Author: bittambatami.com

– सकल मराठा समाजाचे अन्नत्याग आंदोलन कल्याण : मराठा आरक्षणाच्या मागणीसाठी संघर्ष योद्धा मनोज जरांगे पाटील यांच्या आंदोलनाला पाठिंबा देण्यासाठी कल्याणमध्ये सकल मराठा समाज आणि मराठा क्रांती मोर्चाच्या वतीने आज कल्याण तहसीलदार कार्यालयाबाहेर एकदिवसीय अन्नत्याग व लाक्षणिक उपोषण सुरू करण्यात आले आहे. कल्याण पश्चिम रेल्वे स्थानकाजवळील तहसीलदार कार्यालयाबाहेर सुरू असलेल्या या आंदोलनात मराठा समाजाच्या विविध संघटनांचे पदाधिकारी आणि कार्यकर्ते सहभागी झाले आहेत. शांततेच्या मार्गाने आंदोलन करत मनोज जरांगे पाटील यांच्या मागण्यांना पाठिंबा देण्याची भूमिका आंदोलकांनी घेतली आहे. मनोज जरांगे पाटील यांच्या उपोषणाला पाठिंबा देण्यासाठी कल्याणमध्ये हे आंदोलन करण्यात येत आहे. सरकारने मनोज जरांगे यांच्या काही मागण्या वेळोवेळी मान्य केल्या असल्या, तरी अद्याप काही मागण्या प्रलंबित आहेत. ज्या मराठ्यांच्या नोंदी कुणबी म्हणून झाल्या आहेत, त्यांना अद्याप कुणबी प्रमाणपत्र मिळालेले नाही. या मागणीसाठी मनोज जरांगे पाटील आंदोलनाला बसले असल्याचे मराठा समाजाचे नेते अरविंद मोरे यांनी सांगितले. दरम्यान, मराठा समाजाच्या मागण्यांकडे सरकारने गांभीर्याने लक्ष देऊन त्या लवकरात लवकर मार्गी लावाव्यात, अशी मागणी यावेळी आंदोलकांकडून करण्यात आली. यावेळी आंदोलनात अरविंद मोरे, श्याम आवारे, धनंजय जोगदंड, दर्शन देशमुख, बबन जरांगे, राहुल काटकर, संदिप देसाई, सतीश पेडणेकर, शरद बिरामाने, प्रशांत पाटील, आनंद कोळेकर, कृष्णा पाटील, प्रकाश जाधव, भागुजी पाटील, अंकुश मुळीक, रवींद्र लांडे, सीताराम कोकणे, भावेश अवसरे, अमर वाघ, अजित शिंदे, सुभाष अरगुडे, दत्तात्रय पाटील, किशोर डुबे, किशोर जाधव, धनाजी देगावकर, रमेश गुंजाळ, विठ्ठल जवक,  रवींद्र कदम, गणेश निकम, सिद्धेश भोसले, भानुदास यादव, अशोक दळवी, रमेश अंधारे, गणेश गवते, उदय वाघमारे, गणेश वाबळे, अभिजित पोवार, प्रकाश मोरे, अस्मिता मोरे, वर्षा कळके, रुपाली नींबाळकर आदी कार्यकर्ते सहभागी झाले होते. ०००००

उलवे  : महेंद्रशेठ यांचे हसणे आणि रुसणे, या संमिश्र भावना आहेत; परंतु महेंद्रशेठ घरत मनाचा सच्चा माणूस आहे आणि हवेहवेसे वाटणारे नेतृत्व आहे. विनोद म्हात्रे यांच्या वाढदिवसाला महेंद्रशेठ घरत यांच्या…

पेपरफुटीविरोधात नाशिकमध्ये एमपीएससी विद्यार्थ्यांचे आंदोलन हरिभाऊ लाखे नाशिक : याआधी तीन ते चार वेळा आपण महाराष्ट्र लोकसेवा आयोग अर्थात एमपीएससीची परीक्षा दिली होती. प्रत्येक वेळी अतिशय कमी फरकाने अपयशी ठरलो. तेव्हा वाटायचे, आपण अधिक अभ्यास केला पाहिजे. परंतु, आता पेपरफुटीमुळे इतर लोक पुढे जात असल्याचे समजल्यावर अपयशाचे मूळ कारण लक्षात येत आहे. आपण अभ्यासात कुठेही कमी पडत नसून या परिस्थितीमुळे विद्यार्थ्यांच्या मानसिकतेवर आणि आत्मविश्वासावर अत्यंत वाईट परिणाम होत आहे. राज्यातील पुणे, छत्रपती संभाजीनगर, नागपूर शहरांपाठोपाठ बुधवारी नाशिकमधील स्पर्धा परीक्षा देणाऱ्या विद्यार्थ्यांनी आंदोलन केले. नाशिक जिल्हाधिकारी कार्यालयासमोर झालेल्या या आंदोलनावेळी सहभागी एका विद्यार्थ्याने विद्यार्थ्यांमधील अस्वस्थता अधोरेखित केली. महाराष्ट्रातील लाखो विद्यार्थी महाराष्ट्र लोकसेवा आयोगामार्फत (एमपीएससी) घेण्यात येणाऱ्या विविध स्पर्धा परीक्षांची तयारी करतात. या परीक्षांसाठी अनेक वर्षे अथक परिश्रम घेतात. कुटुंबीयांकडून मोठी आर्थिक, सामाजिक व मानसिक गुंतवणूक केली जाते. त्यामुळे एमपीएससीच्या परीक्षा प्रक्रियेतील प्रत्येक टप्पा पारदर्शक, निष्पक्ष, सुरक्षित, उत्तरदायी व विश्वासार्ह असणे आवश्यक असल्याकडे आंदोलक विद्यार्थ्यांनी लक्ष वेधले. या प्रक्रियेवरील ढासळलेला विश्वास पूर्ववत करण्यासाठी तातडीने १८ कलमी सुधारणा कराव्यात असे निवेदन जिल्हा प्रशासनाकडे सादर करण्यात आले. सध्याच्या प्रश्नपत्रिकाफुटीच्या प्रकरणाची तसेच यापूर्वी झालेल्या संभाव्य परीक्षा गैरप्रकारांची चौकशी पूर्णपणे स्वतंत्र व कोणत्याही दबावापासून मुक्त वातावरणात करण्याची आवश्यकता आहे. निष्पक्षपणे ही चौकशी होण्यासाठी एमपीएससीचे अध्यक्ष व सचिव तसेच या प्रकरणाशी संबंधित मंत्रालयीन अधिकारी यांना चौकशी पूर्ण होईपर्यंत जबाबदाऱ्यांपासून तात्पुरते दूर ठेवावे. प्रश्नपत्रिका निर्मिती, संपादन, छपाई, हाताळणी, वाहतूक, गोपनीय माहितीची सुरक्षा, परीक्षा व्यवस्थेवरील नियंत्रण, प्राप्त तक्रारींवर केलेली कार्यवाही, संभाव्य निष्काळजीपणा किंवा प्रशासकीय त्रुटी यांची स्वतंत्र चौकशी करण्याचा आग्रह आंदोलकांनी धरला आहे. परीक्षेतील प्रत्येक टप्प्यासाठी जबाबदारी निश्चित करावी. प्रश्नपत्रिकेच्या गोपनीयतेसाठी स्वतंत्र व अत्याधुनिक सुरक्षा यंत्रणा निर्माण करावी. गोपनीय माहिती बाहेर जाण्याचे मार्ग ओळखून त्यावर नियंत्रण ठेवावे. प्रश्नपत्रिका अभ्यासक्रमाधारित, तथ्यात्मकदृष्ट्या अचूक आणि त्रुटीविरहित राहण्यासाठी प्रश्ननिर्मिती ते अंतिम मंजुरीपर्यंत बहुस्तरीय तपासणी करावी, अशी मागणी आंदोलक विद्यार्थ्यांनी केली. क्रीडा, अपंग, टायपिंग व इतर विशेष कोट्यांतर्गत होणाऱ्या निवडीसाठी पात्रता निकष स्पष्ट करावेत. परीक्षा प्रक्रियेतील गैरप्रकार, प्रश्नपत्रिकेतील त्रुटी, परीक्षा केंद्रातील समस्या, तांत्रिक अडचणी अथवा अन्य तक्रारींची दखल घेण्यासाठी स्वतंत्र ऑनलाइन पोर्टल तयार करावे. प्रत्येक तक्रार निवारणाची जबाबदारी निश्चित अधिकाऱ्यावर सोपवावी. यावर निश्चित कालमर्यादेत कार्यवाही करून विद्यार्थ्यांना उत्तर देणे बंधनकारक करावे. आयोगाच्या सदस्य नियुक्तीत पारदर्शकता, परीक्षा गैरप्रकारांच्या चौकशीसाठी निश्चित कालमर्यादा, परीक्षा केंद्रातील सुरक्षा व्यवस्था सक्षम करण्याची गरज विद्यार्थ्यांनी मांडली. मुलाखतीसाठी स्पष्ट, पूर्वनिश्चित, वस्तुनिष्ठ मूल्यांकन निकष जाहीर करावेत. राज्यसेवा मुख्य परीक्षेतील उत्तरपत्रिकांचे मूल्यांकन व गुणदान या प्रक्रिया कोणत्या निकषांवर आधारित आहेत, याबाबत आयोगाने स्पष्ट मार्गदर्शक तत्त्वे जाहीर करावीत, अशी मागणी करण्यात आली. निकालानंतरची निवड व नियुक्ती प्रक्रिया वेळेत पूर्ण करावी. राज्यसेवा मुख्य परीक्षा २०२५ मधील गुणांतील तफावत व मूल्यांकन प्रक्रियेची तपासणी करावी. एखाद्या परीक्षेतील गैरप्रकारावर तात्पुरती कारवाई करण्यापेक्षा संपूर्ण परीक्षा व्यवस्थेचे संस्थात्मक पुनरावलोकन करून भविष्यात अशा घटना घडणार नाहीत, अशी मजबूत यंत्रणा निर्माण करण्याची मागणी विद्यार्थ्यांनी शासनाकडे केली आहे.

मुंबई, दि. ९ : भारतरत्न डॉ. बाबासाहेब आंबेडकर यांनी स्थापन केलेल्या ‘पीपल्स एज्युकेशन सोसायटी, मुंबई’ अंतर्गत शाळा, महाविद्यालये आणि वसतिगृहांच्या जतन व संवर्धनाची कामे सुनियोजित, दर्जेदार आणि या वास्तूंच्या ऐतिहासिक महत्त्वाला साजेशी व्हावीत, असे निर्देश विधानसभा उपाध्यक्ष अण्णा बनसोडे यांनी दिले. पीपल्स एज्युकेशन सोसायटीसाठी सामाजिक न्याय विभागाने मंजूर केलेल्या ५०० कोटी रुपयांच्या विशेष निधीच्या अनुषंगाने विधानसभा उपाध्यक्ष  बनसोडे यांच्या अध्यक्षतेखाली बैठक झाली.  सोसायटीच्या माध्यमातून राज्यातील नऊ शैक्षणिक संस्था व दोन वसतिगृहाचे जतन व संवर्धनाच्या कामांचा व प्रशासकीय मान्यतेचा या बैठकीत आढावा घेण्यात आला. यावेळी सामाजिक न्याय विभागाचे सह सचिव सो. ना. बागूल, सार्वजनिक बांधकाम विभागाच्या सह सचिव पु. प्र. साबणे, वित्त विभागाच्या अवर सचिव शि. भा. भोगटे, पीपल्स एज्युकेशन सोसायटीचे सचिव डॉ. वासुदेव गाडे व चंद्रशेखर कांबळे आदी उपस्थित होते. विधानसभा उपाध्यक्ष अण्णा बनसोडे म्हणाले, प्रशासकीय मान्यता मिळालेली कामे नियोजनबद्ध पद्धतीने पूर्ण करण्यात यावीत. ज्या कामांना अद्याप प्रशासकीय मान्यता मिळालेली नाही, त्या प्रस्तावांना प्राधान्याने मान्यता देण्याची कार्यवाही शासनस्तरावर करावी. सामाजिक न्याय विभागाने कामांच्या स्वरुपानुसार मंजूर निधी आणि प्रशासकीय मान्यतेबाबतची माहिती तसेच इतर अनुषंगिक बाबींसाठी पीपल्स एज्युकेशन सोसायटीशी समन्वय साधावा. तसेच शैक्षणिक संस्था आणि वसतिगृहांच्या नियोजित कामांचा सद्यस्थिती अहवाल पुढील बैठकीत सादर करावा, असे निर्देश बनसोडे यांनी दिले. भारतरत्न डॉ. बाबासाहेब आंबेडकर यांनी स्थापन केलेल्या शैक्षणिक संस्था आणि वसतिगृहे हा ऐतिहासिक वारसा आहे. या वास्तूंच्या संवर्धनाच्या माध्यमातून पुढील पिढ्यांना डॉ. बाबासाहेब आंबेडकर यांचे कार्य सदैव प्रेरणा आणि मार्गदर्शन देत राहील. ऐतिहासिक संदर्भांच्या दृष्टीनेही या इमारतींना विशेष महत्त्व आहे. त्यामुळे सर्व संबंधित विभाग आणि संस्थांनी समन्वयातून जतन व संवर्धनाची कामे करावीत, अशा सूचनाही विधानसभा उपाध्यक्ष अण्णा बनसोडे यांनी यावेळी दिल्या.

आरोप-प्रत्यारोपांमुळे राजकीय कलगीतुरा; काँग्रेस-उबाठाकडूनही सवाल कल्याण : पुण्यात पंतप्रधान नरेंद्र मोदी यांचा फोटो हटविण्याच्या वादाचे पडसाद बुधवारी कल्याण-डोंबिवली महानगरपालिकेच्या महासभेत उमटले. भाजपा गटनेते शशिकांत कांबळे यांनी या मुद्द्यावरून महासभा स्थगित करण्याची मागणी केली. त्यानंतर महापौर हर्षाली थवील चौधरी यांनी बुधवारीची महासभा संपूर्ण दिवसासाठी तहकूब केली. महासभा तहकूब होताच भाजपा आणि मनसेमध्ये जोरदार आरोप-प्रत्यारोप सुरू झाले. केडीएमसीमध्ये शिवसेना आणि भाजपाची युती असून मनसेही शिवसेनेसोबतच्या आघाडीमुळे सत्तेचा भाग आहे. मात्र, गेल्या काही दिवसांपासून भाजपा आणि मनसेमध्ये राजकीय संघर्ष वाढताना दिसत आहे. भाजपाकडून मनसेला सत्तेतून बाहेर काढण्याची मागणी केली जात आहे. त्यावर मनसेकडून भाजपानेच सत्तेतून बाहेर पडावे, असे आव्हान दिले जात आहे. त्यामुळे दोन्ही पक्षांमधील संघर्ष अधिक तीव्र झाला आहे. मनसे गटनेते प्रल्हाद म्हात्रे यांनी भाजपावर जोरदार टीका केली. “इतका विरोध आहे तर सत्तेतून बाहेर पडा. सत्तेची मलाई खाण्यासाठी सत्तेत राहिला आहात. महापौर आम्ही बसवला आहे. आमच्याकडे बहुमत आहे, तुम्ही सत्तेतून बाहेर पडा,” असे त्यांनी सांगितले. दरम्यान, भाजपा-मनसेच्या राजकीय वादावर काँग्रेस आणि शिवसेना उद्धव बाळासाहेब ठाकरे गटानेही प्रश्न उपस्थित केले. महासभेत नागरिकांच्या समस्या, शहरातील विकासकामे आणि महत्त्वाच्या नागरी प्रश्नांवर चर्चा होणे अपेक्षित असते. त्यामुळे राजकीय वादामुळे संपूर्ण दिवसाची महासभा तहकूब करणे योग्य नसल्याची भूमिका त्यांनी मांडली. नागरी प्रश्न बाजूला ठेवून राजकीय आरोप-प्रत्यारोपांना महत्त्व दिले जात असल्याचा आरोपही करण्यात आला. भाजपा आणि मनसेमधील वाढता संघर्ष पाहता आगामी काळात केडीएमसीच्या सत्तासमीकरणावर त्याचा परिणाम होण्याची शक्यता व्यक्त केली जात आहे. विशेषतः अडीच वर्षांनंतर सत्तेचे समीकरण काय राहणार, याबाबत राजकीय वर्तुळात चर्चा सुरू झाली आहे. भाजपा आणि मनसेमधील मतभेद वाढत राहिल्यास शिवसेनेची भूमिका महत्त्वाची ठरणार आहे. सध्या शिवसेनेकडून या घडामोडींवर लक्ष ठेवले जात असून ‘वेट अँड वॉच’ची भूमिका घेतली जात असल्याचे चित्र आहे. भाजपा-मनसेतील संघर्ष असाच वाढत राहिला, तर आगामी काळात केडीएमसीतील सत्तेचे समीकरण बदलणार का, याकडे सर्वांचे लक्ष लागले आहे.

रमेश औताडे मुंबई : कल्याण ज्वेलर्सने आज महाराष्ट्रातील मुलुंड येथे आपल्या नवीन शोरूमचा शुभारंभ केला. अभिनेते प्रभू गणेशन आणि मलायका अरोरा यांच्या हस्ते या शोरूमचे भव्य उद्घाटन करण्यात आले. अभिनेता प्रभू गणेशन म्हणाले, ‘कल्याण ज्वेलर्स नेहमीच ग्राहकांचा विश्वास, प्रामाणिकपणा आणि त्यांच्या आनंदाला सर्वोच्च प्राधान्य दिले आहे.’ मलायका अरोरा म्हणाल्या, ‘मला पूर्ण खात्री आहे की या शहरातील लोकांना कल्याण ज्वेलर्सची उत्कृष्ट आणि युनिक डिझाइन्स नक्कीच आवडतील. तर कल्याण ज्वेलर्स चे एक्झिक्युटिव्ह डायरेक्टर रमेश कल्याणरमन म्हणाले,”मुलुंडमध्ये आमचे पहिले शोरूम सुरु करून, महाराष्ट्रातील आमचे स्थान अधिक मजबूत करताना आम्हाला अत्यंत आनंद होत आहे. आमची उत्कृष्ट कारागिरी, भरपूर कलेक्शन्स आणि विश्वास व पारदर्शक ते प्रती आमचा अढळ संकल्प याद्वारे ग्राहकांना दागिने खरेदीचा एक अतुलनीय आणि अविस्मरणीय अनुभव देणे, हाच आमचा नेहमीच प्रयत्न राहिला आहे.’

मिरा-भाईंदर : मिरा-भाईंदर शहरातील मांडली तलावासारख्या नैसर्गिक जलस्रोतांमध्ये प्रदूषणाची गंभीर परिस्थिती यापूर्वीच शासकीय यंत्रणांच्या निदर्शनास आलेली असतानाही, महापालिकेकडून गणेशमूर्ती तसेच इतर सण-उत्सवांच्या मूर्तींचे नैसर्गिक जलस्रोतांमध्ये विसर्जन करण्याची पद्धत सुरू ठेवली जात असल्याबाबत पर्यावरणप्रेमींकडून तीव्र नाराजी व्यक्त करण्यात येत आहे. महाराष्ट्र प्रदूषण नियंत्रण मंडळाच्या २७ नोव्हेंबर २०२४ रोजीच्या अहवालानुसार मांडली तलावाच्या पाण्यात Dissolved Oxygen केवळ १.८ mg/L, BOD १४ mg/L आणि COD ४८ mg/L आढळून आले होते. पाण्याच्या गुणवत्तेबाबत गंभीर निरीक्षणेही नोंदविण्यात आली होती.  अशा परिस्थितीत याच नैसर्गिक तलावांमध्ये पुन्हा मूर्ती विसर्जन करून प्रदूषणाचा भार वाढवायचा का? असा सवाल पर्यावरणप्रेमी हर्षद ढगे यांनी उपस्थित केला आहे. महापालिकेने २०२6 साठी प्रसिद्ध केलेल्या विसर्जन यादीमध्ये नैसर्गिक स्रोत, कृत्रिम तलाव आणि पार्टिशन करून तयार केलेले कृत्रिम तलाव अशा स्वतंत्र श्रेणी केल्या आहेत. मात्र, एखाद्या नैसर्गिक जलस्रोतामध्ये केवळ पार्टिशन किंवा तात्पुरती विभागणी केली म्हणून तो जलस्रोत कायदेशीर व तांत्रिकदृष्ट्या कृत्रिम तलाव ठरतो का, हा गंभीर प्रश्न आहे.  शहरामध्ये स्वतंत्र कृत्रिम विसर्जन तलाव मोठ्या प्रमाणावर उपलब्ध करून देता येत असताना नैसर्गिक तलावांचे प्रदूषण का वाढवायचे? असा प्रश्नही उपस्थित करण्यात येत आहे. महापालिकेने प्रत्येक प्रभागात किंवा आवश्यक त्या ठिकाणी तात्पुरते/स्थायी कृत्रिम विसर्जन तलाव, टाक्या किंवा योग्य जलरोधक संरचना उपलब्ध करून द्याव्यात. या ठिकाणी मूर्ती विसर्जनाची स्वतंत्र व्यवस्था करून विसर्जनानंतरचे पाणी, गाळ आणि मूर्तीचे अवशेष यांची योग्य पद्धतीने विल्हेवाट लावावी. “कृत्रिम विसर्जन तलाव तयार करण्याची क्षमता आणि पर्याय उपलब्ध असताना नैसर्गिक तलावांमध्ये मूर्ती विसर्जन करून त्या जलस्रोतांचे प्रदूषण वाढवणे हा कोणत्याही परिस्थितीत योग्य पर्याय असू शकत नाही. प्रशासनाने उत्सव व्यवस्थापनासोबत पर्यावरण संरक्षणालाही समान महत्त्व दिले पाहिजे,” असे हर्षद ढगे यांनी म्हटले आहे.

महापौर शर्मिला पिंपोळकर यांच्या हस्ते उद्घाटन; नागरी समस्या व विकासकामांना गती मिळण्याची नागरिकांची अपेक्षा दिवा, दि. ७ सप्टेंबर (आरती परब) : दिवा प्रभाग समितीचे नवनियुक्त अध्यक्ष दीपक जाधव यांच्या कार्यालयाचे उद्घाटन ठाणे महापालिकेच्या महापौर शर्मिला पिंपोळकर यांच्या हस्ते करण्यात आले. उद्घाटनानंतर महापौर पिंपोळकर यांनी जाधव यांचा सत्कार करून त्यांना अध्यक्षपदाची खुर्ची ग्रहण करण्यास सांगितले. यावेळी दिवा शहरप्रमुख तथा नगरसेवक रमाकांत मढवी आणि उपशहरप्रमुख तथा नगरसेवक शैलेश पाटील यांनी दीपक जाधव यांचा सत्कार करून त्यांना शुभेच्छा दिल्या. कार्यक्रमाला नगरसेवक, विविध पदाधिकारी, कार्यकर्ते तसेच अनेक मान्यवरांची मोठी उपस्थिती होती. दिवा शहरातील वाढत्या नागरी समस्या, प्रलंबित विकासकामे तसेच भविष्यातील विविध विकासकामांना गती मिळावी, यासाठी प्रभाग समितीच्या माध्यमातून प्रभावीपणे काम केले जाईल, अशी अपेक्षा नागरिकांकडून व्यक्त केली जात आहे. नव्या अध्यक्षांच्या माध्यमातून नागरिकांच्या समस्या प्रशासनापर्यंत प्रभावीपणे पोहोचून त्या मार्गी लागतील, अशीही अपेक्षा आहे. दरम्यान, दिवा प्रभाग समितीतील सर्व अधिकारी व कर्मचाऱ्यांनीही अध्यक्ष दीपक जाधव यांचा सत्कार करून त्यांना पुढील कार्यासाठी शुभेच्छा दिल्या. तसेच ठाणे महापालिका सभागृह नेते हणमंत जगदाळे यांनी नूतन कार्यालयाला भेट देऊन दीपक जाधव यांची सदिच्छा भेट घेतली आणि त्यांना शुभेच्छा दिल्या. नूतन अध्यक्षपदाची जबाबदारी स्वीकारल्यानंतर दिवा विभागातील मूलभूत सुविधा, नागरी प्रश्न आणि विकासकामांना प्राधान्य देत काम करण्याचे मोठे आव्हान दीपक जाधव यांच्यासमोर आहे. त्यामुळे त्यांच्या कार्यकाळात दिव्याच्या विकासाला कितपत गती मिळते, याकडे नागरिकांचे लक्ष लागले आहे.

प्रथमच उभारला आठ थराचा मानवी मनोरा राजेंद्र साळसकर मुंबई- भगवान श्रीकृष्णाच्या बाललिलांच्या स्मरणाच्या उत्सवाचा सण म्हणजे गोपाळकाला. हा सण  अभुतपूर्व व मोठ्या जल्लोषात संपूर्ण देशभरात साजरा झाला. विविध  राजकीय पक्षांच्या  आणि नेत्यांच्यावतीने लाखो रूपयांच्या बक्षिसांच्या दहिहंडीचे ठिकठिकाणी आयोजन करण्यात आले होते. मंडळाच्या वतीने ठाणे येथील संकल्प प्रतिष्ठानच्य हंडीसाठी दक्षिण मुंबईतील पहिले आणि महाराष्ट्रातील दुसरे डबल दुरीचे ३ एक्के करत ८ थर रचण्याचा ऐतिहासिक विक्रम* काळाचौकी येथील जिजामाता नगर गोविंदा पथकाकडून करण्यात आला. या ऐतिहासिक कामगिरीचे विशेष कौतुक म्हणजे, जिजामाता नगर गोविंदा पथकाच्या इतिहासातील पहिले २०११ चे ७ थर आणि मंडळाच्या इतिहासातील पहिले ८ थरांची रचना मंडळाचे प्रमुख प्रशिक्षक तसेच अध्यक्ष  चेतन मोरेश्वर पवार यांच्या कार्यकाळात झाली आहे.  ही ऐतिहासिक कामगिरी म्हणजे जिजामाता नगर गोविंदा पथकाच्या शौर्य, जिद्द, एकजूट, मेहनत आणि संघभावनेचा अभिमानास्पद विजय! जिजामाता नगर गोविंदा पथकाचया या गोविदा पथकाच्या या ऐतिहासिक कामगिरीबद्गल जिजामातानगर सार्वजनिक गणेशोत्सव मंडळाचे अध्यक्ष सुशील साळसकर यांनी अभिनंदन केले असून संपूर्ण काळाचौकी परिसरातून या गोविंदा पथकावर कौतुकाचा वर्षाव होत आहे. जिजामाता नगर गोविंदा पथकाच्या कामगिरीमुळे या पथकातील सर्व गोविदांचा विश्वास दुणावला असून पुढील वर्षी नऊ मानवी मनोरा रचण्याचा मनोदय  मंडळाचे अध्यक्ष तसेच प्रशिक्षक चेतन पवार यांनी व्यक्त केला आहे.

डोंबिवली : राज्यघटनेचे शिल्पकार डॉ. बाबासाहेब आंबेडकर यांचा डॉक्टरेट देऊन सन्मान करणाऱ्या जगप्रसिद्ध लंडन स्कूल ऑफ इकॉनॉमिक्समध्ये शिवसेनेचे संसदीय पक्षाचे नेते तथा कल्याणचे खासदार डॉ. श्रीकांत शिंदे यांच्या नव्या शैक्षणिक पर्वाला…