Category: होम

तरुणावरील हल्ल्यात दोघे अटकेत राज भंडारी पनवेल :मुंबई पुणे दृतगती महामार्गांवरील कळंबोली पोलीस ठाण्याच्या हादीत असणाऱ्या जाधववाडीतील परिसरात असलेल्या एका चायनीज सेंटरवर ३१ ऑगस्ट रोजी चायनीज खाण्यासाठी गेलेल्या तिघांनी फिर्यादी बसलेल्या टेबलवरच बसण्याचा हट्ट करून वाद घालत एका तरुणाला बेदम मारहाण करून गुन्हा दाखल होताच फरार झाले. कळंबोली पोलीसांच्या अथक प्रयत्नानंतर यापैकी दोघा आरोपींना कळंबोली पोलिसांनी अखेर महिन्याभरानंतर अटक केली. मात्र या घटनेतील एक फरार आरोपी निनाद पाटोळे हा अद्यापही पोलिसांच्या कचाट्यात सापडला नाही. यावेळी अटक केलेल्या दोन्ही आरोपींना न्यायालयात हजर केले असता त्या दोन्ही आरोपींना न्यायालयाने ११ ऑगस्टपर्यंत पोलीस कोठडी सुनावली आहे. यावेळी पिडीत कुटुंबाने मात्र या अशा दहशतवाद्यांना तडीपार करावे अथवा मोक्का लावण्याची विनंती प्रसारमध्यमांशी बोलताना केली आहे. याबाबत मिळालेल्या माहितीनुसार, फिर्यादी अक्षय डांगे हे कळंबोली (जाधववाडी) परिसरातील चायनीज सेंटरवर जेवण करण्यासाठी गेला असताना याठिकाणी आरोपी प्रसाद रंगिले उर्फ गोलू, धनंजय सेंगर आणि निनाद पाटोळे हे तिघे आले. यावेळी फिर्यादी अक्षय डांगे ज्या टेबलवर बसला होता त्याला तिथून उठण्यास सांगू लागले. यावेळी अक्षय डांगे हा उठण्यास तयार झाला नाही. याचाच राग प्रसाद रंगिले उर्फ गोलू आणि त्याच्या साथीदारांना आला. याच रागात या तिन्ही आरोपिंनी अक्षय याला मारण्यास सुरुवात केली. अक्षयला झालेली दुखापत इतकी भयानक होती की, या तिघांनी केलेल्या हल्ल्यात त्याच्या हातावर चॉपरने मोठा घाव बसला, तसेच त्याच्या इतर अवयव्यांना जबर मार बसला. त्यामुळे अक्षय डांगे या तरुणाला तब्बल ४ ते ५ दिवस रुग्णालयात भरती होऊन उपचार घ्यावे लागले. शुल्लक कारणावरून जीवे ठार मारण्यासाठी केलेला हा हल्ला माणुसकीला काळिमा फासणारा होता. हल्ल्याच्या दुसऱ्याच दिवशी कळंबोली पोलीस ठाण्यात प्रसाद रंगिले उर्फ गोलू, धनंजय सेंगर आणि निनाद पाटोळे  या तिघांच्या विरोधात जीवे ठार मारण्याचा प्रयत्न केल्याप्रकरणी गुन्हा दाखल झाला. गुन्हा दाखल होताच प्रसाद रंगिले उर्फ गोलू, धनंजय सेंगर आणि निनाद पाटोळे हे तीनही आरोपी पोलिसांना चकवा देत फरार झाले. तब्बल १ महिना आणि ८ दिवसांच्या शोधमोहिमेनंतर अखेर कळंबोली पोलिसांनी यातील दोघांना अटक करून न्यायालयात हजर केले. यावेळी न्यायालयाने या दोघांनाही ११ ऑगस्टपर्यंत पोलीस कोठडी सुनावली आहे. मात्र निनाद पाटोळे हा तिसरा आरोपी अद्यापही फरार आहे. याबाबत फिर्यादी अक्षय डांगे यांच्यासह परिवाराशी संपर्क साधला असता त्यांनी प्रसाद रंगिले उर्फ गोलुभाई आणि त्याच्या साथीदारांबाबत मोठी गोष्ट समोर आणली. या परिवाराने घटना घडल्यानंतर माहितीच्या अधिकारात गोलुभाई आणि धनंजय सेंगर यांची गुन्हेगारी पार्श्वभूमीच मागवून घेतली. यामध्ये गोलुभाई याच्यावर कळंबोली पोलीस ठाण्यात तब्बल १२ गुन्हे दाखल असल्याची माहिती समोर आली आहे. तर धनंजय सेंगर याच्यावरही मारहाण केल्याचा एक गुन्हा दाखल आहे. 0000

शतकानुशतकांच्या लेखन-परंपरेचे दर्शन रमेश औताडे मुंबई : भारताच्या प्राचीन लिखित वारशाची सफर घडवणाऱ्या ‘हस्तलिखित’  प्रदर्शनाचे आयोजन मुंबईतील सेंट झेवियर्स कॉलेजमध्ये करण्यात आले होते.  मुंबई महानगरपालिका मार्ग मेट्रो सिनेमा जवळ ९ ते ११ सप्टेंबर या तीन दिवस हे प्रदर्शन ठेवण्यात आले होते. या प्रदर्शनाची संकल्पना प्रसिद्ध इतिहास अभ्यासक सेंट झेवियर्स कॉलेजच्या मुख्य डॉ. अनिता राणे-कोठारे यांची होती. शिलालेख, कोरीव लेख आणि दुर्मिळ हस्तलिखिते या विषयाला वाहिलेले हे विशेष प्रदर्शन आहे. यात दगडावर कोरलेले शिलालेख, ताम्रपटांवरील कोरीव लेखांपासून ते ताडपत्री आणि जुन्या कागदावरील हस्तलिखितांपर्यंतचा मोठा संग्रह मांडण्यात आला आहे. शतकानुशतके भारताचा इतिहास, धर्म, प्रशासन आणि साहित्य कसे जतन केले गेले, याची प्रत्यक्ष अनुभूती या प्रदर्शनातून मिळणार आहे. भारतीय लिपी आणि लेखन माध्यमांचा विकासक्रम अत्यंत सोप्या आणि अभ्यासपूर्ण पद्धतीने येथे उलगडून दाखवण्यात आला आहे. प्रत्येक वस्तूचा ऐतिहासिक आणि सांस्कृतिक संदर्भही समजावून सांगण्यात आला आहे. या प्रदर्शनाचे आणखी एक वैशिष्ट्य म्हणजे सोबत दिली जाणारी विशेष माहिती-पुस्तिका आहे. डॉ. अनिता राणे-कोठारे व हृदय कुलकर्णी यांनी या पुस्तिकेचे लेखन आणि संपादन केले आहे. ही पुस्तिका केवळ प्रदर्शनाची माहिती देत नाही, तर प्राचीन भारतीय इतिहास आणि पुरातत्वशास्त्रातील शिलालेखांच्या अभ्यासाचे महत्त्व या पुस्तिकेत सांगितले आहे.

आरपीआयच्या आंदोलनाला यश केतन खेडेकर मुंबई : भारतरत्न डॉक्टर बाबासाहेब आंबेडकर यांचे हनुमानाच्या अवतारातील असलेले चित्र जहांगीर आर्ट गॅलरी येथील प्रदर्शनामध्ये भरवण्यात आले होते.  या ठिकाणी डॉक्टर बाबासाहेबांना हनुमानाच्या रूपात पुस्तक घेऊन आकाशात  भ्रमंती करताना दाखवले दाखवले होते. याबाबत आरपीआयच्या कार्यकर्त्यांना माहिती मिळाली असता त्यांनी त्वरित त्या ठिकाणी जाऊन हे हनुमानाच्या स्वरूपातील असलेले बाबासाहेबांचे पेंटिंग त्वरित उतरवले.  रिपब्लिकन पार्टी ऑफ इंडिया दक्षिण मुंबई जिल्हाध्यक्ष संजय पवार यांचे नेतृत्वाखाली हे आंदोलन करण्यात आले. हे आंदोलन अगदी शांततापूर्णपणे झाले असून यामध्ये कोणताही अनुचित प्रकार घडला नाही. तसेच डॉक्टर बाबासाहेब आंबेडकरांना हनुमानाचे रूपात दाखवणे म्हणजे फार मोठी गंभीर चूक आहे आणि ही चूक यापुढे घडणार नाही अशी ग्वाही जहांगीर आर्ट गॅलरीच्या व्यवस्थापक के जी मेनन  मॅडम यांनी दिली. भारतरत्न डॉक्टर बाबासाहेब आंबेडकर म्हणजे महामानव असून सर्वांसाठी दैवत आहे. त्यांचा असे हनुमानाचा रूप दाखवून चित्र काढणे हे योग्य नाही. आम्ही बाबासाहेबांनी सांगितलेल्या दया आणि करुणेचा माध्यमातून शांततेने आंदोलन करून हे चित्र प्रदर्शनातून काढले असून चित्रकार राजेश केदारे यांनी देखील आपली चूक झाल्याचे कबूल केले असून माफी मागितली  असल्याची माहिती रिपब्लिकन पार्टी ऑफ इंडियाची दक्षिण मुंबई जिल्हाध्यक्ष संजय पवार यांनी दिली. यावेळी त्यांच्यासोबत दक्षिण मुंबईचे तालुका अध्यक्ष विशाल भाई दिवार आणि इतर पदाधिकारी उपस्थित होते.जिल्हा उपाध्यक्ष विजय जाधव, कुलाबा तालुकाध्यक्ष मनोहर जाधव, जेष्ठ कार्यकर्ते डॅ.राजेंद्र जाधव, डॉ. रमेश ईपाकायला, तालुक्यातील कार्यकर्ते, वॉर्ड पदाधिकाऱ्यांसह, मुंबई प्रदेश चे सुनिल गरूड, इत्यादी पदाधिकारी उपस्थित होते.

सातबारा, नकाशे अन् ई-मोजणीची सेवा मोबाईलवर अशोक गायकवाड कर्जत : भूमी अभिलेख विभागातील कागदपत्रे आणि विविध अभिलेख मिळविण्यासाठी नागरिकांना आता शासकीय कार्यालयांच्या वारंवार चकरा मारण्याची गरज राहणार नाही. ‘महाभूमी महाराष्ट्र’ या ऑनलाइन पोर्टलमुळे भूमी अभिलेख विभागाच्या अनेक महत्त्वाच्या सेवा घरबसल्या उपलब्ध झाल्या असून, नागरिकांचा वेळ, पैसा आणि श्रम वाचणार आहेत. या डिजिटल सुविधेचा नागरिकांनी जास्तीत जास्त लाभ घ्यावा, असे आवाहन कर्जत भूमी अभिलेख कार्यालयाचे शिरस्तेदार शैलेश जाधव यांनी केले आहे. जमाबंदी आयुक्त तथा संचालक, भूमी अभिलेख, महाराष्ट्र राज्य, पुणे शैलेश नवल आणि अपर जमाबंदी आयुक्त तथा अतिरिक्त संचालक ज्ञानेश्वर खिल्लारे यांच्या मार्गदर्शनाखाली ऑनलाइन सेवा अधिक सुलभ करण्यात आल्या आहेत. ‘महाभूमी’ पोर्टलवर डिजिटल ७/१२ उतारा, गाव नकाशे, एकत्रीकरणपूर्व टिपण, फाळणी नकाशा आणि पक्का बुक यांसारखे अभिलेख ऑनलाइन डाउनलोड करता येणार आहेत. तसेच एकत्रीकरण योजनेचा उतारा आणि पोटहिस्सा नकाशेही घरबसल्या मिळविता येणार आहेत. ई-मोजणीसाठीही नागरिकांना मोठा दिलासा मिळणार आहे. ई-मोजणी अर्जाची सद्यस्थिती आणि मोजणी नोटीस ऑनलाइन पाहता व डाउनलोड करता येणार असून ही सुविधा विनाशुल्क उपलब्ध आहे. अर्जानुसार मोजणीची क-प्रतदेखील ऑनलाइन डाउनलोड करता येणार आहे. एकाच डिजिटल व्यासपीठावर विविध सेवा उपलब्ध झाल्याने कार्यालयीन पाठपुरावा कमी होऊन शासकीय कामकाजात पारदर्शकता आणि गतिमानता वाढण्यास मदत होणार आहे. ‘सरकारी कार्यालयात जाण्याऐवजी सेवा आता नागरिकांच्या मोबाईलवर’ या संकल्पनेला ‘महाभूमी’ पोर्टलमुळे प्रत्यक्ष बळ मिळाले असून, भूमी अभिलेख विभागाच्या डिजिटल सेवेचा हा उपक्रम नागरिकांसाठी मोठा दिलासा ठरणार आहे. 0000000

राज्यपाल जिष्णु देव वर्मा यांच्या हस्ते शपथविधी अशोक गायकवाड* मुंबई : अलाहाबाद उच्च न्यायालयातील न्यायमूर्ती महेश चंद्र त्रिपाठी यांनी बुधवारी मुंबई उच्च न्यायालयाच्या मुख्य न्यायमूर्तीपदाची शपथ घेतली. लोकभवन येथे झालेल्या समारंभात राज्यपाल जिष्णु देव वर्मा यांनी त्यांना पदाची शपथ दिली. शपथविधीनंतर मुख्यमंत्री देवेंद्र फडणवीस आणि उपमुख्यमंत्री सुनेत्रा पवार यांनी न्या. त्रिपाठी यांचे अभिनंदन केले. समारंभाच्या प्रारंभी राज्याचे मुख्य सचिव राजेश अग्रवाल यांनी न्या. त्रिपाठी यांच्या नियुक्तीची राष्ट्रपतींची अधिसूचना आणि अधिपत्र वाचून दाखविले. राष्ट्रगान, वंदे मातरम् आणि राज्यगीताने कार्यक्रमाची सुरुवात झाली. शपथविधीनंतर वंदे मातरम् आणि राष्ट्रगीताने समारंभाची सांगता झाली. न्यायमूर्ती चंद्रशेखर यांची सर्वोच्च न्यायालयात नियुक्ती झाल्यानंतर मुंबई उच्च न्यायालयाचे मुख्य न्यायमूर्तीपद रिक्त झाले होते. त्यानंतर न्यायमूर्ती रवींद्र घुगे यांनी या पदाचा अतिरिक्त कार्यभार सांभाळला होता. शपथविधी सोहळ्यास महाराष्ट्र विधान परिषदेचे सभापती राम शिंदे, विधानसभा अध्यक्ष राहुल नार्वेकर, उपसभापती सचिन अहिर, मंत्री छगन भुजबळ, मंत्री मंगल प्रभात लोढा, मुंबईच्या महापौर रितू तावडे, तसेच मुंबई आणि अलाहाबाद उच्च न्यायालयांतील न्यायमूर्ती उपस्थित होते. मुंबई उच्च न्यायालयाच्या निवृत्त मुख्य न्यायमूर्ती सुजाता मनोहर आणि न्यायमूर्ती मोहित शाह यांचीही यावेळी उपस्थिती होती.

मुंबई, ८ सप्टेंबर: आरसीएफ स्पोर्ट्स क्लबतर्फे मुंबईत होणाऱ्या स्थानिक स्पर्धांमध्ये आरसीएफ व्हॉलीबॉल संघाचे प्रतिनिधित्व करण्यासाठीच्या संघासाठी खेळाडूंच्या निवडचाचण्यांचे आयोजन करण्यात आले आहे. या चाचण्या चेंबूर येथीलआरसीएफ स्पोर्ट्स क्लबच्या मैदानावर शुक्रवार, ११ सप्टेंबर आणि शनिवार, १२ सप्टेंबर रोजी सकाळी ९ वाजता घेतल्या जातील. १८ वर्षांवरील खेळाडू या चाचण्यांसाठी पात्र आहेत. निवड चाचण्यांदरम्यान पडताळणीसाठी खेळाडूंनी आपली क्रीडा प्रमाणपत्रे आणि कामगिरीचे अहवाल (मूळ आणि छायाप्रत) सोबत आणणे आवश्यक आहे. इच्छुक खेळाडूंनी खेळाच्या गणवेशात मैदानावर उपस्थित राहावे. खेळाडूंनी अधिक माहितीसाठी सुनील कुलकर्णी (मोबाईल: ७९७७०६७५६४) यांच्याशी संपर्क साधावा.

मराठा वॉरिअर्स गडकिल्ले संवर्धक आणि महाराष्ट्र पोलीस बॉईज संघटनेचा पुढाकार दिवा : दिव्यातील मराठा वॉरिअर्स गडकिल्ले संवर्धक, महाराष्ट्र राज्य आणि महाराष्ट्र पोलीस बॉईज संघटना यांच्या संयुक्त विद्यमाने रायगड जिल्ह्यातील दुर्गम आदिवासी पाडे, वाड्या- वस्त्या तसेच शाळांमधील गरजू विद्यार्थ्यांसाठी शैक्षणिक व क्रीडा साहित्य वाटपाचा सामाजिक उपक्रम उत्साहात पार पडला. ग्रामीण आणि दुर्गम भागातील विद्यार्थ्यांना शिक्षणासाठी आवश्यक साधने उपलब्ध करून देणे, त्यांच्या शैक्षणिक प्रगतीला चालना देणे तसेच क्रीडा क्षेत्राच्या माध्यमातून त्यांच्या शारीरिक आणि सर्वांगीण विकासाला प्रोत्साहन देणे, हा या उपक्रमामागील मुख्य उद्देश होता. उपक्रमादरम्यान अंगणवाडी तसेच प्राथमिक शाळांमधील विद्यार्थ्यांना स्कूल बॅग, पाण्याची बाटली, जेवणाचा डबा, कॅमलिन ड्रॉईंग बुक यांसह लहान मुलांसाठी विविध खेळण्यांचे वाटप करण्यात आले. शैक्षणिक साहित्य मिळाल्याने विद्यार्थ्यांच्या चेहऱ्यावर आनंद दिसून आला. विद्यार्थ्यांमध्ये क्रीडाप्रेम निर्माण व्हावे आणि त्यांच्या शारीरिक विकासाला चालना मिळावी, यासाठी क्रिकेट बॅट-बॉल, फुटबॉल, बॅडमिंटन किट, कॅरम तसेच स्किपिंग रोप आदी क्रीडा साहित्याचेही वाटप करण्यात आले. उपक्रमाच्या नियोजनानुसार रविवारी सुतारवाडी, वाकी आदिवासी वाडी, कामत आदिवासी वाडी आणि बाईत आदिवासी वाडी येथे प्रत्यक्ष भेट देऊन विद्यार्थ्यांसह स्थानिक रहिवाशांना साहित्याचे वाटप करण्यात आले. यानंतर सोमवारी पातरशेत आदिवासी वाडी, स्थानिक जिल्हा परिषद शाळा तसेच अंगणवाडी येथे भेट देऊन विद्यार्थ्यांना शैक्षणिक व क्रीडा साहित्य वितरित करण्यात आले. या सामाजिक उपक्रमासाठी कै. एकनाथ भगत तसेच ठाणे जिल्हा ओबीसी अध्यक्ष अजित भगत यांचे विशेष सहकार्य लाभले. संघटनेचे संस्थापक, अध्यक्ष तथा ठाणे जिल्हा युवा अध्यक्ष राहुल दत्ताराम खैर यांच्या नेतृत्वाखाली पदाधिकारी व सदस्यांनी या उपक्रमात उत्स्फूर्त सहभाग घेतला. यावेळी उपाध्यक्ष रोहित जाधव, कार्याध्यक्ष नितीन शिवगण, सेक्रेटरी अमित गुरव, उपसेक्रेटरी रोहित खैर, मीडिया प्रमुख अभिजित गावडे व सुमित गावडे, संपर्कप्रमुख रवींद्र शिंदे तसेच सचिन गावडे, कार्तिक गोसावी, कलाप्पा चौगुले, यश खैर, रोहन खैर आणि रोशन खैर आदी सदस्य उपस्थित होते. उपक्रमावेळी संबंधित शाळांचे मुख्याध्यापक, शिक्षक-शिक्षिका, स्थानिक ग्रामस्थ आणि पालक मोठ्या संख्येने उपस्थित होते. दुर्गम आदिवासी भागातील विद्यार्थ्यांना शिक्षण आणि क्रीडेसाठी आवश्यक साहित्य मिळाल्याने पालक व ग्रामस्थांनी या उपक्रमाचे कौतुक केले. दुर्गम आणि आदिवासी भागातील विद्यार्थ्यांच्या शिक्षणाला तसेच सर्वांगीण विकासाला हातभार लावणारा हा तीन दिवसीय सामाजिक उपक्रम यशस्वीपणे पार पडला. सर्व नियोजित कार्यक्रम पूर्ण केल्यानंतर मंगळवारी सायंकाळी संघटनेचे पदाधिकारी व सदस्यांनी परतीचा प्रवास केला.

 विवेक पंडित यांचे अधिकाऱ्यांना निर्देश योगेश चांदेकर पालघर :  जिल्हा परिषद शाळांची पुन्हा पुन्हा पाहणी आणि माहिती संकलन करण्याऐवजी प्रत्येक शाळेतील शिक्षक व मूलभूत सुविधांच्या त्रुटी निश्चित करून त्या कालबद्ध पद्धतीने दूर करा, अशी मागणी आदिवासी विकास आढावा समितीचे अध्यक्ष (मंत्री दर्जा) विवेक पंडित यांनी राज्य शासनाकडे केली आहे. शिक्षण विभागाच्या ‘चला शाळेत जाऊया’ अभियानाचे रूपांतर आता ‘त्रुटी निर्मूलन अभियानात’ करण्याची गरज असल्याचे त्यांनी म्हटले आहे. शिक्षण आयुक्तालयाने ५ सप्टेंबर ते २० ऑक्टोबरदरम्यान वरिष्ठ अधिकाऱ्यांना जिल्हा परिषद शाळांच्या पाहणीचे निर्देश दिले आहेत. मात्र UDISE व शिक्षण विभागाकडे शाळानिहाय माहिती आधीच उपलब्ध असताना पुन्हा सर्वेक्षण कशासाठी, असा सवाल पंडित यांनी प्रधान सचिवांना पाठविलेल्या पत्रातून केला आहे. “शिक्षक नाहीत, वर्गखोल्या अपुऱ्या आहेत, पाणी-स्वच्छतागृह-वीज नाही, हे पुन्हा शोधण्यात वेळ घालवू नका. कोणत्या शाळेत काय कमी आहे, ते कधी पूर्ण करणार आणि त्यासाठी कोणता अधिकारी जबाबदार आहे, हे निश्चित करा,” अशी मागणी त्यांनी केली. प्रत्येक जिल्हा परिषद शाळेची School-wise Deficiency List तयार करून प्रत्येक त्रुटीसमोर जबाबदार अधिकारी, आवश्यक निधी आणि काम पूर्ण करण्याची अंतिम तारीख नमूद करावी. दर १५ दिवसांनी बैठकींची संख्या न मोजता किती त्रुटी होत्या, किती दूर झाल्या आणि किती प्रलंबित आहेत, याचा सार्वजनिक आढावा घ्यावा, असे पंडित यांनी सुचविले आहे. पालघर हा विस्तारित आकांक्षित जिल्हा असल्याने तेथे हे अभियान ‘मॉडेल परिणामाधारित अभियान’ म्हणून राबविण्याची मागणीही त्यांनी केली. “किती शाळांना भेटी दिल्या, हा अभियानाच्या यशाचा निकष नसावा; अधिकारी गेल्यानंतर किती शाळांमध्ये प्रत्यक्ष बदल झाला, हेच शासनाने मोजावे,” असे पंडित यांनी स्पष्ट केले.