दिवा–सीएसटी लोकल सुरू करण्याचे खासदार डॉ. श्रीकांत शिंदे यांचे दिवेकरांना आश्वासन
दिवा, दि. १२ जानेवारी : “दिवेकर नागरिक शिवसेना–महायुतीच्या नेहमीच पाठीशी ठामपणे उभे आहेत. गेल्या दहा वर्षांत आम्ही जे वचन दिले, ते पूर्ण केले आहे. दिवा शहराचा कायापालट करून नागरिकांना सुरक्षित, स्वच्छ आणि सुविधायुक्त वातावरण देण्याचा आमचा निर्धार पक्का आहे. भविष्यात दिवा ते सीएसटी विशेष लोकल सुरू होईल, ज्यामुळे प्रवाशांना मोठा दिलासा मिळेल,” असे प्रतिपादन खासदार डॉ. श्रीकांत शिंदे यांनी केले. ठाणे महानगरपालिका निवडणुकीच्या पार्श्वभूमीवर दिव्यातील शिवसेना–भाजप महायुतीच्या उमेदवारांच्या प्रचारार्थ आयोजित जाहीर सभेत ते बोलत होते.
या सभेला मोठ्या संख्येने नागरिक उपस्थित होते. यावेळी डॉ. शिंदे यांनी दिवा शहरात गेल्या दहा वर्षांत झालेल्या तसेच सध्या सुरू असलेल्या विकासकामांचा सविस्तर आढावा घेतला. दिवा–शीळ मार्गाचे काँक्रीटीकरण, दिवा रेल्वे स्थानकाचा सर्वांगीण विकास, प्रवाशांसाठी वाढविण्यात आलेल्या सुविधा, बुलेट ट्रेन प्रकल्पांतर्गत दिवा स्थानकाचे सुरू असलेले काम, क्लस्टर पुनर्विकास योजना, भुयारी गटारी योजना, आगरी कोळी वारकरी भवन, नानासाहेब धर्माधिकारी सभागृह, अंतर्गत रस्त्यांचे काँक्रीटीकरण, महापालिकेच्या शाळांचा विकास, प्रशस्त पोलिस स्टेशन, डम्पिंग ग्राउंड हटविण्याचा निर्णय आणि आरोग्य सुविधांमधील सुधारणा यांचा त्यांनी उल्लेख केला.
दिवा शहरातील बदल अधोरेखित करताना डॉ. शिंदे म्हणाले, “दहा वर्षांपूर्वी दिवा केवळ गाव स्वरूपात होता. रस्ते, पाणी, स्वच्छता आणि रेल्वे स्थानकाची परिस्थिती बिकट होती. दिवा स्थानकाचा कायापालट झाला असून सुरक्षितता आणि सुविधा मोठ्या प्रमाणात वाढल्या आहेत.” वाढती लोकसंख्या लक्षात घेता दर्जेदार शाळा, महाविद्यालये, रुग्णालये व वैद्यकीय महाविद्यालयाची आवश्यकता असल्याचे त्यांनी सांगितले. अंबरनाथ येथे मंजूर झालेल्या वैद्यकीय महाविद्यालयाचे उदाहरण देत भविष्यात दिव्यातही असे प्रकल्प उभारले जातील, असा विश्वास त्यांनी व्यक्त केला.
रेल्वे सुविधांबाबत माहिती देताना त्यांनी सांगितले की, दिवा स्थानकावर फास्ट व लांब पल्ल्याच्या गाड्यांना थांबा, प्लॅटफॉर्मचे रुंदीकरण आणि तिकीट खिडक्यांची संख्या वाढविण्यात आली आहे. भविष्यात कोकणात जाणाऱ्या लांब पल्ल्याच्या गाड्या दिव्यात थांबतील. दिवा–सीएसटी विशेष लोकल सुरू झाल्यानंतर प्रवाशांचा प्रवासाचा त्रास मोठ्या प्रमाणात कमी होईल. युवकांसाठी रोजगाराच्या संधी निर्माण करण्यासाठी कल्याण रोड परिसरात टाटा स्किल सेंटर उभारण्याचे काम अंतिम टप्प्यात असून पुढील सहा ते सात महिन्यांत ते सुरू होणार असल्याची माहिती त्यांनी दिली. भविष्यात दिवा शहरात उद्योजक घडवण्यासाठी विशेष प्रशिक्षण केंद्र उभारण्याचाही मानस त्यांनी व्यक्त केला.
या जाहीर सभेत प्रभाग क्रमांक २७ मधील शैलेश पाटील, आदेश भगत, दिपाली भगत, स्नेहा पाटील, प्रभाग क्रमांक २८ मधील रमाकांत मढवी, साक्षी मढवी, दीपक जाधव, दर्शना म्हात्रे तसेच प्रभाग क्रमांक २९ मधील बाबाजी पाटील, अर्चना पाटील व वेदिका पाटील या शिवसेना–भाजप महायुतीच्या अधिकृत उमेदवारांच्या प्रचारार्थ सभा पार पडली. यावेळी विविध सामाजिक संघटनांनी महायुतीला जाहीर पाठिंबा दिला.
सभेच्या शेवटी १५ जानेवारी रोजी धनुष्यबाण आणि कमळ चिन्हासमोरील बटन दाबून महायुतीच्या उमेदवारांना प्रचंड मताधिक्याने विजयी करण्याचे आवाहन खासदार डॉ. श्रीकांत शिंदे यांनी केले. “काम करणारा पक्ष आणि काम करणारे सरकार हे महायुतीचेच आहे. पुढील काळात दिवा शहराचा विकास अधिक वेगाने होईल,” असा विश्वास त्यांनी व्यक्त केला.
चौकट
क्लस्टर पुनर्विकास योजनेचे ९५% सर्वेक्षण पूर्ण
क्लस्टर पुनर्विकास योजनेबाबत बोलताना डॉ. श्रीकांत शिंदे म्हणाले, “ही योजना केवळ घरांची नाही, तर सर्वांगीण विकासाची आहे. धोकादायक व अनधिकृत इमारतींमध्ये राहणाऱ्या नागरिकांना अधिकृत, सुरक्षित आणि मोठी घरे विनामूल्य मिळणार आहेत. दिवा शहरातील ९५ टक्के सर्वेक्षण पूर्ण झाले असून लवकरच प्रत्यक्ष काम सुरू होईल.”