदामाची पाहणी करून अन्न व औषध प्रशासन विभागाच्या  (एफडीए) ठाणे कार्यालयाकडे तक्रार केली. या वेळी माजी नगरसेवक भास्कर पाटील, भाजपच्या नौपाडा मंडल महिला मोर्चाच्या अध्यक्षा वृषाली वाघुले यांच्यासह कार्यकर्त्यांचीही उपस्थिती होती.
`एफडीए’चे अधिकारी महेंद्र गायकवाड यांनी शिवानंद सोसायटीतील गोदामाची व सोसायटीतील आवाराची पाहणी केली. त्यावेळी ठिकठिकाणी अस्वच्छता असल्याचे आढळले. गोदामात अस्वच्छतेबरोबरच मुदतबाह्य अन्न पदार्थांचा साठा स्वतंत्रपणे केला नसल्याचे आढळले. त्यानंतर त्यांनी गोदाम सील करण्याचा निर्णय घेतला. मुदतबाह्य अन्न पदार्थांची विल्हेवाट न लावता गोदामाच्या परिसरात विखुरल्यामुळे दुर्गंधी येत आहे.तसेच मुदतबाह्य अन्नपदार्थांची विल्हेवाट करेपर्यंत दैनंदिन व्यवहार बंद करावेत. सहायक आयुक्तांकडे अटींची पूर्तता केल्याशिवाय गोदाम सुरू करू नये, अशी नोटीस गोदामाचे व्यवस्थापक कासिफ मोमिन याला बजावली आहे. दरम्यान, ऑनलाईनद्वारे जीवनावश्यक वस्तू, दूध, पाव मागविल्यानंतर त्याची मुदत तपासून घ्यावी, असे आवाहन भाजपचे नगरसेवक संजय वाघुले यांनी केले आहे.