महाराष्ट्र राज्य होमगार्ड्ची दिवाळी गोड
दुपटीने वाढ, प्रतिदिन १०८३ रुपये कर्तव्यभत्ता लागू हरिभाऊ लाखे नाशिक : महाराष्ट्र राज्यातील गृहरक्षक दलाच्या स्वयंसेवकांच्या प्रलंबित विनंतीला मंजुरी देत मानधनात दुपटीने वाढ करण्यात आली आहे. त्यानुसार होमगार्डला आता प्रतिदिन १ हजार ८३ रुपये कर्तव्यभत्ता लागू झाला आहे. तर, सर्व भत्ते मिळून होमगार्डला प्रतिदिन अठराशे रुपयांपर्यंत मानधन मिळणार आहे. विधानसभा निवडणुकीपूर्वी शासनाने घेतलेल्या महत्त्वपूर्ण निर्णयांमध्ये होमगार्डच्या मानधनवाढीचाही समावेश आहे. महाराष्ट्रात ६ डिसेंबर १९४६ रोजी स्थापन झालेल्या गृहरक्षक दलाच्या स्वयंसेवकांच्या मानधनात वाढ करण्याचा निर्णय गृह विभागाने घेतला आहे. त्यानुसार १ ऑक्टोबर २०२४ पासून सुधारित भत्ता लागू झाल्याने नवरात्र उत्सवात पोलिसांसमवेत कर्तव्य बजावणाऱ्या होमगार्डला त्याचा लाभ होणार आहे. यासह दिवाळी व आगामी विधानसभा निवडणुकीतील बंदोबस्तातही सुधारित भत्त्यानुसार होमगार्डला मानधन दिले जाईल. तर, राज्यात गत महिन्यात ११ हजार २०७ गृहरक्षकांच्या भरतीची प्रक्रिया पूर्ण झाल्याने नवीन होमगार्डसाठी ही शुभवार्ता ठरली आहे. त्यानुसार, नाशिक शहरात १६१, इगतपुरीत चाळीस, सिन्नरमध्ये पन्नास आणि निफाडमध्ये तीस होमगार्डची निवड करण्यात आली. सध्या नाशिक जिल्ह्यात दीड हजारांपेक्षा जास्त होमगार्ड कर्तव्य बजावत आहेत. दरम्यान, होमगार्डला नियमित कर्तव्यावर बोलावण्यात येत नाही. महत्त्वाचा बंदोबस्त, सणोत्सव आणि निवडणुकीत होमगार्डला कर्तव्यावर नेमण्यात येते. यासह पोलिस ठाण्यांमध्ये मनुष्यबळाच्या कमतरतेमुळे अनेकदा नाकाबंदी व इतर बंदोबस्तासाठी बोलावण्यात येते. त्यामुळे पोलिस भरतीसह इतर यंत्रणांत भरतीच्या प्रतीक्षेत असणारे उमेदवार सध्या होमगार्डचे कर्तव्य पार पाडत आहेत. या सर्वांसाठी प्रतिदिन अठराशे रुपयांचे मानधन महत्त्वपूर्ण व उमेद वाढविणारे ठरणार आहे. सन २०२४-२५ साठी ५५२ कोटी अतिरिक्त रक्कम मंजूर सन २०२५ पासून दरवर्षी ७९५ कोटींची तरतूद करण्यास मान्यता सन २००८ पासून १५० रुपये प्रतिदिन भत्ता; तत्पूर्वी ७५ रुपये प्रतिदिन सन २०१४ पासून ३०० रुपये प्रतिदिन भत्ता; सध्या ५७० रुपये प्रतिदिन होमगार्ड भत्ता सध्याचे दर सुधारित दर कर्तव्य ५७० रुपये प्रतिदिन १,०८३ रुपये प्रतिदिन उपहार १०० रुपये २०० रुपये कवायत ९० रुपये १८० रुपये खिसा ३५ रुपये १०० रुपये भोजन १०० रुपये २५० रुपये