Category: मुंबई

६५ किलो फ्रीस्टाइल गटात करणार भारताचे प्रतिनिधित्व; ‘शिवसेना विथ जेन झी’ उपक्रमातून सत्कार कल्याण : कल्याण पूर्व, नांदिवली येथील जय बजरंग कुस्ती आखाड्याची युवा कुस्तीपटू वैष्णवी पाटील हिची अमेरिकेतील लास वेगास येथे…

डोंबिवलीतील निकृष्ट डांबरीकरणाचा सत्यवान म्हात्रेंनी केला पर्दाफाश कल्याण : डोंबिवली शहरातील रस्त्यांवर करण्यात आलेल्या डांबरीकरणाच्या कामाच्या दर्जावरून आता प्रश्नचिन्ह उपस्थित झाले आहे. रस्त्याचे डांबरीकरण होऊन अवघे दोन दिवस झाले असतानाच डांबर उखडून रस्त्यावर खडी पसरल्याचा प्रकार सामाजिक कार्यकर्ते सत्यवान म्हात्रे यांनी उघडकीस आणला आहे. डांबर उखडल्यामुळे रस्त्यावर मोठ्या प्रमाणात खडी पसरली असून, वाहनचालकांना त्यावरून वाहने चालवताना अडचणींचा सामना करावा लागत आहे. विशेषतः दुचाकीस्वारांसाठी ही खडी धोकादायक ठरू शकते. अचानक वाहन घसरून अपघात होण्याची भीती निर्माण झाली आहे. रस्त्यांच्या डांबरीकरणासाठी मोठा खर्च केला जात असताना अवघ्या दोन दिवसांत डांबर उखडत असेल, तर कामाच्या दर्जाची तपासणी नेमकी कशी केली जाते, असा सवाल सत्यवान म्हात्रे यांनी उपस्थित केला आहे. संबंधित ठेकेदार आणि प्रशासनाने या कामाची पाहणी करून निकृष्ट कामाबाबत जबाबदारी निश्चित करावी, अशी मागणीही त्यांनी केली. अशी टीका करत सत्यवान म्हात्रे यांनी डोंबिवलीतील रस्त्यांच्या कामाच्या गुणवत्तेवर नाराजी व्यक्त केली. नागरिकांच्या पैशातून होणारी विकासकामे टिकाऊ आणि दर्जेदार असावीत, अशी अपेक्षा व्यक्त करत त्यांनी प्रशासनाने या प्रकाराची गांभीर्याने दखल घ्यावी, अशी मागणी केली आहे. 000000

कापडी पिशवी व्हेंडिंग मशीन, सौर पथदिव्यांसह शेतकरी-व्यापारी भवनाच्या कामाला सुरुवात कल्याण : कल्याण कृषी उत्पन्न बाजार समितीच्या आवारात शेतकरी, व्यापारी आणि नागरिकांसाठी विविध सुविधा उपलब्ध करून देण्याच्या उद्देशाने हाती घेण्यात आलेल्या उपक्रमांचे उद्घाटन तसेच विविध विकासकामांचे भूमिपूजन मान्यवरांच्या हस्ते करण्यात आले. यामध्ये कापडी पिशवी व्हेंडिंग मशीनचे ५ संच, सौर ऊर्जेवर चालणारे ३० पथदिवे, शेतकरी व व्यापारी भवन तसेच मुख्य बाजार आवाराच्या प्रवेशद्वाराच्या कामाचा समावेश आहे. या कार्यक्रमाला आमदार किसन कथोरे, आमदार राजेश मोरे, आमदार सुलभा गायकवाड, राष्ट्रवादी काँग्रेसचे प्रदेश उपाध्यक्ष प्रमोद हिंदुराव, ठाणे जिल्हा मध्यवर्ती सहकारी बँकेचे अध्यक्ष अरुण पाटील, बाजार समितीचे सभापती रवींद्र घोडविंदे, उपसभापती जालिंदर पाटील यांच्यासह बाजार समितीचे संचालक व पदाधिकारी उपस्थित होते. यावेळी आमदार किसन कथोरे यांनी बाजार समितीने सुरू केलेल्या उपक्रमांचे कौतुक केले. कापडी पिशवी व्हेंडिंग मशीन बसविणे हा प्लास्टिकमुक्त बाजार समितीच्या दिशेने महत्त्वपूर्ण उपक्रम असल्याचे त्यांनी सांगितले. शेतकरी आणि व्यापाऱ्यांना बाजार समितीच्या माध्यमातून आवश्यक त्या सुविधा उपलब्ध करून देणे गरजेचे असून, रस्ते, वीज, पाणी, शेतकरी भवन, माथाडी भवन यांसारख्या मूलभूत सुविधांवर भर देण्याची आवश्यकता असल्याचे त्यांनी नमूद केले. तसेच बाजार समितीच्या स्विच लाईट स्टेशनसाठी १५ कोटी रुपयांचा निधी मंजूर करण्यात आला असून, या कामालाही लवकरच सुरुवात करण्यात येणार असल्याची माहिती आमदार कथोरे यांनी दिली. बाजार समितीच्या सर्व संचालक मंडळाने एकत्रितपणे काम करून शेतकरी आणि व्यापाऱ्यांच्या हितासाठी अधिकाधिक सुविधा निर्माण कराव्यात, असे आवाहनही त्यांनी केले. या कार्यक्रमास वसंत लोणे, नरेश सुरोशी, भरत गोंधळे, कपील थळे, शंकर आव्हाड, योगेश धुमाळ, रवींद्र भोईर, मनोहर पाटील, रवींद्र आव्हाड, विजय सुरोशी, गिरीश पाटील, अरुण पाटील, किशोर वाडेकर, काशिनाथ नरवडे, विद्या पाटील, शारदा पाटील यांच्यासह बाजार समितीचे पदाधिकारी, संचालक, व्यापारी, शेतकरी व नागरिक मोठ्या संख्येने उपस्थित होते.

 ५०० लिटर भेसळयुक्त दूध नष्ट, परवान्याशिवाय सुरू होती विक्री कल्याण : डोंबिवली पश्चिमेतील भोईरवाडी परिसरात अन्न व औषध प्रशासनाने (एफडीए) मोठी कारवाई करत सुमारे ५०० लिटर भेसळयुक्त दूध नष्ट केले. सांगली येथून डोंबिवलीत आणलेल्या दुधाची तपासणी केली असता त्यामध्ये भेसळ आढळून आली. तसेच संबंधित व्यक्तीकडे दूध विक्रीसाठी आवश्यक परवानाही नसल्याचे तपासात समोर आले. एफडीएचे अधिकारी राजेंद्र कर्डक यांनी दिलेल्या माहितीनुसार, हे भेसळयुक्त दूध कल्याण-डोंबिवली परिसरातील विविध डेअऱ्यांच्या माध्यमातून विक्रीसाठी पाठवले जात असल्याची माहिती मिळाली आहे. त्यानंतर विभागाच्या पथकाने कारवाई करत सुमारे ५०० लिटर दूध नष्ट केले. भेसळयुक्त दूध नेमके कोणत्या स्वरूपाचे होते, त्याचा पुरवठा कोणत्या डेअऱ्यांना करण्यात आला आणि या प्रकरणात आणखी कोणाचा सहभाग आहे, याचा तपास सध्या सुरू आहे. अन्न व औषध प्रशासनाचे प्रमुख तुकाराम मुंढे यांच्या मार्गदर्शनाखाली या प्रकरणात पुढील तपास आणि आवश्यक कायदेशीर कारवाई करण्यात येत असल्याचे अधिकाऱ्यांनी सांगितले. 0000000

 आरोग्यसेवेसाठी प्रशासन सज्ज  गणेश मंडळांच्या माध्यमातून नागरिकांपर्यंत आरोग्य सुविधा पोहोचणार अशोक गायकवाड अलिबाग : गणेशोत्सवाच्या पार्श्वभूमीवर रायगड जिल्ह्यातील नागरिकांच्या आरोग्याची काळजी घेण्यासाठी प्रशासनाने कंबर कसली आहे. ‘श्री गणेशा आरोग्याचा २०२६’ या महत्त्वाकांक्षी आरोग्य अभियानाच्या पूर्वतयारीचा आढावा घेण्यासाठी जिल्हाधिकारी कार्यालयात जिल्हाधिकारी किशन जावळे यांच्या अध्यक्षतेखाली महत्त्वपूर्ण बैठक पार पडली. सार्वजनिक गणेशोत्सव मंडळे आणि सार्वजनिक ठिकाणी ५०० हून अधिक आरोग्य शिबिरे आयोजित करण्याचे नियोजन करण्यात आले आहे. मुख्यमंत्री सहाय्यता निधी व धर्मादाय रुग्णालय मदत कक्ष, रायगड यांच्या पुढाकारातून राबविण्यात येणाऱ्या या अभियानात नागरिकांना विविध आरोग्य सुविधा उपलब्ध करून देण्यावर भर देण्यात येणार आहे. बैठकीला जिल्हा शल्यचिकित्सक, जिल्हा आरोग्य अधिकारी, वैद्यकीय आरोग्य अधिकारी, धर्मादाय रुग्णालयांचे प्रतिनिधी, महात्मा ज्योतिबा फुले जन आरोग्य योजना समन्वयक तसेच विविध गणेश मंडळांचे पदाधिकारी सहभागी झाले होते. आरोग्य शिबिरांचे नियोजन, आवश्यक मनुष्यबळ, वैद्यकीय सुविधा, विभागांमधील समन्वय आणि अभियानाची प्रभावी अंमलबजावणी यावर बैठकीत सविस्तर चर्चा झाली. जिल्हा कक्षाचे वैद्यकीय अधिकारी डॉ. विकास पवार यांनी अभियानाच्या नियोजनाची माहिती दिली. अभियान यशस्वी करण्यासाठी सर्व संबंधित विभागांनी परस्पर समन्वयाने काम करावे, तसेच नागरिकांना जास्तीत जास्त आरोग्य सुविधा उपलब्ध करून द्याव्यात, अशा स्पष्ट सूचना जिल्हाधिकारी किशन जावळे यांनी दिल्या. गणेशोत्सवाच्या गर्दीतच नागरिकांच्या आरोग्याची तपासणी आणि आवश्यक मार्गदर्शन उपलब्ध व्हावे, हा या उपक्रमामागील प्रमुख उद्देश आहे. जिल्ह्यातील नागरिकांनी या आरोग्य शिबिरांचा मोठ्या संख्येने लाभ घ्यावा, असे आवाहन मुख्यमंत्री सहाय्यता निधी कक्षाच्या वतीने करण्यात आले आहे. 0000

मुकुंद रांजाणे माथेरान: यावर्षी येथील सामाजिक कार्यकर्ते तथा हॉटेल व्यवस्थापक बळीराम तातोड यांच्या वतीने गणेशभक्तांसाठी सेवाभावी उपक्रम राबविण्यात आला असून गणेशभक्तांना मोफत साखरेचे वाटप करण्यात आले. माथेरान मध्ये एकूण ११५ गणेशमूर्तीची प्रतिष्ठापना केली जाते. सर्व गणेश भक्तांना प्रत्येकी तीन किलो साखरेचे वाटप जॉली चिक्की या दुकानात करण्यात आले. यावेळी वाटप करताना दिलीप नाईक, दिगंबर ढोले यांसह अन्य मित्र परिवार, नागरिक उपस्थित होते. 0000 संभाजी ब्रिगेडच्या वतीने होणार ठाण्यातील पत्रकार, डॉक्टरांचा सन्मान अनिल ठाणेकर ठाणे: संभाजी ब्रिगेडचे अध्यक्ष मनोजदादा आखरे यांच्या वाढदिवसानिमित्त राज्यभर “कार्यकर्ता सन्मान दिन” साजरा करण्यात येत असतो. त्याच अनुषंगाने ठाण्यातील पत्रकारिता, वैद्यकीय, शैक्षणिक आणि सामाजिक क्षेत्रातील व्यक्तींना “संभाजी ब्रिगेड सन्मान पुरस्कार” देऊन सन्मानित करण्यात येणार आहे, अशी माहिती संभाजी ब्रिगेडचे ठाणे जिल्हाध्यक्ष चंद्रशेखर पवार यांनी दिली. उद्या होणाऱ्या  या सन्मान सोहळ्यात ठाणे शहर दैनिक पत्रकार संघाचे नवनिर्वाचित अध्यक्ष दिलीप शिंदे, सरचिटणीस राजीव डाके ,सहचिटणीस प्रसाद सकट, उपाध्यक्ष मंडलिक, खजिनदार राजेश शेटकर, कार्याध्यक्ष शेलार, कार्यकारिणी सदस्य नितीन दुधसागर, सारिका साळुंखे, सचिन देशमाने, अमर राजभर, गजानन हरिमकर ,  यांच्यासह पत्रकार गणेश भोईटे,  अतुल पानसरे, प्रफुल वाघोले, वसंत चव्हाण, प्रिती पांड्ये, विकास काटे, संदीप लबडे, समीर मार्क॔डे, संदीप खर्डीकर,  संदीप भारती, प्रफुल्ल गांगुर्डे, गणेश थोरात, मनोज देवकर, निकेश शार्दुल , यतीन पवार, नम्रता सुर्यवंशी, संपदा शिंदे,  शिवकुमार मिश्रा, गणेश कुरकुंडे, प्रविण कामत , अनामिका भालेराव, *सिव्हील रूग्णालयाचे अधिष्ठाता डॉ.. कैलास पवार, डॉ. अमोल गिते, डॉ. अजय सिंग, डॉ. अबरार,  डॉ. पांडुरंग भोसले, डॉ. संतोष कदम, दिपाली जाधव, कविता मौल्य , अनिरूद्ध कुलकर्णी, सामाजिक कार्यकर्ते संगम डोंगरे, प्रदीप पूर्णेकर,निशिगंध चोरगे, जतीन शहा, आशा पाटे, मारूती भालशंकर यांना सन्मानित करण्यात येणार आहे. उद्या दिनांक १२ सप्टेंबर रोजी दुपारी दोन वाजता हा पुरस्कार वितरण सोहळा नरेंद्र बल्लाळ सभागृह,  ठामपा मुख्यालय,  ठाणे येथे मा. अतिरिक्त आयुक्त देविदास पवार, मराठा सेवा संघाचे अध्यक्ष योगेश पाटील,  अतिरिक्त आयुक्त संदीप माळवी यांच्या उपस्थितीत पार पडणार आहे. यावेळी शिवचरित्र आणि सद्यस्थिती या विषयावर मान्यवर मार्गदर्शन करणार आहेत, असे चंद्रशेखर पवार यांनी सांगितले.

– माजी केंद्रीय राज्यमंत्री कपिल पाटील यांचा आक्षेप ठाणे : ठाणे-लघर जिल्हा मध्यवर्ती सहकारी बँकेच्या (टीडीसी)वार्षिक अहवालात मुख्यमंत्री देवेंद्र फडणवीस यांच्याआधी माजी केंद्रीय कृषी मंत्री शरद पवार यांचा फोटो छापल्याचा…

ठाणे-लघर जिल्हा मध्यवर्ती सहकारी बँकेची वार्षिक सर्वसाधारण सभा गुरुवारी गडकरी रंगायतनमध्ये पार पडली. या सभेच्या सुरुवातीलाच अनेक सदस्यांनी अहवालातील चूकांवर आक्षेप घेतला. भाजपची बँकेत सत्ता असताना मुख्यमंत्री देवेंद्र फडणवीस यांचा…

– महाराष्ट्र अंधश्रद्धा निर्मूलन समितीची निवासी जिल्हाधिकाऱ्यांकडे मागणीl ठाणे : उत्सव साजरे करण्याच्या नागरिकांच्या अधिकाराचा पूर्ण आदर करतानाच नागरिकांच्या आरोग्याच्या किंमतीवर मोठ्या आवाजात डॉल्बी-डीजे वाजविणे आणि धोकादायक उच्च-तीव्रतेच्या लेझर लाईट्सचा वापर होऊ नये, यासाठी ठाणे जिल्ह्यातही डॉल्बी व धोकादायक लेझर लाईट्सवर कठोर बंदी अथवा निर्बंध लागू करावेत, अशी मागणी महाराष्ट्र अंधश्रद्धा निर्मूलन समिती–ठाणे शहरच्या शिष्टमंडळाने ठाणे निवासी जिल्हाधिकारी (प्रांत) संदीप माने यांच्याकडे केली. यावेळी कार्याध्यक्ष अनिल ठाणेकर, प्रधान सचिव अशोक मोहिते, किशोर भोईर, ठाणे नगर विभाग कार्यवाह दर्शना ढोले, कळवा विभाग कार्यवाह प्रमोद तामसे, प्राचार्य जयकुमार घोडके आदी पदाधिकारी उपस्थित होते. यासंदर्भात समितीच्या वतीने जिल्हा प्रशासनाला सविस्तर निवेदन देण्यात आले. ठाणे जिल्हा हा विविध धर्म, पंथ, जाती, भाषा आणि संस्कृतींच्या नागरिकांचा जिल्हा असून येथे गणेशोत्सव, नवरात्रोत्सव, दहीहंडी, ईद, मोहरम, ख्रिसमस, गुरुपौर्णिमा, विविध जयंती-मिरवणुका तसेच सामाजिक-सांस्कृतिक कार्यक्रम मोठ्या उत्साहात साजरे होतात. मात्र, उत्सवाचा आनंद हा अन्य नागरिकांच्या आरोग्यासाठी धोका ठरू नये, अशी भूमिका महा. अंनिसने मांडली. मोठ्या आवाजातील डॉल्बी-डीजे साऊंडमुळे श्रवणशक्तीवर परिणाम होण्याबरोबरच झोपेचा अभाव, मानसिक ताण, रक्तदाब आणि हृदयविकाराशी संबंधित धोके वाढू शकतात. विशेषतः लहान मुले, ज्येष्ठ नागरिक, आजारी व्यक्ती, गर्भवती महिला, हृदयविकाराचे रुग्ण, विद्यार्थी तसेच रुग्णालयातील रुग्णांना त्याचा मोठा त्रास होतो. त्यामुळे उत्सवाच्या नावाखाली ध्वनीमर्यादांचे उल्लंघन करणाऱ्यांवर कठोर कारवाई करावी, अशी मागणी करण्यात आली. उत्सव आणि मिरवणुकांमध्ये वाढत्या प्रमाणात वापरल्या जाणाऱ्या उच्च-तीव्रतेच्या लेझर लाईट्समुळे डोळ्यांच्या आरोग्याला धोका निर्माण होऊ शकतो. विशेषतः लेझर किरण थेट डोळ्यांवर पडल्यास रेटिनाला इजा होण्याची शक्यता असल्याने नागरिकांच्या डोळ्यांच्या दिशेने अथवा आकाशाकडे प्रक्षेपित होणाऱ्या धोकादायक लेझर बीमवर बंदी घालावी, अशी मागणी समितीने केली. महा. अंनिसने स्पष्ट केले की, ही मागणी कोणत्याही एका धर्माच्या किंवा उत्सवाच्या विरोधात नाही. गणेशोत्सव असो, नवरात्रोत्सव, दहीहंडी, ईद, मोहरम, ख्रिसमस किंवा कोणतीही जयंती-मिरवणूक—ध्वनिप्रदूषणाचे नियम सर्वांसाठी समान असावेत, अशी भूमिका समितीने घेतली. धर्म, जात, पंथ किंवा राजकीय प्रभाव न पाहता कायद्याची समान अंमलबजावणी करण्यात यावी, अशी मागणीही निवेदनात करण्यात आली. प्रत्येक मोठ्या उत्सवासाठी स्वतंत्र Noise Monitoring Squad नियुक्त करावी, पोलीस, जिल्हाधिकारी कार्यालय, महाराष्ट्र प्रदूषण नियंत्रण मंडळ आणि स्थानिक स्वराज्य संस्थांच्या संयुक्त पथकांमार्फत ध्वनीची तपासणी करावी, तसेच ध्वनीमर्यादा ओलांडणाऱ्या आयोजकांवर तातडीने दंडात्मक कारवाई करावी, अशी मागणी करण्यात आली. रुग्णालये, शाळा, महाविद्यालये, न्यायालये आणि शांतता क्षेत्रांमध्ये विशेष ध्वनी नियंत्रण व्यवस्था करावी. नागरिकांच्या तक्रारींसाठी स्वतंत्र हेल्पलाइन किंवा व्हॉट्सॲप क्रमांक जाहीर करून तक्रार मिळाल्यानंतर तातडीने ध्वनीमापन व कारवाई करावी. तसेच उत्सव काळात ध्वनीची डिजिटल मॉनिटरिंग व्यवस्था उभारून त्याची माहिती नागरिकांसाठी सार्वजनिक करावी, अशी मागणी निवेदनातून करण्यात आली. “उत्सव साजरा करा; पण दुसऱ्याच्या आरोग्याची किंमत देऊन नाही,” या भूमिकेतून ठाणे जिल्ह्यात डॉल्बी-डीजे आणि धोकादायक लेझर लाईट्सवर कठोर नियंत्रण आणून सर्वधर्मीय समान धोरण लागू करावे. यासाठी जिल्हा प्रशासनाने तातडीने संबंधित विभागांची बैठक घेऊन जिल्हास्तरीय कृती आराखडा जाहीर करावा, अशी नम्र परंतु ठाम मागणी महा. अंनिस ठाणे शहरच्या शिष्टमंडळाने केली.शिष्टमंडळाने निवासी जिल्हाधिकारी संदीप माने यांच्याकडे निवेदन सादर करून नागरिकांच्या आरोग्याच्या संरक्षणासाठी तातडीने कार्यवाही करण्याची मागणी केली.

  दादर रेल्वे स्थानकावर दाखवला झेंडा चाकरमानी गणेशभक्तांचा उत्स्फूर्त प्रतिसाद मुंबई : गणेशोत्सवाच्या निमित्ताने राज्याचे मत्स्यव्यवसाय व बंदरे मंत्री तथा सिंधुदुर्ग जिल्ह्याचे पालकमंत्री नितेश राणे यांच्या माध्यमातून कोकणवासीय चाकरमान्यांसाठी सोडण्यात आलेली दादर ते सावंतवाडी मोदी एक्सप्रेस काल दुपारी १२ वाजता दादर रेल्वे स्थानकावरून सिंधुदुर्गच्या दिशेने रवाना झाली. गणेशभक्तांच्या उत्साहात आणि ‘गणपती बाप्पा मोरया’च्या जयघोषात मोदी एक्सप्रेसने कोकणाकडे प्रस्थान केले. यावेळी मंत्री नितेश राणे यांनी दादर रेल्वे स्थानकावर मोदी एक्सप्रेसला झेंडा दाखवला. गणेशोत्सवाच्या काळात रेल्वेचे आरक्षण मिळणे कठीण होते. त्यातच खासगी वाहनांचे वाढलेले प्रवासभाडे यामुळे चाकरमान्यांसमोर मोठे आव्हान निर्माण होते. अशा परिस्थितीत मोदी एक्सप्रेसच्या माध्यमातून गणेशभक्तांना मोफत आणि सुखकर प्रवासाची सुविधा उपलब्ध करून देण्यात आली आहे. चाकरमान्यांचा प्रवास सुरक्षित, आरामदायी आणि सुलभ व्हावा, या उद्देशाने मंत्री नितेश राणे यांच्या माध्यमातून हा उपक्रम गेली १४ वर्षे सातत्याने राबविण्यात येत आहे. विशेष म्हणजे, गणेशभक्तांसाठी ही मोफत प्रवासाची सुविधा मंत्री नितेश राणे यांनी स्वखर्चाने उपलब्ध करून दिली आहे. दरम्यान, दुसरी मोदी एक्सप्रेस रविवार, १३ सप्टेंबर रोजी कोकणाच्या दिशेने रवाना होणार आहे. गेली अनेक वर्षे गणेशोत्सवाच्या काळात चाकरमान्यांसाठी राबविण्यात येत असलेल्या या उपक्रमाबद्दल गणेशभक्तांनी समाधान व्यक्त केले असून, मंत्री नितेश राणे यांचे मनःपूर्वक आभार मानले आहेत.