Category: ठाणे

    वसई : आंतरराष्ट्रीय महिला दिनी अवघं जग स्त्रिशक्तीचा जयजयकार करीत असताना वसईत आक्रीत घडले. वसई पूर्व परिसरात नवजात बालिकेला रस्त्यावर बेवारस सोडून दिल्याची धक्कादायक घटना घडली आहे. या प्रकरणी माणिकपूर पोलिसांकडून  अज्ञात व्यक्तीविरुद्ध गुन्हा नोंदविण्यात आला आहे.…

जागतिक महिला दिनानिमित्त दिव्यात ‘नारी शक्ती सन्मान’ कार्यक्रम उत्साहात दिवा: जागतिक महिला दिनानिमित्त रोटरी क्लब ऑफ दिवा ठाणे आणि ओम साई शिक्षण संस्था यांच्या संयुक्त विद्यमाने ‘नारी शक्ती सन्मान’ कार्यक्रम उत्साहात पार पडला. दिव्यातील विविध क्षेत्रात उल्लेखनीय कार्य करणाऱ्या महिलांचा यावेळी सन्मान करण्यात आला. दिव्यातील महिला वकील, सीए, डॉक्टर, पत्रकार, अंगणवाडी सेविका, समाजसेविका, शाळा व्यवस्थापिका, कीर्तनकार तसेच बँक अधिकारी अशा विविध क्षेत्रात कार्यरत महिलांचा सत्कार करून त्यांच्या कार्याची दखल घेण्यात आली. समाजाच्या प्रगतीत महिलांचे योगदान मोलाचे असून त्यांच्या कार्याला प्रोत्साहन देण्यासाठी हा उपक्रम आयोजित करण्यात आल्याचे आयोजकांनी सांगितले. या कार्यक्रमाला रोटरी ३१४२ जिल्हा सचिव विनेश नायर आणि नगरसेविका साक्षी मढवी प्रमुख पाहुणे म्हणून उपस्थित होते. तर रोटरीच्या अध्यक्ष, प्रकल्प प्रमुख, सचिव, इतर सदस्यांच्या हस्ते महिला मान्यवरांचा सत्कार करण्यात आला. कार्यक्रमात महिलांच्या कार्याचा गौरव करत त्यांना पुढील वाटचालीसाठी शुभेच्छा देण्यात आल्या. कार्यक्रमात विशेष आकर्षण म्हणून ‘दुसरी मी सावित्री बोलतेय’ हे एकपात्री नाटक सादर करण्यात आले. सुप्रसिद्ध कलावंत साधना चौधरी- भरे यांनी सादर केलेल्या या नाटकाला उपस्थितांकडून उत्स्फूर्त प्रतिसाद मिळाला. हा कार्यक्रम दिवा (पूर्व) येथील एस.एम.जी. विद्यामंदिर येथे आयोजित करण्यात आला होता. कार्यक्रमाच्या यशस्वी आयोजनासाठी रोटरी क्लब ऑफ दिवा ठाणेचे अध्यक्ष किशोर पाटील, प्रकल्प प्रमुख नंदकुमार किणे आणि सचिव स्वप्नील गायकर यांनी विशेष परिश्रम घेतले.

महिला दिनाचे औचित्य साधून महाविद्यालयातील विद्यार्थीनींचे समुपदेशन कल्याण : महिला दिनाचे औचित्य साधून कल्याण डोंबिवली महापालिकेतर्फे कल्याणमधील अचिव्हर्स महाविद्यालयातील विद्यार्थीनीसाठी समुपदेशन व्याख्यानाचे आयोजन करण्यात आले होते. या कार्यक्रमाध्ये विद्यार्थिनींना, आत्मविश्वास आणि स्व-ओळख, किशोरावस्थेतील शारीरिक व मानसिक बदल, मासिक पाळीबद्दल योग्य माहिती व स्वच्छता, सुरक्षितता व स्वतःचे संरक्षण,चांगला स्पर्श – वाईट स्पर्श, ऑनलाइन सुरक्षितता, ‘नाही’ म्हणण्याचे धाडस, शिक्षणाचे महत्त्व व करिअर स्वप्ने, डिजिटल जगात जबाबदारी, सोशल मीडिया वापराचे फायदे-तोटे, सायबर बुलिंग ओळखणे, ड्रग व त्याचे दुष्परिणाम अशा विविध विषयांवर मानसशास्त्रज्ञ प्रोजेक्ट डायरेक्टर आरती बनसोडे यांनी सुंदर प्रकारे मार्गदर्शन केले . यावेळी समाज विकास विभागाच्या उपायुक्त कांचन गायकवाड, समाज विकास अधिकारी प्रशांत गवाणकर, वूमन्स वेलफेअर फाऊंडेशनच्या संचालिका मिनाक्षी उज्जैनकर, अचिव्हर्स कॉलेजचे प्राचार्य डॉ.  महेश भिवंडीकर, रेखा भिवंडीकर, सना खान, सिद्धी चव्हाण,वूमन्स वेलफेअर फाऊंडेशन टीम विनिता माने, स्वाती डोलारे, कृतीका मोरे, रुतीका दामले, अमृता गायकवाड, ज्योत्स्ना हांडे, हर्षिला नरवडे, वैष्णवी लोखंडे उपस्थित होते.

रणरागिणी मॅरेथॉन स्पर्धेस महिलांचा उत्स्फूर्त प्रतिसाद कल्याण : कल्याण डोंबिवली महानगरपालिका, कल्याण रनर्स ग्रुप आणि वैष्णवी मॅटर्निटी होम आयोजित१०, ५ व ३ किमीच्या “रणरागिणी मॅरेथॉन स्पर्धेस” महिलांनी उत्स्फूर्त प्रतिसाद दिला. मुलींपासून ज्येष्ठ महिलांपर्यंत सुमारे साडेसातशे महिलांनी या रणरागिणी स्पर्धेत सहभाग घेत रणरागिणी हे नाव सार्थ ठरविले. इतकेच नव्हे तर बेस्ट थीम या कॅटेगरीअंतर्गत स्त्री शिक्षणाच्या प्रणेत्या सावित्रीबाई फुले यांच्या वेशभूषेत सहभागी होऊन महिलांनी शिक्षणाचा, समतेचा संदेशही या स्पर्धेमार्फत जनमानसापर्यंत पोहोचविला. या मॅरेथॉन स्पर्धेतील विजेत्या महिलांना मान्यवरांच्या हस्ते ट्रॉफी देऊन गौरविण्यात आले. केडीएमसी महापौर हर्षाली चौधरी, आयुक्त अभिनव गोयल यांनी महिलांना महिला दिनाच्या शुभेच्छा दिल्या. समाजातील महिला या प्रेरणास्त्रोत आहेत तसेच प्रत्येकासाठी मदतीचा स्त्रोतही आहेत, आपल्या जीवनात आपल्या कुटुंबात महिला हाच मोठा आधारस्तंभ आहेत असे संबोधत महापालिका आयुक्त अभिनव गोयल यांनी वैष्णवी मॅटर्निटी होमचे डॉ. अश्विन कक्कर, ट्रायमॅटिक्स संस्थेच्या डॉ .शोभा पाटील, स्पर्धेचे सर्व प्रायोजक ,सर्व सहभागी महिला यांचे अभिनंदन केले. यावेळी अतिरिक्त शहर अभियंता (विद्युत )प्रशांत भागवत यांच्या मार्गदर्शनाखाली  महापालिकेच्या विद्युत विभागाने उभारलेल्या ऊर्जा संवर्धन जनजागृती कक्षास महापौर हर्षाली चौधरी व आयुक्त अभिनव गोयल यांनी भेट देऊन प्रशंसा केली आणि ऊर्जा संवर्धनाची अशी जनजागृती सुरू ठेवण्याबाबत निर्देश दिले.

बेपत्ता ओला चालकाची हत्या करणाऱ्या आरोपीला पोलिसांनी केली अटक कल्याण : चार दिवसापासून बेपत्ता असलेल्या ओला चालकाचा मृत्यूदेह अहिल्यानगर जिल्ह्यातील ओतूर पोलीस ठाण्याच्या हद्दीत मिळून आल्यानं एकच खळबळ उडाली आहे. त्याची ओला कार कल्याण तालुका पोलीस स्टेशनच्या हद्दीतील गोवेलीच्या जंगलात आढळून आली. या घटनेचा ठाणे ग्रामीण गुन्हे शाखेच्या पथकानं तपास सुरू केला. यावेळी सीसीटीव्ही फुटेज आणि तांत्रिक विश्लेषणाद्वारे आरोपीला अटक करण्यात पोलिसांना यश आलं आहे. आदर्श चंद्रकांत भालेराव (राहणार टिटवाळा) असे अटक केलेल्या आरोपीचं नाव आहे. तर नासिर अहमद असं मृतदेह आढळून आलेल्या कार चालकाचं नाव आहे. पोलिसांनी दिलेल्या माहितीनुसार, मृतक नासिर अहमद हा नवी मुंबईतील रबाळे पोलीस ठाण्याच्या हद्दीत राहणारा आहे. गेल्या चार दिवसापासून तो बेपत्ता असल्याची तक्रार रबाळे पोलीस ठाण्यात दाखल होती. याच घटनेचा पोलीस तपास सुरू असताना शनिवारी निसारचा मृतदेह माळशेज घाटावरील ओतूर पोलीस ठाण्याच्या हद्दीत पोलिसांना आढळून आला. तर त्याची ओला कार कल्याण – मुरबाड मार्गावरील गोवेली गावच्या हद्दीतील जंगलात आढळून आली. या कारमध्ये पोलिसांना मोठ्या प्रमाणात रक्ताचे डाग दिसले आहेत. या घटनेचा तपास ठाणे ग्रामीण गुन्हे शाखा पथकाचे वरिष्ठ पोलीस निरीक्षक संदीप गीते यांनी पथकासह सुरू केला. यावेळी निसारचा मृतदेह ओतूर पोलीस ठाण्याच्या हद्दीत मिळून आला. यानंतर तपासाची चक्रं वेगानं फिरवत आरोपी आदर्श भालेराव याला टिटवाळ्यातून गुन्हे शाखेच्या पथकानं अटक केली आहे. दरम्यान, पोलिसांचा तपास सुरू असून अद्यापपर्यंत ओला चालक नासिर अहमदची हत्या ही कुठल्या कारणामुळे झाली याचं ठोस कारण उघड झालं नाही. पोलीस पुढील तपास करत आहेत, अशी माहिती डीवायएसपी अनिल लाड यांनी दिली आहे.

ठाकुर्ली रेल्वे स्थानकाजवळ ‘फटका गँग’चा उच्छाद; प्रवाशांचे मोबाईल हिसकावणारा सराईत चोरटा जेरबंद कल्याण : ठाकुर्ली रेल्वे स्थानक परिसरात धावत्या लोकलमधून प्रवाशांच्या हातावर फटका मारून त्यांचे महागडे मोबाईल चोरणाऱ्या एका सराईत गुन्हेगाराला डोंबिवली लोहमार्ग पोलिसांनी अत्यंत शिताफीने अटक केली आहे. सुमित कमलेश सिंग (वय २७) असे या अटक करण्यात आलेल्या आरोपीचे नाव असून, तो कल्याण पूर्वेतील मलंगगड रस्त्यावरील नांदिवली-आडिवली भागातील गावदेवी संकुल येथे वास्तव्यास आहे. पोलिसांनी आरोपीकडून सुमारे ७० हजार रुपये किमतीचा चोरीचा मोबाईल हस्तगत केला आहे. मिळालेल्या माहितीनुसार, तक्रारदार शैलेश नवले हे कल्याण पश्चिमेतील आधारवाडी परिसरातील निक्की नगर येथे राहतात. गुरुवारी सकाळी सव्वा नऊच्या सुमारास ते त्यांचे मित्र स्वप्निल भूषण यांच्यासह कल्याण रेल्वे स्थानकातून पुण्याहून मुंबईकडे जाणाऱ्या सह्याद्री एक्सप्रेसच्या सामान्य डब्यातून प्रवास करत होते. गाडीमध्ये प्रवाशांची प्रचंड गर्दी असल्याने ते डब्याच्या दरवाजात उभे राहून प्रवास करत होते. ही एक्सप्रेस जेव्हा ठाकुर्ली रेल्वे स्थानकाजवळ पोहोचली, तेव्हा तिचा वेग मंदावला होता. याच संधीचा फायदा घेत रेल्वे मार्गालगत दबा धरून बसलेल्या सुमित सिंग याने हातात असलेल्या काठीने शैलेश नवले यांच्या हातावर जोराचा फटका मारला. या अचानक झालेल्या प्रहारामुळे नवले यांच्या हातातील महागडा मोबाईल रेल्वे रुळांवर पडला. एक्सप्रेसचा वेग संथ असला तरी सुरक्षिततेच्या कारणास्तव प्रवाशांना खाली उतरणे शक्य नव्हते. दरम्यान, आरोपीने रेल्वे रुळांवर पडलेला तो मोबाईल उचलला आणि बाजूला उभ्या असलेल्या एका मेल गाडीच्या खालून पळ काढत कचोरे व खंबाळपाडा दिशेने पळ काढला. नवले यांनी तत्काळ आपल्या पत्नीच्या मोबाईलवरून चोरीला गेलेल्या फोनचे लोकेशन तपासले असता, ते कचोरे मंदिर परिसरात असल्याचे दिसून आले. एक्सप्रेस कळवा रेल्वे स्थानकात पोहोचताच त्यांनी घाईघाईने उतरून पुन्हा डोंबिवली लोहमार्ग पोलीस ठाणे गाठले आणि घडलेल्या प्रकाराची रीतसर तक्रार दाखल केली. घटनेचे गांभीर्य ओळखून लोहमार्ग पोलिसांनी तातडीने पथक तयार केले आणि तक्रारदारासह घटनास्थळ गाठले. परिसराची पाहणी करत असताना पोलिसांना एक संशयास्पद तरुण फिरताना आढळला. पोलिसांना पाहताच त्याने पळून जाण्याचा प्रयत्न केला, मात्र कर्मचाऱ्यांनी पाठलाग करून त्याला ताब्यात घेतले. त्याची अंगझडती घेतली असता, त्याच्याकडे चोरीला गेलेला तो मौल्यवान मोबाईल सापडला. डोंबिवली लोहमार्ग पोलिसांनी आरोपीविरुद्ध गुन्हा दाखल केला असून, या ‘फटका गँग’ने रेल्वे प्रवाशांना अशाच प्रकारे इतर ठिकाणीही लुटले आहे का, याचा सखोल तपास सुरू केला आहे.

महिला पोलीस अधिकारी कर्मचाऱ्यांनी केली नाकाबंदी कल्याण : जागतिक महिला दिनाचे औचित्य साधून महात्मा फुले चौक पोलीस स्टेशन अंतर्गत कल्याण रेल्वे स्टेशन व परिसरात पोलीस उपायुक्त अतुल झेंडे यांच्या आदेशान्वये व सहाय्यक पोलीस आयुक्त कल्याणजी घेटे यांच्या मार्गदर्शनात फक्त महिला अधिकारी व अंमलदार यांनी नाकाबंदी करत वाहतूक विभागासह सयुक्त कारवाई केली.  या नाकाबंदी दरम्यान वाहन तपासणी करून चलान देण्यात आले. तसेच स्टेशन परिसरात पायी पेट्रोलिंग केली. स्कायवाक पेट्रोलिंग, दरम्यान केडीएमसी अतिक्रमण विभागाच्या मदतीने अतिक्रमण हटवण्यात आले. यावेळी विविध कलमान्वये एकूण १०३ कारवाया करण्यात आल्या. या कारवाई दरम्यान ४ महिला अधिकारी व ३२ महिला पोलीस अमलदार हजर होते.

जागतिक महिला दिनानिमित्त ठाण्यात महिला वृत्तपत्र विक्रेत्यांचा गौरव अनिल ठाणेकर ठाणे, जागतिक महिला दिनाचे औचित्य साधून, ठाणे जिल्हा वृत्तपत्र विक्रेता संघातर्फे रविवारी भल्या पहाटे ५:३० वाजता ठाणे स्टेशन परिसरात एका आगळ्यावेगळ्या ‘महिला सन्मान सोहळ्याचे’ आयोजन करण्यात आले होते. उन्हाळा, पावसाळा असो वा कडाक्याची थंडी, पहाटेच्या अंधारात घराबाहेर पडून घराघरात ज्ञान पोहोचवणाऱ्या महिला वृत्तपत्र विक्रेत्यांच्या कष्टाची दखल घेऊन हा सन्मान करण्यात आला. या कार्यक्रमाला ठाण्याचे उपमहापौर कृष्णा पाटील यांनी विशेष उपस्थिती दर्शवली. यावेळी बोलताना त्यांनी महिला वृत्तपत्र विक्रेत्यांच्या जिद्दीचे आणि मेहनतीचे कौतुक केले. “शहराच्या प्रगतीत आणि माहिती पोहोचवण्याच्या कार्यात या भगिनींचे योगदान अत्यंत मोलाचे आहे,” असे गौरवोद्गार त्यांनी काढले.या सोहळ्याला संघटनेचे कार्याध्यक्ष राजेश मोरे, ‘शब्दमुद्रा’ वृत्तपत्राचे संपादक प्रफुल वाघुले, ठाणे जिल्हा वृत्तपत्र विक्रेता संघाचे सरचिटणीस अजित पाटील, शहर प्रमुख नंदू देशपांडे, ठाणे स्टेशन विभाग प्रमुख संदीप आवारे, चंद्रकांत पवार, राजू शेलार, नंदू करले, सखाराम चव्हाण, संजय भुजबळ, शंकर पाटील आणि ज्येष्ठ विक्रेते विठ्ठल गांगुर्डे यांसह अनेक पदाधिकारी व विक्रेते मोठ्या संख्येने उपस्थित होते. कार्यक्रमात उपस्थित महिला वृत्तपत्र विक्रेत्यांना पुष्पगुच्छ आणि भेटवस्तू देऊन सन्मानित करण्यात आले. पहाटेच्या वेळी जेव्हा शहर निद्रावस्थेत असते, तेव्हा आपल्या कर्तव्याला प्राधान्य देणाऱ्या या महिलांचा उत्साह पाहून उपस्थितांनी त्यांचे टाळ्यांच्या गजरात अभिनंदन केले.

कष्टकरी महिलांचा धनगर प्रतिष्ठान महिला मंडळाकडून विशेष सन्मान अनिल ठाणेकर ठाणे : धनगर प्रतिष्ठान महिला मंडळाच्या वतीने जागतिक महिला दिन ठाण्यात मोठ्या उत्साहात आणि विविध उपक्रमांच्या माध्यमातून साजरा करण्यात आला. समाजातील कष्टकरी आणि परिश्रमाने कुटुंबाचा गाडा हाकणाऱ्या महिलांचा सन्मान करून त्यांच्या कार्याचा गौरव यावेळी करण्यात आला. जागतिक महिला दिनानिमित्त घरकाम करून तसेच विविध प्रकारची मेहनत करून आपले कुटुंब सांभाळणाऱ्या कष्टकरी महिलांचा विशेष सत्कार धनगर प्रतिष्ठानच्या वतीने करण्यात आला. समाजातील महिलांनी केलेल्या योगदानाचा गौरव करण्यासाठी हा कार्यक्रम आयोजित करण्यात आला होता.पुष्पगुच्छ देऊन महिलांचा सन्मान करण्यात आला.ठाण्यातील जांभळी नाका परिसरातील मासुंदा तलाव येथे असलेल्या पुण्यश्लोक अहिल्यादेवी होळकर स्मारक येथे या कार्यक्रमाचे आयोजन करण्यात आले होते. कार्यक्रमाची सुरुवात पुण्यश्लोक अहिल्यादेवी होळकर यांच्या मूर्तीला पुष्पहार अर्पण करून करण्यात आली. यावेळी उपस्थितांनी त्यांच्या कार्याला अभिवादन करत महिलांसाठी त्यांनी दिलेल्या प्रेरणेची आठवण करून दिली. या कार्यक्रमाला धनगर प्रतिष्ठान महिला मंडळाच्या अध्यक्षा माधवी बारगीर, सचिव गायत्री गुंड, खजिनदार भारती पिसे तसेच सदस्य संगीता खटावकर, सुषमा बुधे, सीमा कुरकुंडे, स्मिता गावडे आदी पदाधिकारी व कार्यकर्त्या मोठ्या संख्येने उपस्थित होत्या.कार्यक्रमात महिलांनी एकत्र येत जागतिक महिला दिनाचा उत्सव साजरा केला तसेच महिलांच्या सशक्तीकरणाचा संदेश देण्यात आला. समाजातील महिलांनी एकमेकांना प्रोत्साहन देत पुढील काळातही अशा सामाजिक उपक्रमांमध्ये सक्रिय सहभाग घेण्याचा निर्धार व्यक्त केला.

राष्ट्रवादी शरद पवारच्या आरोग्य शिबिरात सुमारे २९७ महिलांची आरोग्य तपासणी अनिल ठाणेकर ठाणे : महिला दिनाचे औचित्य साधून राष्ट्रवादी काँग्रेस-शरदचंद्र पवार पक्षाचे राष्ट्रीय सरचिटणीस डॉ.जितेंद्र आव्हाड यांच्या आदेशानुसार तथा जिल्हाध्यक्ष मनोज प्रधान यांच्या मार्गदर्शनानुसार आणि ॠताताई आव्हाड, सिद्धीविनायक रूग्णालयाचे डॉ. अमोल गिते यांच्या उपस्थितीत पक्ष कार्यालयात महिलाध्यक्षा मनिषा भगत,  कार्याध्यक्षा फुलबानो पटेल आणि साबिया मेमन यांनी मोफत आरोग्य शिबिराचे आयोजन केले होते. या शिबिरात सुमारे २९७ महिलांची आरोग्य तपासणी करण्यात आली. घर-संसार सांभाळणाऱ्या मायभगिनी सर्व आघाड्यांवर मोठ्या हिमतीने कार्यरत असल्या तरी स्वतःच्या प्रकृतीकडे फारसे लक्ष देत नसतात. त्यातच संसाराचा गाडा हाकताना दोन पैसे वाचविण्यासाठी वैद्यकीय तपासण्या करण्याकडे दुर्लक्ष करीत असतात. ही बाब ध्यानात घेऊन ८ मार्चच्या महिला दिनाचे औचित्य साधून राष्ट्रवादी महिला काँग्रेस-शरदचंद्र पवार पक्षाच्या ठाणे महिलाध्यक्ष मनिषाताई भगत, कार्याध्यक्ष फुलबानो पटेल, साबिया मेमन यांनी या शिबिराचे पक्षाचे मध्यवर्ती कार्यालय, तुळजाभवानी मंदिराशेजारी, गणेशवाडी पांचपाखाडी ठाणे येथे आयोजन करण्यात आले होते. या शिबिरात सिद्धीविनायक हॉस्पिटलच्या वैद्यकीय पथकाने हृदयरोग तपासणी, (ECG), किडनी, स्वादुपिंड, यकृत उपचार, दमा, रक्तदाब, मधुमेह (शुगर) आदी आजारांची तपासणी करण्यात आली. या तपासणीमध्ये ज्या महिलांना आजार झाल्याचे स्पष्ट झाले आहे. त्या महिलांवर मोफत शस्त्रक्रिया सिद्धीविनायक रूग्णालयात करण्यात येणार आहेत. याप्रसंगी ॠता आव्हाड यांनी, महिला घर चालविताना स्वतःच्या आरोग्याचे बजेट आखत नाहीत. त्यामुळे अनेकदा त्यांचे आजार बळावतात. म्हणूनच या शिबिराचे आयोजन करण्यात आले होते, असे सांगितले. तर, राष्ट्रवादी काँग्रेस-शरदचंद्र पवार पक्ष नेहमीच जनतेच्या हिताचे प्रश्न मांडत आला आहे. महिलांच्या आरोग्याच्या समस्या मार्गी लावण्यासाठीच आम्ही हे शिबिर आयोजित केले असल्याचे मनिषा भगत यांनी सांगितले. डॉ. अमोल गिते यांनी, या शिबिरात तपासणी केलेल्या महिलांसाठी किडनी स्टोन प्रोस्टेटवर मोफत  शस्त्रक्रिया, मोफत डायलेसीस सुविधा उपलब्ध करून देण्यात येणार आहेत, असे सांगितले. दरम्यान , महिला दिनाच्या अनुषंगाने ऋता आव्हाड, मनिषा भगत यांच्य् हस्ते महिला पत्रकार अनघा सुर्वे, रोहिणी दिवाण, सुचिता बिराजदार, सारिका साळुंके, नम्रता सूर्यवंशी,  वंशिका चाचे, जयश्री शेट्टी यांचा सन्मान करण्यात आला. तसेच, नवनिर्वाचित नगरसेविकांचाही यावेळी सत्कार करण्यात आला. यावेळी पल्लवी जगताप ,रिटा यादव ,वर्षा मोरे ,सुषमा पाटील ,सपना पाटील, अश्विनी पालकर , नीलिमा शेख , माधुरी सोनार , शशिकला पुजारी , ज्योती निम्बर्गी , मनीषा पाटील , मल्लिका पिल्ले, हाजी बेगम , मुनिपा सय्यद , रेणुका अलगुडे,  रेशमा भानुशाली, कल्पना नार्वेकर,  रुबीना सय्यद, उषा नरहरे,पूजा जाधव , गीतारंजन , श्रुती डिसोलकर , ज्योती चव्हाण, संगीता चंद्रवंशी , लिलाबाई फुलपगारे ,संगीता लोकरे आदी उपस्थित होते.