– आंतरराष्ट्रीय योग दिनानिमित्त
मुंबई : आंतरराष्ट्रीय योग दिन २०२६ ची संकल्पना “Yoga for Healthy Ageing” (निरोगी वृद्धत्वासाठी योग) ही सर्व वयोगटांतील व्यक्तींना निरोगी, सक्रिय आणि आनंदी जीवन जगण्यासाठी प्रेरणा देणारी आहे. याच संकल्पनेला अनुसरून विद्यालंकार मुंबई महानगर योगासन अजिंक्यपद स्पर्धा २०२६-२७ चे आयोजन विद्यालंकार स्कूल ऑफ इन्फॉर्मेशन टेक्नॉलॉजी,वडाळा व मुंबई शहर योगासना स्पोर्ट्स असोसिएशन यांच्या संयुक्त विद्यमानाने करण्यात आले आहे. आजच्या बदलत्या जीवनशैलीत प्रत्येक वयोगटासाठी योगाची गरज अधिक अधोरेखित होत आहे. विशेषतः वाढत्या वयानुसार शरीराची लवचिकता, संतुलन, सहनशक्ती आणि मानसिक स्वास्थ्य टिकवून ठेवण्यासाठी योग अत्यंत उपयुक्त ठरतो.
या स्पर्धेमध्ये ७ ते १० वर्षे, १० ते १४ वर्षे, १४ ते १८ वर्षे, १८ ते २८ वर्षे, २८ ते ३५ वर्षे, ३५ ते ४५ वर्षे आणि ४५ ते ५५ वर्षे या विविध वयोगटांतील मुला-मुलींनाआणि महिला पुरुषांना सहभागाची संधी उपलब्ध करून देण्यात आली आहे. मुंबई शहर, मुंबई उपनगर,ठाणे,नवी मुंबई,पालघर,रायगड वरील विभागातील खेळाडू ह्या स्पर्धेत आपला सहभाग नोंदवू शकतात. लहान वयात योगाची सवय लागल्यास निरोगी जीवनशैलीची पायाभरणी होते, तर प्रौढ आणि ज्येष्ठ वयोगटासाठी योग आरोग्यदायी आणि सक्रिय जीवन जगण्याचा प्रभावी मार्ग ठरतो.
या स्पर्धेचा उद्देश योगासन खेळाचा प्रसार करणे, युवकांमध्ये शिस्त व आत्मविश्वास निर्माण करणे तसेच समाजात आरोग्याविषयी जागरूकता वाढविणे हा आहे. स्पर्धकांना त्यांच्या कौशल्यांचे प्रदर्शन करण्यासाठी दर्जेदार व्यासपीठ उपलब्ध होणार असून, त्यातून योगाच्या स्पर्धात्मक अंगालाही प्रोत्साहन मिळणार आहे.
विद्यालंकार मुंबई महानगर योगासन अजिंक्यपद स्पर्धा २०२६-२७ ही केवळ स्पर्धा नसून निरोगी, सक्रिय आणि सशक्त समाज निर्माण करण्याच्या दिशेने उचललेले एक महत्त्वपूर्ण पाऊल आहे. या स्पर्धेत मोठ्या संख्येने सहभागी होऊन योगाचा संदेश प्रत्येक घरापर्यंत पोहोचवूया आणि निरोगी भारताच्या निर्मितीत आपले योगदान देऊया. स्पर्धा २० जून रोजी विद्यालंकार कॅम्पस, ऑडिटोरियम, वडाळा येथे संपन्न होणार आहे. अधिक माहितीसाठी क्रीडाशिक्षक डॉ. प्रकाश शेळके (९३२६८४६२६५) किंवा लीना पातले (८८७९२४४२२०) यांच्याकडे संपर्क साधावा.
००००