Category: क्रीडा

एमसीसी लिटिल स्टार लीग क्रिकेट स्पर्धा एमसीसी सांताक्रूझच्या विजयात समर्थ चमकला मुंबई: ज्वाला स्पोर्ट्स फाउंडेशन आयोजित एमसीसी लिटिल स्टार लीग क्रिकेट स्पर्धेत (१४ वर्षांखालील) एमसीसी सांताक्रूझने स्पायडर सीसीवर १५ धावांनी विजय मिळवला. त्यात समर्थ चमकला. एमसीसीच्या २०७ धावांच्या मोठ्या आव्हानाचा पाठलाग करताना स्पायडर संघ ४० षटकांत ५ बाद १९१ धावाच करू शकला. नाणेफेक जिंकून फलंदाजीचा निर्णय घेत एमसीसी सांताक्रूझने दोनशेपार मजल मारली. त्यात समर्थने ७४ चेंडूत ५६ धावा करताना मोलाचे योगदान दिले. प्रतिस्पर्धी संघाकडून सोनाक्षी सोलंकीने १६ धावांत ३ विकेट घेतल्या. त्यानंतर सोलंकीने (११२ चेंडूत ८३ धावा) फलंदाजीतही छाप पाडली तरी त्याला अन्य सहकाऱ्यांची साथ मिळू शकली नाही. समर्थने ३४ धावांत एक विकेट घेत अष्टपैलू कामगिरी केली. त्यानेच सामनावीराचा पुरस्कार पटकावला. एमसीसी सांताक्रूझ – ४० षटकांत ९ बाद २०६(समर्थ ५६(७४), सोनाक्षी सोलंकी ३/१६) वि. स्पायडर सीसी — ४० षटकांत ५ बाद १९१(सोनाक्षी सोलंकी ८३(११२), आकर्षक गुप्ता २/३६). निकाल: एमसीसी सांताक्रूझ १५ धावांनी विजयी. सामनावीर: समर्थ ५६ (७४) आणि १/३४ एमसीसी ठाणे ब – ४० षटकांत ८ बाद १६१(क्रिश शर्मा ५६*(६३), विहान वॅडे २/८) वि. स्पायडर सीसी – २१.२ षटकांत ३ बाद १६२(विराट सिंग ५०(३५), दिशांत फुलोरे १/१५). निकाल: स्पायडर सीसी ७ विकेट राखून विजयी. सामनावीर: हृधान चौहान २/९ आणि ३६(३९).

३५ वी किशोर–किशोरी राष्ट्रीय खो-खो स्पर्धा महाराष्ट्राची दणदणीत कामगिरी! किशोर–किशोरी संघ उपउपांत्यपूर्व फेरीत कुरुक्षेत्रच्या थीम पार्क मैदानावर वेग–चपळाई–डावपेचांचा जल्लोष महाराष्ट्राचा राष्ट्रीय रंगमंचावर धमाका हरियाणा  : कुरुक्षेत्र (हरियाणा) येथे सुरु असलेल्या ३५ व्या किशोर व किशोरी राष्ट्रीय खो-खो स्पर्धेत महाराष्ट्राच्या दोन्ही संघांनी अफलातून खेळ साकारत उपउपांत्यपूर्व फेरीत दणक्यात प्रवेश केला. थीम पार्क मैदानावर प्रत्येक सामन्यात आक्रमकता, अभेद्य संरक्षण आणि अचूक डावपेच यांचा सुरेख संगम दिसून आला. महाराष्ट्राने निर्णायक क्षणी खेळ उंचावत प्रतिस्पर्ध्यांवर दबाव निर्माण केला आणि विजयांची मालिका कायम ठेवली. किशोर गट : महाराष्ट्राची हरियाणावर एकतर्फी सरशी उपउपांत्यपूर्व लढतीत महाराष्ट्राने हरियाणाचा एक डाव १८ गुणांनी (२८–१०) पराभव केला. महाराष्ट्राकडून अभिराज वाळंज (२.१० मि. संरक्षण), प्रफुल्ल वसावे (नाबाद १.५०, २.५० मि. संरक्षण व २ गुण), सोहम देशमुख (३ मि. संरक्षण व ४ गुण), वेदांत गायकवाड (८ गुण) यांनी उत्कृष्ट कामगिरी नोंदवत विजय निश्चित केला. हरियाणाकडून हिमान (१.४०, १.३० मि. संरक्षण व ४ गुण), योदीत (१.१५ मि. संरक्षण) यांनी प्रयत्न केले; मात्र महाराष्ट्राच्या वेगापुढे ते अपुरे ठरले. किशोरी गट : महाराष्ट्राची मणिपूरवर डावाने मात किशोरी गटात महाराष्ट्राने मणिपूरचा एक डाव ३३ गुणांनी (४३–१०) पराभव करत उपउपांत्यपूर्व  फेरी गाठली. महाराष्ट्राकडून राही पाटील (२.१० मि. संरक्षण व ८ गुण), अपर्णा वर्धे (४.१० मि. संरक्षण व ८ गुण), वेदिका तामखडे (३ मि. संरक्षण व ६ गुण) यांनी दमदार कामगिरी केली. मणिपूरकडून आयेशाने चांगला खेळ केला. किशोर गट : पंजाबची केरळवर काठावरची बाजी पंजाबने केरळचा ५ गुणांनी (३५–३०) पराभव करत चुरशीच्या लढतीत विजय मिळवला. पंजाबकडून शिवकुमार (३.३० मि. संरक्षण व २ गुण), विरेंद्रजित (१.४० मि. संरक्षण व ८ गुण), श्याम मित्तल (१.१० मि. संरक्षण व ४ गुण) यांनी निर्णायक योगदान दिले. केरळकडून के. अभय (१, १.१० मि. संरक्षण), प्रत्युश (१ मि. संरक्षण व ६ गुण) यांनी कडवी झुंज दिली. किशोर गट : विदर्भची वेस्ट बंगालवर धडाकेबाज मात विदर्भ संघाने प. बंगालचा ५ गुणांनी (३५–३०) पराभव करत उपउपांत्यपूर्व फेरी गाठली. विदर्भाकडून रोशन (१.१४ मि. संरक्षण व ६ गुण), तन्मय (१, १ मि. संरक्षण व ८ गुण), कल्पेश (१ मि. संरक्षण व ६ गुण) यांनी विजयात मोलाची कामगिरी केली. वेस्ट बंगालकडून एस. के. नबी (१, १.२० मि. संरक्षण व ८ गुण), राज (१.२० मि. संरक्षण) यांनी चांगला खेळ केला. किशोर गट : कोल्हापूरचा राजस्थानवर डावाने धक्का चौथ्या सामन्यात कोल्हापूरने राजस्थानचा एक डाव २४ गुणांनी (४२–१८) पराभव करत सहज विजय मिळवला. कोल्हापूरकडून सत्यराज वाडेकर (२.१०, ३.२० मि. संरक्षण व २ गुण), गौरव माने (२ मि. संरक्षण व ८ गुण), सोहम भाटमारे (२ मि. संरक्षण व ४ गुण) यांनी चमकदार खेळ साकारला. राजस्थानकडून तनिष (१.१० मि. संरक्षण व २ गुण) याने प्रतिकार केला. किशोरी गट : हरियाणाची विदर्भावर काठावरची सरशी हरियाणाने विदर्भवर २७-२३ असा ४ गुण व ३ मिनिटे राखून विजय मिळवला. हरियाणाकडून पलक (१.३०, १.५० मि. संरक्षण व २ गुण), कोमल (१.५०, १.१० मि. संरक्षण), अंजली (१.२०, १.२० मि. संरक्षण) यांनी प्रभावी खेळ केला. विदर्भकडून मनवी (१.३० मि. संरक्षण व ४ गुण), नव्या (१.३० मि. संरक्षण व ६ गुण) यांनी चमकदार कामगिरी केली. उपउपांत्यपूर्व फेरीत पोहोचलेल्या संघांची यादी किशोर गट : महाराष्ट्र, पंजाब, मणिपूर, राजस्थान, तामिळनाडू, पश्चिम बंगाल, दिल्ली, ओडिसा, कर्नाटक, उत्तरप्रदेश, छत्तीसगड, विदर्भ, गुजरात, कोल्हापूर, हरियाणा, तेलंगणा. किशोरी गट : महाराष्ट्र, उत्तराखंड, उत्तरप्रदेश, विदर्भ, छत्तीसगड, पंजाब, हिमाचल प्रदेश, कोल्हापूर, राजस्थान, केरळ, ओडिसा, गुजरात, पश्चिम बंगाल, हरियाणा, मणिपूर, कर्नाटक.

कुस्तीपटू कोमल पटेलला रौप्य पदक ठाणे : वसंतदादा कुस्ती केंद्र यशवंत नगर सांगली या ठिकाणी संपन्न झालेल्या २० वर्षा खालील राज्यस्तरिय     महिला अजिंक्यपद कुस्ती स्पर्धेत मिरा भाईंदर येथील  श्री गणेश आखाड्यातील कुस्तीपटू कोमल पटेलने  रौप्य पदक पटकावले. या स्पर्धेत महाराष्ट्रातून विविध वजनी गटातून निवड झालेल्या पैलवानांचा समावेश होता. ५० किलो वजनी गटात कोमलने पहिल्या फेरीत पुणे शहर जिल्ह्याच्या पूर्वा परदेशीला १० तांत्रिक गुणांच्या फरकाने सहज नमवले. दुसऱ्या  फेरीत कोमलने जळगावची कसलेली मल्ल समीक्षा काळेला चितपट केले. या कुस्तीत कोमलने  क्षणाचा ही विलंब न लावता झोळी या डावाची पकड घेत समिक्षाला चितपट करत सर्वांना अचंबित केले. तिसऱ्या फेरीत देखील‌ तिने मुंबई उपनगराच्या रसिका माळीला  चितपट करत अंतिम फेरीत मजल मारली. निर्णायक सामन्यात कोमलची लढत अनुभवी, अनेक पदके जिंकलेल्या  कोल्हापूरच्या गौरी पाटीलशी होती, पण अखेर अनुभवाने वरचढ असलेल्या गौरीने कोमलला  तांत्रिक गुणांच्या जोरावर नमवुन सुवर्ण पदक मिळवले. तर कोमलला रौप्य पदकावर समाधान मानावे लागले. कोमल ही सध्या अभिनव कॉलेज ऑफ आर्ट्स, कॉमर्स अँड सायन्स या कॉलेज मध्ये कला शाखेच्या   प्रथम वर्षात  शिकत आहे . राज्यस्तरावरील कुस्ती स्पर्धेत कोमलचे हे पहिलेच पदक होते. श्री गणेश आखाड्याचे सर्वेसर्वा  वसंतराव पाटील , वैभव माने यांचे मोलाचे  मार्गदर्शन कोमलला मिळत आहे.

क्रिकेट गुणलेखक बळवंत सकपाळ जीवन गौरव पुरस्काराने सन्मानित ठाणे:  फ्रेंडशिप क्रिकेट क्लबचे ज्येष्ठ क्रिकेट गुणलेखक आणि कचराळी तलाव मॉर्निंग वॉक ग्रुपतर्फे संस्थापक बळवंत विठ्ठल सकपाळ यांना नुकतेच जीवन गौरव पुरस्काराने सन्मानित करण्यात आले. सन्मानपत्र, शाल, श्रीफळ आणि भेटवस्तू असे या पुरस्काराचे स्वरूप होते. प्रास्ताविकात आनंद टंगसाळी म्हणाले, बळवंत सकपाळ यांच्या नेतृत्वाखाली आमचा ग्रुप दरवर्षी उरळीकांचन, कुशावर्त प्रदक्षिणा करायचा. तर चार वर्षातून एकदा होणारी आमची हिमालय भ्रमंती आजही सुरु आहे. फ्रेंडशिप क्रिकेट क्लबचे हरेश्र्वर मोरेकर म्हणाले, क्लबच्या वार्षिक मैत्री दिन साजरा करताना बळवंत सकपाळ यांचा उत्साह, आयोजन, नियोजन आदर्शवत होते. ते भविष्याचा वेध घेणारे  इष्टे होते.  कचराळी तलावाभोवती वॉक करण्याच्या आठवणींना आनंद शेणोलीकर यांनी उजाळा दिला. तर आपल्या सर्वांगीण प्रगतीत  बाबा माझे हिरो होते अशी भावना सकपाळ यांची ज्येष्ठ कन्या अश्विनी कदम यांनी व्यक्त केली. प्रकृती अस्वास्थ्यामुळे बळवंत सकपाळ सत्काराला उत्तर देऊ शकले नाहीत.यावेळी संजीवनी सकपाळ, भारती मोरेकर, निलम सकपाळ, हॉटेल शेल्टरचे शर्माजी, अनिरुद लिमये आणि इतर मान्यवर उपस्थित होते. कार्यक्रमाचे सूत्र संचालन ज्येष्ठ पत्रकार प्रल्हाद नाखवा यांनी केले. सकपाळ यांचे चिरंजीव आलोक यांनी “ देणारे दुर्मिळ घेणारे पुष्कळ, तरी जपतात बाबा बळवंत, आनंद द्या आनंद घ्या चा वारसा, खरच हा मुलखावेगळा वसा, आपणा सर्वासाठी ठरावा आरसा, या चारोळीने कार्यक्रमाची सांगता केली.

एमजेएससी ट्रॉफी कॅरम स्पर्धा भरत, स्वरा, साराची विजयी सलामी मुंबई : माहीम ज्युवेनाइल स्पोर्ट्स क्लब-एमजेएससी व आयडियल स्पोर्ट्स अकॅडमी आयोजित विविध जिल्ह्यातील शालेय मुलामुलींच्या एमजेएससी ट्रॉफी विनाशुल्क कॅरम स्पर्धेत कळसुलकर इंग्लिश स्कूल-सावंतवाडीचा भरत सावंत, आर.बी.शिर्के हायस्कूल-रत्नागिरीची स्वरा मोहिरे, पाटकर हायस्कूल-डोंबिवलीची सारा देवन, पोद्दार अकॅडमी स्कूल-मालाडचा प्रसन्न गोळे, व्ही.एन. सुळे गुरुजी हायस्कूल-दादरची ग्रीष्मा धामणकर आदींनी सलामीचे सामने जिंकले. भरत सावंतने सुरुवातीपासून आघाडी घेत उशिरा सूर सापडलेल्या दिवीत छेडाचे आव्हान १०-८ असे संपुष्टात आणले. स्पर्धेचे शानदार उद्घाटन उद्योजक सुशील शेट्ये, क्लबचे पदाधिकारी विजय येवलेकर, सुनील पाटील, महेश शेट्ये, राजन गुप्ता, चंद्रकांत करंगुटकर आदींच्या प्रमुख उपस्थितीत झाले. छत्रपती शिवाजी महाराज उद्यान येथील माहीम ज्यूवेनाइल स्पोर्ट्स क्लबमधील स्वरा मोहिरे विरुध्द देविका जोशी यांची लढत देखील अटीतटीमध्ये रंगली. डावाच्या मध्यापर्यंत दोलायमान झालेल्या चूरशीच्या सामन्यात स्वरा मोहिरेने ११-९ अशी बाजी मारली. अन्य सामन्यात सारा देवनने अनन्या पाध्येला १३-५ असे, दैविक जैनने अद्वैत महाडिकला २०-६ असे, प्रसन्न गोळेने ओमकार मोटेला २५-२ असे, तनया दळवीने वेदिका पोमेंडकरला १४-५ असे, उमैर पठाणने दक्ष संघवीला १३-३ असे तर ग्रीष्मा धामणकरने आरव आंजर्लेकरला २५-० असे पराभूत करून पहिली फेरी जिंकली. मुंबई शहर व उपनगर, ठाणे, पालघर, रायगड, रत्नागिरी, सिंधुदुर्ग आदी जिल्ह्यातील नामवंत ४२ शालेय खेळाडूंमध्ये एमजेएससी ट्रॉफीसाठी निकराच्या लढती सुरु आहेत.

श्री गणराज नृत्य कला निकेतन, ठाणे या संस्थेच्या २५ व्या वर्धापन दिननिमित्त `नृत्यविविधा’ या विशेष नृत्य कार्यक्रमाचे आयोजन ठाणे – भारतीय शास्त्रीय नृत्य परंपरेचे जतन व संवर्धन करणाऱ्या श्री गणराज नृत्य कला निकेतन, ठाणे या नामांकित संस्थेचा २५ वा रौप्य महोत्सवी वर्षपूर्ती सोहळा मोठ्या उत्साहात साजरा केला जात आहे. या निमित्ताने संस्थेतर्फे `नृत्यविविधा’ हा विशेष नृत्य कार्यक्रम शनिवार, ७ फेब्रुवारी, सकाळी ९ ते दुपारी २ या वेळेत राम गणेश गडकरी रंगायतन, ठाणे (प.) येथे आयोजित करण्यात आला आहे. नृत्यालंकार मनाली मुकुंदराज देव यांच्या मार्गदर्शनाखाली स्थापन झालेल्या या संस्थेच्या संचालिका मनाली देव या प्रसिद्ध कथ्थक गुरू डॉ.  मंजिरी देव व सुप्रसिद्ध तबला वादक तालमणी पं. मुकुंदराज देव यांच्या शिष्या आहेत. या दोन्ही गुरूंचे मोलाचे मार्गदर्शन पण संस्थेला लाभत आहे. गुरु–शिष्य परंपरेच्या माध्यमातून कथ्थक नृत्यकलेचा वारसा पुढील पिढीपर्यंत पोहोचविण्याचे कार्य संस्था सातत्याने करत आहे. या रौप्य महोत्सवी सोहळ्यास डॉ.  मंजिरी देव, पं. मुकुंदराज देव, प्रख्यात कथ्थक नर्तक पं. नंदकिशोर कपोते, खासदार नरेश म्हस्के, तसेच ज्येष्ठ शास्त्रीय गायिका श्रीमती आशाताई खाडिलकर यांच्या उपस्थितीने कार्यक्रमाची शोभा वाढणार आहे. या महोत्सवात संस्थेच्या १५० हून अधिक विद्यार्थ्यांचा सहभाग असून कथ्थक नृत्याच्या विविध बंदिशी, भावप्रधान व कथानकात्मक सादरीकरणे, रंगतदार मराठी लोकनृत्ये तसेच “शक्तिरूपेण संस्थिता” या दिव्य स्त्रीशक्तीला अर्पण केलेल्या विशेष नृत्यनाट्याचे सादरीकरण करण्यात येणार आहे. २५ वर्षांचा हा प्रवास म्हणजे केवळ काळाची गणना नसून, शिस्त, साधना आणि परंपरेत रुजलेली संस्कारमूल्ये जपणाऱ्या अनेक पिढ्यांच्या घडणुकीचा उत्सव असल्याची भावना संस्थेच्या वतीने व्यक्त करण्यात आली. या सांस्कृतिक महोत्सवाला कला रसिक, सांस्कृतिक क्षेत्रातील मान्यवर तसेच माध्यम प्रतिनिधींनी आवर्जून उपस्थित राहावे, असे आवाहन आयोजकांनी केले आहे.

प्रा. खुशाल भिकनराव देशमुख यांना उत्कृष्ट व गुणवंत क्रीडा मार्गदर्शक पुरस्कार प्रदान जळगाव : चाळीसगाव एज्युकेशन सोसायटी संचलित बी. पी. आर्ट्स, एस. एम. ए. सायन्स, के. के. सी. कॉमर्स महाविद्यालय तसेच के. आर. कोतकर ज्युनिअर कॉलेज, चाळीसगाव येथील क्रीडा संचालक प्रा. खुशाल भिकनराव देशमुख यांना आज महाराष्ट्र शासनातर्फे दिला जाणारा “उत्कृष्ट व गुणवंत क्रीडा मार्गदर्शक पुरस्कार (सन २०२५–२६)”   प्रदान करण्यात आला. प्रजासत्ताक दिनानिमित्त जळगाव येथे आयोजित विशेष समारंभात पालकमंत्री  गुलाबरावजी पाटील, जळगाव जिल्ह्याचे मा.जिल्हाधिकारी रोहन घुगे, जिल्हा पोलीस अधीक्षक (एस. पी.) महेश्वर रेड्डी व जिल्हा क्रीडा अधिकारी रवींद्र नाईक , जळगाव जिल्हा परिषदेच्या मुख्य कार्यकारी अधिकारी (CEO) मीनल करनवाल यांच्या शुभहस्ते हा मानाचा पुरस्कार प्रा. खुशाल देशमुख यांना प्रदान करण्यात आला. प्रा. खुशाल देशमुख यांच्या या सन्मानामुळे चाळीसगाव एज्युकेशन सोसायटीचा तसेच चाळीसगाव तालुक्याच्या क्रीडा क्षेत्राचा गौरव वाढला आहे. महाविद्यालयाचे प्राचार्य डॉ. मिलिंद बिल्दीकर तसेच विविध समित्यांचे पदाधिकारी, प्राध्यापक, शिक्षक व शिक्षकेतर कर्मचाऱ्यांनी  प्रा.खुशाल देशमुख यांचे अभिनंदन करून पुढील यशस्वी वाटचालीसाठी शुभेच्छा दिल्या आहेत.

मुंबई ओपन इंटरक्लब टेनिस चॅम्पियनशिप २०२६ शिवाजी पार्क जिमखाना विजेता मुंबई : शिवाजी पार्क जिमखाना टेनिस कोर्ट्स येथे आयोजित “मुंबई ओपन इंटरक्लब टेनिस चॅम्पियनशिप २०२६” स्पर्धेत शिवाजी पार्क जिमखानाने अंतिम सामन्यात विजय…

माटुंगा ढाल क्रिकेट स्पर्धा बालमोहन शाळेचा‌‌ मोठा विजय ‌ मल्हार करंडेचा शानदार अष्टपैलू खेळ मुंबई. ..एम.जी .एस. एम ने आयोजित केलेल्या , माटुंगा ढाल   क्रिकेट स्पर्धेत,पहिल्या फेरीत  बालमोहन विद्या मंदिर इंग्लिश  सीबीएसई  शाळेने  आय.ई.एस.मुलुंड शाळेचा ३०९ धावांनी दणदणीत पराभव केला.अष्टपैलू खेळ करणारा मल्हार करंडे त्यांच्या विजयाचा शिल्पकार होता. बालमोहन विद्या मंदिर शाळेने ३७० धावांचे मोठे  आव्हान आय.ई.एस.  मुलुंड शाळेसमोर   विजयासाठी ठेवले. होते. बाल मोहनच्या मल्हार करंडे याने ९८ चेंडूत ११३  नाबाद धावा ‌ केल्या. त्याला  स्मित ठाकूरने ४२ धावा आणि विवान रेडकरने ३६ धावा करुन  चांगली साथ दिली. आय.ई.एस.मुलुंड शाळेचा डाव  ६१ धावांमध्येच संपुष्टात आला.मल्हार करंडेने सुरेख अष्टपैलू खेळ करीत ४ बळी देखील टिपले.त्याला अथर्व कासारे , वेद खांबेटे  आणि स्वराज साठे यांनी प्रत्येकी  २ बळी घेऊन छान साथ दिली.

महाराष्ट्र ओपन कॅरम स्पर्धा के श्रीनिवासन विजयी तर अपंग कॅरमपटू जगन्नाथ मैत्राणीला १ लाखाची मदत मुंबई : महाराष्ट्र कॅरम असोसिएशन आयोजित श्री हालारी विसा ओसवाल समाज हॉल येथे संपन्न झालेल्या भारतीय आयुर्विमा महामंडळ पुरस्कृत तिसऱ्या महाराष्ट्र ओपन कॅरम चॅलेंजर्स ट्रॉफीच्या विजयाची माळ तेलंगणाच्या के श्रीनिवासच्या गळ्यात पडली. अंतिम फेरीत या विश्व् विजेत्या कॅरमपटूने महाराष्ट्राच्या अभिषेक चव्हाणवर अटीतटीच्या लढतीत ९-२०, २३-०, २५-४ असा विजय मिळवला. उप उपांत्य सामन्यात अभिषेकने आंतर राष्ट्रीय खेळाडू उत्तर प्रदेशच्या महम्मद आरिफवर १३-१०, १५-१७ व २४-० असा अनपेक्षित विजय मिळवल्यामुळे अंतिम फेरीत तो काय करतो याकडे सर्वांचे लक्ष लागून राहिले होते. या सामन्यात महाराष्ट्राच्या अभिषेकने सुरुवात अतिशय छान केली होती. परंतु त्याला सातत्य राखता आले नाही. दुसरा सेट व तिसऱ्या सेटमध्ये त्याचे सर्व डावपेच निष्प्रभ ठरले. पहिल्यांदाच या स्पर्धेत खेळणाऱ्या के श्रीनिवासन आपल्या आक्रमक खेळाच्या जोरावर अंतिम विजय मिळवून चॅलेंजर्स ट्रॉफीवर आपले नाव कोरले व १ लाख ५० हजारांचे ईनाम पटकावले. तर अभिषेकने १ लाखाची कमाई केली व द्वितीय क्रमांकाचा चषक पटकावला. बँक ऑफ इंडिया, आय डी बी आय बँक, महाराष्ट्र बँक, युनियन बँक, मड जीन्स व बार्बेक्यू नेशन सहपुरस्कृत केलेल्या या स्पर्धेच्या तिसऱ्या क्रमांकासाठी झालेल्या लढतीत उत्तर प्रदेशचा महमंद आरिफ वरचढ ठरला. त्याने महाराष्ट्राच्या चांद युसूफ शेखला १७-८, १६-१२ असे रोखले आणि ७५ हजारांचे बक्षीस व चषक मिळवला. तर चौथ्या क्रमांकावर समाधान मानलेल्या चांदला ५० हजारांचे बक्षीस मिळाले. उपउपांत्य फेरीत पराभूत झालेल्याना प्रत्येकी २५ हजारांनी गौरविण्यात आले. तर स्पर्धेतील एकंदर ३२ खेळाडूंना मिळून ८ लाखांची रोख पारितोषिके देण्यात आली. अंतिम फेरीत प्रवेश करण्यापूर्वी की श्रीनिवासन चांद युसूफ शेखचा १८-१०, २५-६ असा फडशा पडला होता. भाग घेतलेल्या पूर्व कॅरमपटूंनी साहित्य पार्टनर असलेल्या सिस्का कंपनीच्या शुअर स्लॅम कॅरम व बुलेट शॉट सोंगट्यांवर एकंदर २३ व्हाईट स्लॅम व १८ ब्लॅक स्लॅमची नोंद केली. महाराष्ट्र कॅरम असोसिएशनच्या युट्युब चॅनेलवरून स्पर्धेच्या २ दिवसात अंतिम फेरी सहित एकंदर ३१ सामने सामन्यांचे लाईव्ह प्रक्षेपण करण्यात आले. शिवाय मराठी, हिंदी आणि इंग्रजीमधून महत्वाच्या सामन्यांचे धावते समालोचन करण्यात आले. स्पर्धेतील पहिल्या विजेत्यांना भारतीय आयुर्विमा महामंडळ स्थानीय लोकाधिकार समितीचे अध्यक्ष गोपाळ शेलार, भारतीय आयुर्विमा महामंडळाचे दादर पश्चिम शाखेचे प्रमुख वासुदेव मुखर्जी, सिस्का कॅरम कंपनीचे प्रमुख अतुल मेहरा, यु एस कॅरम फेडरेशनचे अध्यक्ष अतुल भावे, मड जीन्सचे अजगर शेख, आंध्र महासभा जिमखान्याचे सचिव वेंकटेश, महाराष्ट्र कॅरम असोसिएशनचे सचिव अरुण केदार यांच्या हस्ते पहिल्या चार खेळाडूंना पारितोषिके देण्यात आली. तर इतर विजेत्यांना महाराष्ट्र कॅरम असोसिएशनचे खजिनदार अजित सावंत, उपाध्यक्ष, धनंजय साठे, यतीन ठाकूर, प्रदीप भाटकर  व सहसचिव केतन चिखले यांनी बक्षिसे दिली. समारंभाचे सूत्रसंचालन प्रसन्ना संत यांनी केले. कॅनडा, श्रीलंका व मालदीवच्या खेळाडूंचा कॅरम चे घड्याळ देऊन सत्कार करण्यात आला. महाराष्ट्राचा अपंग कॅरमपटू जग्गनाथ मेत्राणी गेली ४० वर्षे सातत्याने सर्व स्पर्धांमध्ये भाग घेत असून त्याच्या या चिकाटीला सलाम म्हणून महाराष्ट्र कॅरम असोसिएशनने त्याचा या समारंभात १ लाख रुपयाचा धनादेश देऊन विशेष सन्मान केला. जगन्नाथ मैत्रणीला एक हात नसून दुसऱ्या हाताला फक्त एक करंगळी आहे. या एका करंगळीच्या जोरावर तो गेली अनेक वर्षे कॅरमचा आनंद लुटत असून प्रेक्षकांचे मनोरंजन करत आहे.